Josua 3:1-17
-
Isebrangi kalak Israel Lau Jordan (1-17)
3 Erpagi-pagi si lampas medak Josua. Kenca si e lawes ia ras kerina kalak Israel arah Sitim nari+ janah seh kalak e i Lau Jordan. Erberngi kalak e i je sope lenga nyebrang.
2 Kenca telu wari, lawes peminpin-peminpin+ Israel ku kerina perkemahen,
3 janah nina man bangsa e, “Adi idah kena kari angkat imam-imam Lewi Peti Perjanjin* Jahwe Dibata kena,+ berkatlah kena janah ikutkenlah kalak e.
4 Tapi atur jarak kena kira-kira 890 meter* arah pudi Peti e nari. Ula kena ndehersa ku Peti e gelah teh kena ku ja arus erdalan, perban lenga pernah lewati kena dalan e.”
5 Nina Josua man bangsa e, “Pebadialah diri kena,+ sebap pagi iban Jahwe perbahanen si luar biasa guna kena.”+
6 Kenca si e nina Josua man imam-imam, “Angkat kenalah Peti Perjanjin e+ janah erdalanlah kena i lebe-lebe bangsa e.” Emaka lakoken kalak e bagi si perentahken Josua.
7 Kenca si e nina Jahwe man Josua, “Mulai wari enda Kuban kam ihamati i lebe-lebe kerina kalak Israel,+ gelah teh kalak e maka Aku ras kam+ bagi Aku enggo ras Musa.+
8 Arus perentahkenndu man imam-imam si maba Peti Perjanjin e: ‘Sanga seh pagi kena i tepi Lau Jordan, masuklah ku bas lau e janah tedislah i je.’”+
9 Kenca si e nina Josua man kalak Israel, “Mari ku jenda janah begikenlah kata-kata Jahwe Dibata kena.”
10 Kenca si e nina Josua, “Teh kena pagi maka Dibata si nggeluh lit i tengah-tengah kena,+ janah pasti pelawesNa kalak Kanaan, kalak Het, kalak Hewi, kalak Peris, kalak Girgasi, kalak Amori, ras kalak Jebusi arah lebe-lebe kena nari.+
11 Nenlah! Peti Perjanjin Tuhan eme Tuhan sebelang doni ngelebei kena masuk ku Lau Jordan.
12 Gundari pilihlah 12 dilaki arah suku-suku Israel, sekalak arah tiap suku.+
13 Kenca imam-imam si maba Peti Perjanjin Jahwe eme Tuhan sebelang doni, ndedehken nahena ku bas Lau Jordan, lau e pasti kari lanai maler tapi pulung lau e tempa-tempa bagi dingding.”*+
14 Emaka berkat bangsa e arah perkemahenna nyebrangi Lau Jordan. Imam-imam si maba Peti Perjanjin+ si leben erdalan asangken kalak e.
15 (Paksa si e sangana musim rani janah sangana galang Lau Jordan.)+ Kenca imam-imam si maba Peti Perjanjin e seh i tepi Lau Jordan janah perjakkenna nahena ku lau e,
16 minter ngadi lau e maler arah gugung nari. Pulung lau e tempa-tempa bagi dingding* bas ingan si ndauh eme i kota Adam deher Saretan. Janah lau si maler ku berneh* eme ku Laut Araba ntah pe Laut Mati* enggo reh kerahna. Emaka bangsa e banci nyebrang i lebe-lebe Jeriho perban launa lanai maler.
17 Imam-imam si maba Peti Perjanjin Jahwe tetap tedis i datas taneh si kerah+ i tengah-tengah Lau Jordan. Sanga si e, kerina kalak Israel nyebrang i datas taneh si kerah+ janah dungna seh i sebrang Lau Jordan.
Cataten i teruh
^ Ntah “Peti Perpadanen.”
^ As. “itambak; ibendung.”
^ As. “itambak; ibendung.”
^ Ntah “suah.”
^ Ntah “Laut Garam.”
