Josua 5:1-15
5 Kerina raja kalak Amori+ si lit i sebelah barat Lau Jordan ras kerina raja kalak Kanaan+ si lit i tepi laut enggo megi maka kerah ban Jahwe Lau Jordan i lebe-lebe kalak Israel seh asa kerina kalak e nyebrang. Emaka mbiar kel kalak e+ janah lanai ergegeh perban kalak Israel.+
2 Sanga si e nina Jahwe man Josua, “Banlah piga-piga piso arah batu api nari janah sunat+ sekali nari kalak Israel si dilaki.”
3 Emaka ban Josua piga-piga piso arah batu api nari, jenari sunatna kalak Israel si dilaki i Gibeat-haaralot.*+
4 Enda alasenna engkai maka isunat Josua kalak e: Kerina dilaki bas bangsa e si ndarat arah Mesir eme kerina prajurit* enggo mate bas perdalanen i taneh mesawang.*+
5 Kerina kalak si ndarat arah Mesir nari enggo isunat, tapi kerina si lahir bas perdalanen sanga i taneh mesawang* eme kenca kalak e ndarat arah Mesir nari lenga isunat.
6 Lit 40 tahun dekahna kalak Israel erdalan+ bas taneh mesawang* seh ngasa kerina bangsa e mate, eme prajurit si ndarat arah Mesir nari si la patuh man kata-kata Jahwe.+ Ersumpah Jahwe man kalak e maka labo pagi pernah idah kalak e negri si janjiken+ Jahwe alu sumpah man nini bulang kalak e guna ibereken man umatNa,*+ eme negri si melala kel i je susu ras madu.+
7 Emaka anak-anak kalak e si nggantikenca.+ Anak-anak kalak e si isunat Josua, perban kalak e lenga isunat sanga bas perdalanen e.
8 Kenca dung kerina bangsa e isunat, tetap kalak e tading bas perkemahen seh ngasa kalak e malem.
9 Kenca si e nina Jahwe man Josua, “Wari enda enggo Kuagui arah kena hinan si iban kalak Mesir.” Emaka seh asa gundari ingan e igelari Gilgal.*+
10 Kalak Israel tetap erkemah i Gilgal. Bas wari si pe-14-ken bas bulan e,+ rayaken kalak e Paskah sanga berngi i Gurun Pasir Jeriho.
11 Sada wari kenca rayaken kalak e Paskah, mulai pan kalak e hasil juma arah negri e. Bas wari e, pan kalak e roti si la itama ragi+ ras biji-bijin* si ipanggang.
12 Kenca ipan bangsa Israel hasil juma arah negri e, paginna manna lanai ipenusur man kalak e.+ Bas tahun e, mulai pan kalak e hasil juma arah negri Kanaan.+
13 Sanga Josua i deher kota Jeriho, idahna sekalak dilaki+ si njemak pedang tedis i lebe-lebena.+ Deheri Josua ia janah sungkunna, “Kam arah pihak ise? Pihak kami ntah pihak musuh?”
14 Nina ngaloi, “Aku sekalak panglima* pasuken malekat Jahwe.”+ Megi si e sujud Josua janah nina, “Kai atendu si lakoken budakndu enda, Tuan?”
15 Nina panglima pasuken malekat Jahwe e man Josua, “Lepasken selopndu ena perban kam sangana tedis bas ingan si badia.” Mis iban Josua bage.+
Cataten i teruh
^ Ertina “Bukit Kulit Sunaten.”
^ Ntah “dilaki si umurna cocok erperang.”
^ Taneh si mbelang si jarang iingani.
^ Taneh si mbelang si jarang iingani.
^ As. “man banta.”
^ Taneh si mbelang si jarang iingani.
^ Ertina “Guling-Guling.”
^ Ntah “peminpin.”
