Josua 18:1-28
18 Pulung kerina kalak Israel i Silo,+ janah ban kalak e kemah perjumpan i je+ perban enggo taluken kalak e negri e.+
2 Tapi lit pitu suku nari bas kalak Israel si lenga dat warisen.
3 Emaka nina Josua man kalak Israel, “Asa kai nari dekahna kena nimai guna ndatken warisen si enggo bereken Jahwe Dibata nini bulang kena man kena?+
4 Pilihlah telu dilaki arah tiap suku, kusuruh pagi kalak e lawes guna ngenen negri e janah erban peta menurut daerah-daerah si nandangi ibereken man tiap suku. Jenari arus dahi kalak e aku.
5 Daerah e arus ibagi kalak e jadi pitu bagin.+ Daerah Juda tetap i selatan,+ janah daerah keturunen Jusup tetap i utara.+
6 Tapi kena, bagilah daerah e jadi pitu bagin jenari bereken man bangku petana, gelah kuban undi+ i lebe-lebe Jahwe Dibatata.
7 Tapi kalak Lewi la dat bagin bagi kena,+ perban warisen kalak e eme jadi imam guna ngelayani Jahwe.+ Warisen suku Gat, Ruben, bage pe setengah suku Manase+ lit i sebelah timur Lau Jordan bagi si enggo ibereken Musa pelayan Jahwe man kalak e.”
8 Ersikap me dilaki-dilaki si nandangi erban peta daerah e, janah nina Josua man kalak e, “Laweslah kena janah banlah peta negri e jenari bereken man bangku. Kuundi pagi daerah e guna kena i Silo i lebe-lebe Jahwe.”+
9 Emaka lawes dilaki-dilaki e guna ngenen daerah e jenari ibagina jadi pitu bagin janah banna peta kota-kota e bas sada buku. Kenca si e, dahi kalak e Josua bas perkemahen i Silo.
10 Jenari iundi Josua daerah e i Silo i lebe-lebe Jahwe.+ I je ibagi-bagi Josua daerah e man kalak Israel menurut baginna masing-masing.+
11 Enda me hasil undi man suku Benyamin menurut keluarga-keluarga kalak e. Daerah kalak e antara daerah keturunen Juda+ ras keturunen Jusup.+
12 Batas daerah kalak e i sebelah utara eme mulai Lau Jordan nari nangkeng ku daerah lereng* Jeriho+ ku utara jenari nangkeng ka ku gunung i sebelah barat, dung e terus ku Taneh Mesawang* Bet-Awen.+
13 Jenari batas daerah kalak e terus ku Lus ntah pe Betel+ i sebelah selatan daerah lereng Lus. Kenca si e nusur ku Atarot Adar+ i gunung si lit i sebelah selatan Bet Horon Teruh.+
14 I sebelah barat, batas e terus ku selatan arah gunung si pengalana ku Bet Horon si lit i selatan, janah batasna Kiryat Baal ntah pe Kiryat Jearim+ eme kota keturunen Juda. Enda me batas daerah kalak e i sebelah barat.
15 Batas daerah kalak e si sebelah selatan eme mulai ujung Kiryat Jearim nari terus ku sebelah barat, jenari terus ka ku Mata Lau Neptoa.+
16 Batas daerah kalak e nusur ku ujung gunung si pengalana ku Lembah Anak Hinnom+ si lit i Lembah Repaim+ i sebelah utara, jenari nusur ku Lembah Hinnom ku daerah lereng kalak Jebusi+ i sebelah selatan, dung e nusur ka ku Enrogel.+
17 Jenari terus ku utara eme ku Ensemes, dung e terus ku Gelilot si lit i lebe-lebe dalan nangkeng ku Adumim,+ janah nusur ku Batu+ Bohan.+ (Bohan e keturunen Ruben.)
18 Kenca si e terus ku daerah lereng si lit i utara i lebe-lebe Araba, dung e nusur ku Araba.
19 Batas daerah kalak e terus ku daerah lereng Bet-Hogela+ si lit i utara, janah ujung batas daerah kalak e eme tepi Laut Mati*+ si sebelah utara, i ujung selatan Lau Jordan. Enda ndai me batas daerah kalak e i sebelah selatan.
20 Batas daerah kalak e si arah timur eme Lau Jordan. Enda ndai me warisen keturunen Benyamin menurut keluarga-keluarga kalak e, menurut batas-batas daerah kalak e arah kerina bagin.
21 Kota-kota suku Benyamin menurut keluarga-keluarga kalak e eme: Jeriho, Bet-Hogela, Emek Kesis,
22 Bet-Araba,+ Semaraim, Betel,+
23 Awim, Para, Opra,
24 Keparammoni, Opni, ras Geba.+ Kerina lit 12 kota ras kuta-kutana.
25 Gibeon,+ Rama, Beerot,
26 Mispa, Kepira, Mosah,
27 Rekem, Irpel, Tarala,
28 Sela,+ Haelep, Jebusi ntah pe Jerusalem,+ Gibea,+ ras Kiryat. Kerina lit 14 kota ras kuta-kutana.
Enda ndai me warisen keturunen Benyamin menurut keluarga-keluarga kalak e.
