Josua 24:1-33
-
Ituriken Josua mulihi kerna sejarah kalak Israel (1-13)
-
Kalak Israel isemangati guna ngelayani Jahwe (14-24)
-
“Aku ras keluargaku, Jahwe ngenca si sembah kami” (15)
-
-
Perjanjin Josua ras Israel (25-28)
-
Mate Josua janah ikuburken (29-31)
-
Tulan-tulan Jusup ikuburken i Sikem (32)
-
Mate Eleasar janah ikuburken (33)
24 Kenca si e pepulung Josua kerina suku Israel i Sikem janah lebuhna peminpin-peminpin Israel, kepala-kepalana, hakim-hakimna, ras pengawas-pengawasna,+ jenari tedis kalak e i lebe-lebe Dibata si benar.
2 Nina Josua man kerina kalak Israel, “Bagenda nina Jahwe Dibata Israel, ‘I sebrang Lau Eprat ah mbarenda+ nini bulang kena tading,+ termasuk Terah bapak Abraham ras Nahur, janah sembah kalak e dibata-dibata si deban.+
3 “‘Kenca si e Kupilih nini bulang kena Abraham+ arah sebrang Lau Eprat nari, jenari Kusuruh kelilingina kerina negri Kanaan. Kuban keturunenna jadi enterem+ janah Kubereken Isak man Abraham.+
4 Man Isak Kubereken Jakup ras Esau.+ Man Esau Kubereken Gunung Seir,+ tapi Jakup ras anak-anakna lawes ku Mesir.+
5 Ertahun-tahun kenca si e, Kuutus Musa ras Harun+ ku Mesir janah Kuban Mesir kena bencana+ jenari Kubaba kena ndarat arah Mesir.
6 Sanga Kubaba nini bulang kena ndarat arah Mesir nari+ janah seh kalak e i laut, ayaki kalak Mesir nini bulang kena e alu gereta perang ras pasuken si erkuda seh ku Laut Merah.+
7 Kenca si e erlebuh kalak e mindo penampat man Jahwe,+ emaka Kuban embun si gelap i antara kalak e ras kalak Mesir, jenari Kugedapken kalak Mesir i laut.+ Enggo idah kena kai si Kulakoken i Mesir.+ Kenca si e tading kena i taneh mesawang* ertahun-tahun dekahna.+
8 “‘Dung e Kubaba kena ku negri kalak Amori si tading i sebrang* Lau Jordan janah serang kalak e kena.+ Tapi Kuserahken kalak e ku tan kena gelah banci rebut kena negri kalak e, jenari Kukernepken kalak e arah lebe-lebe kena nari.+
9 Kenca si e Balak anak Sipor raja Moap reh nyerang kalak Israel. Lebuhna Bilham anak Beor guna numpahi kena.+
10 Tapi la Kubegiken Bilham.+ Emaka mulih-ulih kena ipasu-pasuna+ janah Kuselamatken kena arah tanna nari.+
11 “‘Kenca si e sebrangi kena Lau Jordan+ janah seh kena i Jeriho.+ Jenari peminpin-peminpin* Jeriho, kalak Amori, kalak Peris, kalak Kanaan, kalak Het, kalak Girgasi, kalak Hewi, ras kalak Jebusi erperang ngelawan kena, tapi Kuserahken kalak e ku tan kena.+
12 Ope lenga kena reh, enggo Kuban kalak e lanai semangat* janah Kuban kalak e kiam arah lebe-lebe kena nari,+ bali bagi si terjadi man dua raja kalak Amori. Enda terjadi labo perban pedang ntah pe panah kena.+
13 Bage me taneh enda Kubereken man kena janah la perlu latih kap kena ndatkenca. Kubereken ka kota-kotana si labo kena mbangunca,+ jenari tading kena i je. Pan kena hasil kebun anggur ras kebun saitun si labo kena nuanca.’+
14 “Emaka mbiarlah man Jahwe, layanilah Ia bas kebenaren ras layani alu setia.+ Kernepkenlah dibata-dibata si ilayani nini bulang kena i sebrang Lau Eprat ras i Mesir,+ janah sembahlah Jahwe.
