Josua 2:1-24
2 Kenca si e, erbuni-buni Josua anak Nun ngutus dua kalak arah Sitim nari+ jadi mata-mata. Nina man kalak e, “Laweslah kena, selidiki negri e, terutama kota Jeriho.” Emaka lawes kalak e janah erberngi kalak e i rumah sekalak pelacur si gelarna Rahap.+
2 Lit si ngata man raja Jeriho, nina, “Berngi enda, lit mata-mata kalak Israel reh ku negrita.”
3 Emaka peseh raja Jeriho pesan man Rahap, nina, “Baba ku darat kalak si erberngi bas rumahndu, sebap kalak e mata-mata si reh ku negrita.”
4 Tapi, enggo buniken diberu e dilaki ndai duana. Kenca si e nina, “Ue, memang lit dilaki si reh ku jenda, tapi la kuteh ja nari kalak e.
5 Sanga enggo gelap wari janah gerbang kota nandangi itutup, lawes kalak e. La kuteh ku ja kalak e lawes, tapi adi ayaki kena kalak e gundari, dat kena denga nge ia.”
6 (Situhuna, enggo bunikenna kalak ndai duana i atap, i teruh batang-batang rami.)*
7 Emaka ayaki kalak e kalak ndai duana ku penyebrangen Lau Jordan.+ Kenca ndarat kalak e, gerbang kota mis itutup.
8 Sope lenga medem mata-mata ndai, reh Rahap ku atap ndahi kalak e.
9 Nina man kalak e, “Kuteh nge maka pasti bereken Jahwe negri enda man kena.+ Enggo mbiar kami man kena.+ Kerina penduduk negri enda enggo putus asa,+
10 perban enggo begi kami sanga kena ndarat arah Mesir nari, ban Jahwe Laut Merah kerah i lebe-lebe kena.+ Begi kami ka maka bunuh kena dua raja kalak Amori i sebrang Lau Jordan eme Sihon+ ras Og.+
11 Sanga begi kami kerna si e, mbiar kel kami, janah lanai kami ergegeh ngelawan kena, sebap Jahwe Dibata kena kap ngenca Dibata si erkuasa i surga bage pe i doni.+
12 Gundari, ersumpahlah kena bas gelar Jahwe maka cidahken kena kekelengen si setia man keluarga bapakku perban aku pe enggo ncidahken kekelengen si setia man kena. Berekenlah man bangku sada tanda si jadi jaminen maka pasti tepati kena kata-kata kena e.
13 Pediat kenalah bapakku tetap nggeluh, mamakku, seninaku, turangku, bage pe kerina keluargaku. Selamatken min kami, ula pediat kami ibunuh.”+
14 Nina mata-mata e man Rahap, “Kesah kami jaminenna! Adi la ceritakenndu man ise pe kerna kami, buktiken kami pagi kekelengen si setia man bandu janah tepati kami janji kami sanga bereken Jahwe pagi negri enda man kami.”
15 Kenca si e, suruh Rahap kalak e nusur alu nali arah jendela, sebap rumahna lit bas tembok kota e.+
16 Kenca si e, nina man kalak e, “Laweslah kena ku daerah pegunungen janah cebunilah i je telu wari dekahna, gelah ula kena idat kalak si ngayaki kena e. Adi enggo mulih kari kalak e, banci terusken kena perdalanen kena.”
17 Nina mata-mata e man Rahap, “Pasti tepati kami sumpah kami man bandu,+
18 adi sanga reh kami pagi ku negri enda, nali megara enda enggo iketkenndu i jendela si arah e kami nusur. Kam bage pe bapakndu, mamakndu, turangndu, ras kerina keluarga bapakndu arus pulung bas rumah enda.+
19 Adi lit si mate perban ndarat arah rumahndu nari, e perban salahna, labo tanggung jawap kami. Tapi adi lit si mate amin pe tetap ia bas rumah enda, kami pagi si ertanggung jawap.
20 Tapi adi laporkenndu kami,+ bebas kami arah sumpah kami man bandu.”
21 Nina man kalak e, “Ue, setuju aku.”
Kenca si e suruhna kalak e lawes janah lawes kalak e. Jenari iketkenna nali si megara ndai i jendela e.
22 Emaka lawes mata-mata e ku daerah pegunungen janah tading kalak e i je telu wari dekahna, seh ngasa mulih kalak si ngayakisa. Kalak si ngayaki dua mata-mata e ndarami kalak e bas kerina dalan tapi la datna.
23 Nusur si dua kalak ndai arah daerah pegunungen janah sebrangi kalak e lau maler. Kenca si e, dahi kalak e Josua anak Nun janah ceritakenna man bana kerina si terjadi.
24 Kenca si e, nina kalak e man Josua, “Enggo bereken Jahwe kerina negri e man banta.+ Situhuna, kerina penduduk negri e enggo putus asa perban kita.”+
Cataten i teruh
^ Sinuan si ipake kalak Mesir guna erban kain linen.
