Josua 4:1-24
-
Batu-batu si jadi penginget (1-24)
4 Kenca dung kerina bangsa e nyebrangi Lau Jordan, nina Jahwe man Josua,
2 “Pilihlah 12 dilaki arah kalak Israel, sekalak arah tiap suku,+
3 janah kataken man kalak e, ‘Buatlah 12 batu arah tengah-tengah Lau Jordan, eme arah ingan imam-imam e tedis.+ Jenari baba batu e janah i ja kari kena erberngi, i je susun batu e.’”+
4 Emaka lebuh Josua 12 dilaki si enggo pilihna arah kalak Israel, sekalak arah tiap suku,
5 janah nina Josua man kalak e, “Erdalanlah kena ku tengah-tengah Lau Jordan, ku lebe-lebe Peti Perjanjin* Jahwe Dibata kena. Arus buat kena tersada batu menurut jumlah suku kalak Israel jenari baba batu e bas bara kena,
6 guna jadi tanda man kena. Adi nungkun pagi anak-anak kena, ‘Engkai maka lit batu enda i jenda?’+
7 bagendalah ning kena man kalak e, ‘Perban Lau Jordan ngadi maler i lebe-lebe Peti+ Perjanjin Jahwe. Launa ngadi maler sanga Peti Perjanjin ibaba ngelewati lau e. Batu-batu enda jadi penginget man bangsa Israel seh rasa lalap.’”+
8 Emaka lakoken kalak Israel me bagi si perentahken Josua. Buat kalak e 12 batu arah tengah-tengah Lau Jordan menurut jumlah suku kalak Israel, bagi si perentahken Jahwe arah Josua. Baba kalak e batu ndai ku ingan kalak e erberngi jenari susunna i je.
9 Susun Josua ka 12 batu si deban i tengah-tengah Lau Jordan, bas ingan imam-imam si maba Peti Perjanjin e tedis.+ I je denga batu-batu e seh ngasa gundari.
10 Imam-imam si maba Peti Perjanjin tetap tedis i tengah-tengah Lau Jordan seh ngasa dung ilakoken bangsa e kerina perentah Jahwe arah Josua, eme kerina si perentahken Musa man Josua. Sanga si e, pedas-pedas bangsa e nyebrang.
11 Kenca kerina kalak Israel seh i sebrang, Peti Perjanjin Jahwe ras imam-imam pe ikut nyebrang i lebe-lebe bangsa e.+
12 Suku Ruben, suku Gat, bage pe setengah arah suku Manase nyebrang menurut barisen perang+ ngelebei kalak Israel, bagi si perentahken Musa man kalak e.+
13 Lit kira-kira 40.000 prajurit si enggo ersikap erperang lawes nyebrang i lebe-lebe Jahwe ku Gurun Pasir Jeriho.
14 Bas wari e, iban Jahwe gelah Josua iergai i lebe-lebe kalak Israel.+ Ergai kalak e kel ia segedang geluhna, bagi kalak e ngergai Musa.+
15 Kenca si e nina Jahwe man Josua,
16 “Suruh imam-imam si maba Peti+ Perjanjin ndarat arah Lau Jordan nari.”
17 Emaka nina Josua man imam-imam e, “Ndaratlah kena arah Lau Jordan nari.”
18 Sanga imam-imam si maba Peti+ Perjanjin Jahwe ndarat arah tengah-tengah Lau Jordan nari janah perjakken kalak e nahena ku taneh si kerah, mis maler mulihi Lau Jordan janah galang launa+ bagi sebelumna.
19 Isebrangi bangsa e Lau Jordan bas wari si pe-10-ken bas bulan si pertama. Erkemah kalak e i Gilgal+ bas perbatasen Jeriho sebelah timur.
20 Isusun Josua 12 batu si ibuat kalak e arah Lau Jordan nari i Gilgal.+
21 Kenca si e nina man kalak Israel, “Adi sungkun anak-anak kena pagi kena, ‘Kai ertina batu-batu enda?’+
22 bagendalah ning kena man anak-anak kena, ‘Bangsa Israel nyebrangi Lau Jordan i datas taneh si kerah.+
23 Sanga si e Jahwe Dibatata erban kerah Lau Jordan i lebe-lebe bangsa e seh ngasa dung kalak e nyebrang. Bagi sanga Jahwe Dibatata erban kerah Laut Merah i lebe-lebe kami seh ngasa dung kami nyebrang.+
24 IbanNa bage gelah kerina bangsa i doni meteh maka tan Jahwe seh kel gegehna+ janah gelah terus kita mbiar man Jahwe Dibatata.’”
Cataten i teruh
^ Ntah “Peti Perpadanen.”