15 Gundari adi la mehuli akap kena nembah Jahwe, pilihlah ise si sembah kena.+ Nembah dibata-dibata si isembah nini bulang kena i sebrang Lau Eprat+ ntah nembah dibata-dibata kalak Amori si bas tanehna kena tading.+ Tapi aku ras keluargaku, Jahwe ngenca si sembah kami.”
16 Nina kalak e njawapsa, “La pernah lit bas ukur kami nadingken Jahwe guna ngelayani dibata-dibata si deban.
17 Jahwe Dibatata kap si maba kita ras nini bulangta ndarat arah negri Mesir nari,+ arah rumah perbudaken.+ Janah cidahkenNa ka mukjizat si luar biasa+ jenari terus jagaNa kita gedang-gedang dalan bage pe arah kerina bangsa si enggo silewati.+
18 Jahwe kap si mpelawes kerina bangsa e, termasuk mpelawes kalak Amori si mbarenda tading i negri enda. Emaka kami pe, Jahwe ate kami sembah kami, sebap Ia kap Dibatata.”
19 Kenca si e nina Josua man bangsa e, “Mungkin labo kena ngasup nembah Jahwe, sebap Ia Dibata si badia.+ Ia saja ngenca ateNa isembah.+ Adi la bage ban kena, labo ampuniNa kesalahen* ras dosa-dosa kena.+
20 Adi tadingken kena Jahwe janah sembah kena dibata-dibata si deban, pasti kena ilawanNa janah kernepkenNa kena, amin gia mehuli Ia mbarenda man kena.”+
21 Tapi nina bangsa e man Josua, “Labo, Jahwe ngenca pagi sembah kami!”+
22 Emaka nina Josua man bangsa e, “Kena si jadi saksina maka enggo pilih kena nembah Jahwe.”+ Nina kalak e njawapsa, “Ue, kami saksina.”
23 “Adi bage, ambekkenlah dibata-dibata si deban si lit i sekeliling kena, janah layanilah Jahwe Dibata Israel alu bulat ukur.”
24 Nina bangsa e man Josua, “Pasti sembah kami Jahwe Dibatata, janah dalanken kami kai si katakenNa!”
25 Emaka bas wari e, ban Josua perjanjin ras kalak e janah tetapkenna peraturen ras undang-undang man kalak e i Sikem.
26 Kenca si e tulis Josua kata-kata e bas buku Undang-Undang Dibata.+ Buatna sada batu si galang+ janah tamakenna i teruh batang kayu si galang i deher ingan Jahwe si badia.
27 Jenari nina Josua man kalak e kerina, “Batu enda jadi saksi man banta,+ sebap enggo begi batu e kerina si kataken Jahwe man banta, janah enda pagi si jadi saksi man kena, alu bage tetap kena setia janah la tadingken kena Dibatata.”
28 Kenca si e suruh Josua kalak e lawes ku taneh warisenna masing-masing.+
29 Kenca si e mate Josua anak Nun pelayan Jahwe e. Mate ia bas umur 110 tahun.+
30 Emaka ikuburken kalak e ia bas taneh warisenna i Timnat Sera+ si lit i daerah pegunungen Eperaim, i sebelah utara Gunung Gaas.
31 Terus sembah kalak Israel Jahwe segedang geluh Josua bage pe segedang geluh peminpin-peminpin si nggeluh denga kenca Josua mate, ras si meteh kerina perbahanen Jahwe man kalak Israel.+
32 Tulan-tulan Jusup+ si ibaba kalak Israel ndarat arah Mesir nari ikuburken i Sikem i taneh si tukur Jakup alu erga 100 logam pirak+ arah anak-anak Hamor+ bapak Sikem. Taneh e jadi warisen keturunen Jusup.+
33 Eleasar anak Harun pe mate.+ Emaka kuburken kalak e Eleasar i Bukit Pinehas i daerah pegunungen Eperaim, si enggo ibereken man anakna eme Pinehas.+
Cataten i teruh
^ Taneh si mbelang si jarang iingani.
^ Maksudna, sebelah timur.
^ Ntah banci saja “si mpuna taneh.”
^ Ntah banci saja “kalak e panik; kalak e mbiar.”
^ Ntah “pemberontaken.”
