Judas 1:1-25
1 Arah Judas nari, sekalak budak Jesus Kristus ras senina Jakup.+ Surat enda man kalak si ipilih+ eme si keleng ate Dibata, Bapakta, janah ilindungi guna Jesus Kristus:+
2 Mbera-mbera reh belinna dat kena perkuah ate, kedamen, ras kekelengen.
3 Turang senina si kukelengi, situhuna ateku nulisken surat man kena kerna keselamaten si enggo radu kita ndatkenca.+ Tapi pentingen kuakap nulis surat si ngiahken kena guna mperjuangken kiniteken+ si enggo ibereken man kerina kalak si badia sekali seh rasa lalap.
4 Sebap lit piga-piga kalak si enggo masuk ku tengah-tengah kena si mbarenda nari enggo itentuken Kitap si Badia guna ihukum. La hamati kalak e Dibata, perban banna kiniulin Dibatata si luar biasa jadi alasen guna ngelakoken perbahanen si la meteh mela.*+ Kalak e terbukti la setia man Tuanta, Jesus Kristus.+
5 Amin pe enggo teh kena kerina enda, kuingetken ateku kena maka kenca selamatken Jahwe* umatNa arah Mesir,+ kernepkenNa kalak si la erkiniteken.+
6 Janah lit malekat-malekat si nadingken dahinna ras inganna si arusna i surga.+ Igariken Dibata ia kerina seh rasa lalap bas ingan si seh kel gelapna guna ihakimi bas wari si mbelin.+
7 Bage ka pe Sodom, Gomora, ras kota-kota si lit i sekelilingna ngelakoken perbahanen seks si salah* janah ngayaki sura-sura daging si salah.+ Kalak e ihukum alu api si la banci mate* janah enda jadi persinget man banta.+
8 Amin pe bage, kalak si masuk ku tengah-tengah kena e meriah kapna mbayangken kai si la mehuli, erdosa man dagingna, la ergaina kalak si minpin ia, janah hinana kalak si mulia.+
9 Sanga Mikael,+ peminpin malekat,+ ersoal ras Iblis kerna mayat Musa,+ la ia pang ngakimi Iblis alu kata-kata si kasar,+ tapi nina, “Jahwe* sajalah si ngakimi* kam.”+
10 Kalak si masuk ku tengah-tengah kena, hinana kerina si la angkaina.+ Perukurenna ras kerina perbahanenna bagi binatang.+ Enda ncedai kalak e.
11 Cilaka kalak e, sebap usihna Kain+ janah kurang ter kapna ngusih perbahanen Bilham+ si salah guna ndatken upah. Ikernepken pagi kalak e perban rananna si mberontak+ bagi Korah!+
12 Kalak e ikut bas acara man-man si ban kena guna mbuktiken kekelengen+ man turang senina. Situhuna kalak e bagi batu si terbuni bas lau, bagi permakan-permakan si mentingken beltekna saja si la mbiar man Dibata.+ Bagi embun si embus angin ku jah ku je tapi la mereken udan.+ Bagi batang kayu si la erbuah bas musimna, si enggo tuhu-tuhu mate* janah icabut seh ku uratna.
13 Bagi gelombang si galang si rugup i laut si ncidahken perbahanenna si man kemelanken.+ Bagi bintang-bintang si la erdalan bas dalanna, si enggo itetapken bas ingan si seh kel gelapna rasa lalap.+
14 Enoh+ keturunen Adam si pepituken, ernubuat kerna kalak e, nina, “Nenlah! Reh Jahwe* ras puluhen ribu malekatNa si badia+
15 guna ngakimi kerina kalak,+ janah ngukum kerina kalak si erdosa si la mehamat man baNa, perban jahat perbahanen kalak e janah hina kalak e Ia.”+
16 Kalak si bage rusur jungut-jungut,+ la ia puas man geluhna, sura-surana saja si ikutkenna,+ tual ngerana, puji-pujikenna kalak gelah datna keuntungen.+
17 Tapi kena o turang senina si kukelengi, ingetlah kai si enggo pernah ikataken rasul-rasul Tuanta Jesus Kristus.
18 Mbarenda bagenda nina man kena, “Bas wari-wari pendungi pagi, lit kalak si hinana kena, si ngikutken sura-surana si la mehuli.”+
19 Kalak e si erban perpecahen+ janah kalak e bagi binatang, la lit kesah si badia bas ia.
20 Tapi kena o turang senina si kukelengi, bangunlah kiniteken kena si seh kel badiana e, janah ertotolah alu kesah si badia.+
21 Alu bage, tetap kena bas kekelengen Dibata+ janah kena nimai perkuah ate Tuanta Jesus Kristus si mereken kegeluhen si rasa lalap.+
22 Selain si e, teruslah buktiken perkuah ate kena+ man kalak si ragu-ragu,+
23 selamatken kalak e+ alu narik ia ndarat arah api nari. Teruslah rate mekuah man kalak si deban janah hati-hati. Segat min ate kena uisna si enggo melket perban sura-sura dagingna si dem alu dosa.+
24 Banci lindungi Dibata kena gelah la tertuktuk. Banci babaNa kena ku lebe-lebe Dibata si mulia alu keriahen ukur si mbelin janah la lit cacatna.+
25 Ia ngenca Dibata, Si Nelamatken kita arah Jesus Kristus Tuanta. Ia ngenca si lit hakNa merentah janah man baNalah kemulian, gegeh, ras kuasa, mbarenda nari, gundari, janah seh rasa lalap. Amin.