Josua 9:1-27
9 Berita kerna kai si terjadi e enggo ibegi kerina raja si lit i sebelah barat Lau Jordan+ eme raja kalak Het, kalak Amori, kalak Kanaan, kalak Peris, kalak Hewi, ras raja kalak Jebusi.+ Kalak e raja-raja si lit i daerah pegunungen, i Sepela, i tepi Laut Tengah,*+ ras i lebe-lebe Libanon.
2 Ersada kalak e kerina ngelawan Josua ras kalak Israel.+
3 Penduduk Gibeon+ pe enggo megi kerna kai si lakoken Josua man Jeriho+ ras Ai.+
4 Emaka ban kalak e tindaken si cerdik. Tamaken kalak e bekalna ku guni si enggo male bage pe ku kantong kulit si enggo male ras si enggo itambal jenari tamana ku datas kelede.
5 Ipake kalak e ka baju si male bage pe selop si male si melala tambalna. Kerina roti si baba kalak e enggo kerah ras pecah-pecah.
6 Kenca si e lawes kalak e ndahi Josua bas perkemahen i Gilgal+ janah nina kalak e man Josua bage pe man kalak Israel, “Kami reh arah ingan si ndauh. Banlah perjanjin ras kami.”
7 Tapi nina kalak Israel e man kalak Hewi e,+ “Ntah ndeher nge ingan kena tading? Emaka labo mungkin ban kami perjanjin ras kena.”+
8 Nina kalak e man Josua, “Kami budak-budakndu.”
Emaka nina Josua man kalak e, “Ise kin kena? Ja nari kena?”
9 Nina kalak e man bana, “Budak-budakndu enda reh arah ingan si seh kel dauhna,+ sebap enggo begi kami kerna gelar Jahwe Dibata kena, kuasaNa, bage pe kerna kerina si enggo lakokenNa i Mesir.+
10 Begi kami ka kerina si enggo lakokenNa man dua raja kalak Amori si lit i sebrang* Lau Jordan, eme Raja Sihon+ arah Hesbon ras Raja Og+ arah Basan si tading i Astera.
11 Emaka peminpin-peminpin kami ras kerina penduduk negri kami nuruh kami maba bekal jenari lawes ndahi kena. Suruh kalak e kami ngataken man kena, ‘Kami enda budak-budakndu.+ Banlah perjanjin ras kami.’+
12 Sanga berkat kami arah rumah nari ku jenda, roti si baba kami enda melas denga. Gundari nen min roti e, enggo kerah janah enggo pecah-pecah.+
13 Kantong kulit enda pe mbaru denga sanga isi kami, tapi gundari enggo merigat.+ Baju ras selop kami pe enggo male perban dauhna perdalanen kami.”
14 Kenca si e pereksa kalak Israel roti si baba kalak e ndai, tapi la sungkun kalak e Jahwe.+
15 Emaka erdame Josua ras kalak e+ janah banna perjanjin ras kalak e gelah tetap kalak e nggeluh. Peminpin-peminpin Israel pe ersumpah guna nepati janji e.+
16 Telu wari kenca perjanjin e iban, ibegi kalak Israel kepeken ndeher ingan kalak e tading ras kalak Israel eme i sekitar kalak e.
17 Kenca si e lawes kalak Israel ndahi kota-kota kalak e janah seh bas wari si peteluken. Kota-kota e eme Gibeon,+ Kepira, Beerot, ras Kiryat Jearim.+
18 Tapi la serang kalak Israel kalak e, perban enggo ersumpah peminpin-peminpin Israel man kalak e bas gelar Jahwe+ Dibata Israel. Emaka kerina kalak Israel jungut-jungut man peminpin-peminpin e.
19 Nina peminpin-peminpin e man kalak Israel, “La banci siserang kalak e perban enggo ersumpah kami man kalak e bas gelar Jahwe Dibata Israel.
20 Bagenda kari silakoken man kalak e: Sipediat saja kalak e nggeluh, gelah ula merawa Dibata man banta perban enggo ersumpah kami man kalak e.”+
21 Nina peminpin-peminpin e ka man kalak Israel, “Pediat saja kalak e nggeluh, tapi suruh kalak e si mpepulung ranting ras si muat lau man kerina kalak Israel.” Enda me janji peminpin-peminpin e man kalak e.
22 Emaka lebuh Josua kalak Gibeon, janah nina, “Engkai maka buali kena kami? Kataken kena ndauh kel ingan kena tading, padahal ndeher nge.+
23 Mulai gundari nari kena sumpah me kena,+ janah lalap kena jadi budak guna mpepulung ranting ras muat lau man rumah Dibataku.”
24 Nina kalak e man Josua, “Enggo teh budak-budakndu enda maka Jahwe Dibata kena enggo merentahken Musa pelayanNa guna mereken kerina negri enda man kena janah engkernepken kerina pendudukna arah lebe-lebe kena nari.+ Bage ban kami perban mbiar kami bunuh kena.+
25 Gundari, kami lit bas kuasandu. Banlah man kami kai pe si mehuli ras si benar akap kena.”
26 Bage me si iban Josua man kalak e. Selamatkenna kalak e, emaka kalak e la ibunuh kalak Israel.
27 Tapi mulai bas wari e, suruh Josua kalak e mpepulung ranting ras muat lau man kalak Israel+ bage pe man ingan nutung* persembahen man Jahwe bas ingan si enggo pilihNa,+ janah e tetap lakoken kalak e seh ngasa gundari.+
