Josua 8:1-35
8 Kenca si e nina Jahwe man Josua, “Ula mbiar ntah pe gentar.+ Babalah kerina prajurit janah berkatlah ngelawan Ai. Enggo Kuserahken raja Ai, rakyatna, kotana, ras negrina man bandu.+
2 Banlah man Ai ras rajana bagi si ban kena man Jeriho ras rajana.+ Tapi barang-barang ras asuh-asuhen banci jadi jang kena. Suruh pasuken cebuni i belakang kota e gelah banci mis serang kalak e.”
3 Emaka lawes Josua bage pe kerina prajurit nyerang Ai. Pilih Josua 30.000 prajurit si megegeh janah suruhna kalak e lawes sanga berngi.
4 Perentahkenna kalak e, nina, “Cebunilah kena i pudi kota guna nyerang kalak Ai. Ula kena ndauhsa arah kota nari, janah kerina kena arus enggo ersikap katawari pe guna nyerang.
5 Aku ras kerina kalak si lit ras aku ndeheri kota e kari, janah sanga ndarat ka kalak e guna nyerang kami bagi si sebelumna,+ kiam kari kami.
6 Sanga ayaki kalak e kami, ban kami gelah ndauh kalak e arah kota nari, perban pasti akap kalak e kiam kami bagi si sebelumna.+ Bage kari ban kami.
7 Kenca si e arus kena ndarat arah ingan kena cebuni janah rebutlah kota e. Jahwe Dibata kena pasti mereken kota e man kena.
8 Kenca rebut kena kota e, arus tutung kena.+ Arus lakoken kena bagi si kataken Jahwe. Enda me perentahku man kena.”
9 Kenca si e suruh Josua kalak e lawes. Jenari lawes kalak e ku ingan kalak e cebuni si lit antara Betel ras Ai, i sebelah barat Ai, tapi Josua erberngi ras bangsa e.
10 Paginna sanga erpagi-pagi, lampas Josua medak, janah pepulungna prajurit-prajurit. Kenca si e, ia ras peminpin-peminpin Israel mabai kalak e ku Ai.
11 Kerina prajurit+ si lit ras ia erbaris janah lawes ku lebe-lebe kota e. Jenari erkemah kalak e i sebelah utara Ai janah lit lembah antara ingan kalak e ras Ai.
12 Paksa si e, enggo tugasken Josua kira-kira 5.000 dilaki si cebuni guna nyerang,+ kalak e cebuni i antara Betel+ ras Ai, i sebelah barat kota e.
13 Emaka, prajurit si utama erkemah i sebelah utara kota,+ janah prajurit si cebuni erkemah i sebelah barat kota.+ Berngina, lawes Josua ku tengah-tengah lembah.
14 Kenca idah raja Ai kerna si e, bas pagi-pagi si lampas, ia ras dilaki-dilaki si lit i kota e pedas-pedas lawes nyerang kalak Israel bas sada ingan i lebe-lebe gurun pasir. Tapi, la tehna lit pasuken si enggo ersikap guna nyerang ia si cebuni i pudi kota.
15 Sanga reh kalak Ai nyerang, kiam Josua ras kerina kalak Israel ku taneh mesawang.*+
16 Kenca si e, kerina kalak si lit bas kota iperentahken ngayaki kalak e. Janah sanga ayaki kalak e Josua, reh dauhna kalak e arah kota nari.
17 Kerina dilaki si lit bas Ai ras Betel enggo ndarat ngayaki kalak Israel. Janah tadingken kalak e kota e talang-talang.
18 Nina Jahwe man Josua, “Arahkenlah lembing si lit bas tanndu ena ku Ai,+ sebap enggo Kuserahken kota e man bandu.”+ Emaka arahken Josua lembing si lit bas tanna ku kota e.
