Josua 14:1-15
14 Enda me warisen si ibereken man kalak Israel i negri Kanaan. Si merekenca eme Imam Eleasar, Josua anak Nun, ras peminpin-peminpin keluarga bapak arah suku-suku Israel.+
2 Warisen man siwah suku ras man setengah suku+ itentuken alu undi+ bagi si perentahken Jahwe arah Musa.
3 Enggo bereken Musa warisen man dua setengah suku si debanna si lit i sebrang* Lau Jordan,+ tapi man suku Lewi la lit berekenna warisen.+
4 Keturunen Jusup ibagi dua+ eme Manase ras Eperaim.+ Suku Lewi la dat warisen bas negri e. Tapi ibereken man kalak e kota-kota+ man ingan tading kalak e ras mbalmbal man asuh-asuhen bage pe ingan man kerina si lit bas kalak e.+
5 Ibagi-bagiken bangsa Israel negri e bagi si perentahken Jahwe man Musa.
6 Kenca si e dilaki-dilaki arah Juda njumpai Josua i Gilgal.+ Jenari Kalep+ anak Jepune kalak Keni ngerana man Josua, nina, “Enggo tehndu kai si kataken Jahwe+ man Musa pelayan Dibata si benar+ kerna kam ras aku i Kades-Barnea.+
7 Umurku enggo 40 tahun sanga Musa pelayan Jahwe e nuruh aku jadi mata-mata arah Kades-Barnea,+ janah mulih aku maba laporen si benar.+
8 Aminna pe senina-seninaku si lawes ras aku erban bangsa e mbiar, tapi aku, kuikutken Jahwe Dibataku alu bulat ukur.+
9 Bas wari e ersumpah Musa, nina, ‘Taneh si dedehndu e jadi warisenndu ras anak-anakndu pagi lalap, sebap enggo ikutkenndu Jahwe Dibatandu alu bulat ukur.’+
10 Bagi janji Jahwe,+ lindungiNa aku+ sedekah 45 tahun enda, mulai sanga iban Jahwe janji e man Musa sanga kalak Israel erdalan i taneh mesawang.*+ Tetap denga aku nggeluh seh asa gundari, janah enggo 85 tahun dekahna.
11 Tapi gegehku bali denga bagi sanga aku isuruh Musa. Megegeh denga aku erperang ras ngelakoken dahin si deban bagi si mbarenda.
12 Emaka berekenlah man bangku daerah pegunungen bagi janji Jahwe mbarenda. Amin gia enggo begindu maka lit i je kalak Enak+ si tading bas kota-kota si galang si erbenteng,+ Jahwe pasti lit ras aku+ janah pasti kupelawes kalak e bagi si janjiken Jahwe.”+
13 Emaka ipasu-pasu Josua me Kalep anak Jepune, janah berekenna Hebron jadi warisen man bana.+
14 Seh asa gundari, Hebron jadi jang Kalep anak Jepune kalak Keni, sebap ikutkenna Jahwe Dibata Israel alu bulat ukur.+
15 Mbarenda Hebron igelari Kiryat Arba+ (Arba eme kalak Enak si ihamati). Dungna lanai lit perang bas negri e.+
