Josua 23:1-16
23 Ibere Jahwe man kalak Israel kedamen+ janah lanai kalak e iganggu musuh-musuh si lit i sekelilingna. Ertahun-tahun kenca si e, sanga Josua enggo metua janah ntisik nari ngenca ia nggeluh,+
2 pepulung Josua kerina kalak Israel,+ peminpin-peminpinna, kepala-kepalana, hakim-hakimna, ras pengawas-pengawasna,+ janah nina man kalak e, “Aku enggo metua janah ntisik nari ngenca aku nggeluh.
3 Enggo idah kena kerina perbahanen Jahwe man kerina bangsa-bangsa e guna kena, perban Jahwe Dibata kena kap si erperang guna kena.+
4 Enggo kubagi-bagiken+ taneh warisen man tiap suku eme taneh si ingani bangsa-bangsa si deban+ bage pe taneh kerina bangsa si enggo kukernepken,+ mulai Lau Jordan nari seh ku Laut Tengah* si lit i sebelah barat.*
5 Jahwe Dibata kena enggo mpelawes kalak e lebe-lebe kena nari.+ PelawesNa kalak e guna kena, janah buat kena taneh kalak e bagi janji Jahwe Dibata kena man kena.+
6 “Gundari arus kena paguh janah pang guna matuhi ras ndalanken kerina si tertulis bas Undang-Undang+ Musa. Ula kena nilah ku kanan ntah pe ku kiri.+
7 Ula kena erteman ras bangsa-bangsa+ si tading ras kena. Ula belasken kena gelar dibata-dibata kalak e+ ntah pe ersumpah bas gelarna, janah ula pernah sembah ntah pe mungkuk nembah ia.+
8 Tapi arus kena setia man Jahwe Dibata kena,+ bagi si enggo lakoken kena seh asa gundari.
9 Pasti pelawes Jahwe bangsa-bangsa si mbelin ras megegeh arah lebe-lebe kena nari,+ sebap la lit sekalak pe si ngasup naluken kena seh ngasa gundari.+
10 Sekalak saja pe kena banci mpelawes seribu kalak,+ sebap Jahwe Dibata kena si erperang guna kena,+ bagi janjiNa man kena.+
11 Emaka arus inget kena guna terus+ engkelengi Jahwe Dibata kena.+
12 “Tapi adi tadingken kena Dibata janah ikutken kena bangsa-bangsa si deban si tading denga ras kena,+ janah erteman meriah kena, bage pe erjabu kena ras kalak e,+
13 arus iteh kena maka Jahwe Dibata kena lanai pagi mpelawes bangsa-bangsa e arah lebe-lebe kena nari.+ Kalak e jadi jerat ras siding pagi man kena, jadi cambuk i gurung kena,+ jadi duri bas mata kena seh asa kena kernep arah negri si mejile si enggo ibere Jahwe Dibata kena man kena.
14 “Lanai ndekah mate me aku, enggo teh kena alu bulat ukur ras asa gegeh kena maka kerina si mehuli si janjiken Jahwe Dibata kena enggo tepatiNa. Kerina enggo terjadi. La lit sada pe si la tepatiNa.+
15 Bali bagi Jahwe Dibata kena enggo nepati kerina janjiNa si mehuli si enggo katakenNa man kena,+ bage ka pagi Jahwe erban cilaka engkenai kena bagi si pernah katakenNa. Janah kernepkenNa kena pagi arah taneh si mejile si enggo bereken Jahwe Dibata kena man kena.+
16 Adi langgar kena perjanjin Jahwe Dibata kena si enggo perentahkenNa gelah tepati kena, janah adi lawes kena nembah dibata-dibata si deban jenari mungkuk kena nembah ia, pasti merawa kel Jahwe man kena+ janah mis kena kernepkenNa arah taneh si mejile si enggo berekenNa man kena.”+