19 Kenca arahken Josua lembing si lit bas tanna, pasuken si cebuni e mis ndarat arah inganna cebuni nari janah kiam kalak e ku kota jenari rebutna kota e. Janah mis tutung kalak e kota e.+
20 Sanga tulihken kalak Ai ku pudi, idah kalak e asap nangkih ku langit arah kota e nari, emaka lanai kalak e ngasup kiam ku japa pe. Kenca si e kalak Israel si kiam ku taneh mesawang* mutar balik ngayaki kalak e.
21 Sanga Josua ras kerina kalak Israel ngidah pasuken si cebuni enggo ngerebut kota e janah enggo idah kalak e ka asap nangkih arah kota e nari, mulihken kalak e guna nyerang kalak Ai.
22 Pasuken si cebuni ndai ndarat arah kota guna nyerang kalak Ai, emaka kalak Ai enggo ikepung kalak Israel, sada arah jenda janah sada nari arah jah. Jenari bunuh kalak Israel kalak Ai seh ngasa la lit sada pe si selamat ntah pe kiam.+
23 Tapi tangkap kalak e raja Ai+ nggeluh-nggeluh, jenari babana man Josua.
24 Bunuh kalak Israel kerina prajurit Ai si ngayaki kalak e bas taneh mesawang* seh ngasa lanai lit si tading. Kenca si e, mulihken kerina kalak Israel ku Ai janah serangna kota e alu pedang.
25 Kerina kalak Ai si mate bas wari e, dilaki bage pe diberu, lit 12.000 kalak.
26 La penusur Josua tanna,+ lalap arahkenna lembing e ku kota Ai seh ngasa keri kerina penduduk Ai ibunuh.+
27 Tapi buat kalak Israel asuh-asuhen ras erta si lit bas kota e jadi jang kalak e, bagi si perentahken Jahwe man Josua.+
28 Kenca si e tutung Josua me Ai janah kota e jadi runtuhen batu+ seh ngasa gundari.
29 Gantungna raja Ai i tiang* seh ngasa ben, janah sanga nandangi terbenam matawari, perentahken Josua gelah ipenusur mayat e arah tiang nari.+ Kenca si e benterken kalak e mayat e ku gerbang kota janah tamaken kalak e batu ku datasna seh ngasa ergun-gun. Batu si ergun-gun e lit denga seh ngasa gundari.
30 Kenca si e ibangun Josua ingan nutung* persembahen man Jahwe Dibata Israel i Gunung Ebal,+
31 bagi si perentahken Musa pelayan Jahwe man kalak Israel ras bagi si tertulis bas Undang-Undang+ Musa, eme “batu si ipake guna ingan nutung persembahen e eme batu si la pernah kena alat-alat besi.”+ I datas ingan nutung persembahen e, tutung kalak e persembahen tutungen ras korban persadan man Jahwe.+
32 Kenca si e tulis Josua mulihi i datas batu-batu, Undang-Undang+ si itulis Musa i lebe-lebe kalak Israel.+
33 Kerina kalak Israel, peminpin-peminpin kalak e, pengawas-pengawas, bage pe hakim-hakim kalak e tedis i sebelah Peti Perjanjin,* sada sebelah jenda sada nari sebelah jah, i lebe-lebe imam-imam Lewi si maba Peti Perjanjin Jahwe. Kalak Israel bage pe penduduk asing lit i je.+ Setengah arah kalak e tedis i lebe-lebe Gunung Gerisim, janah setengah nari i lebe-lebe Gunung Ebal+ (bagi si enggo pernah iperentahken Musa pelayan Jahwe),+ guna masu-masu kalak Israel.
34 Kenca si e bacaken Josua alu sora megang kerina isi Undang-Undang e,+ kerna pasu-pasu+ ras kerna sumpah,+ menurut kerina si tertulis bas Undang-Undang e.
35 La lit sada kata pe arah perentah Musa e la bacaken Josua i lebe-lebe kerina kalak Israel.+ Si ikut pulung i je eme diberu, anak-anak, bage pe penduduk asing+ si tading i tengah-tengah kalak e.+
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Ntah “batang kayu.”
^ Ntah “Peti Perpadanen.”
