Juna 1:1-17
1 Reh kata Jahwe man Juna*+ anak Amittai, nina,
2 “To, laweslah ku Niniwe+ kota si mbelin e, umumken berita penghukumen man kalak e, sebap enggo Kuidah uga jahatna perbahanen kalak e.”
3 Tapi kiam Juna arah Jahwe nari ku Tarsis. Lawes ia ku Jope janah dapetina kapal si nandangi lawes ku Tarsis. Galarina ongkosna janah nangkihina kapal e, jenari lawes ia ras kalak e ku Tarsis. Kiam ia arah Jahwe.
4 Kenca si e, ban Jahwe rembus angin si meter i laut janah terjadi badai si merawa, si erban kapal e menam gedap.
5 Mbiar kel pelaut-pelaut e, emaka erlebuh kalak e mindo penampat man dibatana masing-masing. Benterken kalak e barang-barang si lit bas kapal ku laut, gelah reh nahangna kapal e.+ Tapi Juna enggo nusur ku bagin si arah bas i kapal e. Medem ia i je janah entabeh perpedemna.
6 Dahi kapten kapal ia janah nina, “Engkai maka kam medem? Iah medakken, erlebuhlah man Dibatandu! Mbera-mbera perdiateken Dibata si benar kita, gelah la kita mate.”+
7 Kenca si e nina kalak e man sada ras si debanna, “Siundilah+ gelah siteh perban ise maka kita kena bencana e.” Emaka iundi kalak e. Menurut undi e, perban Juna maka terjadi bencana e.+
8 Nungkun kalak e man bana, “Kataken man kami, tuhu kin kam si erban kami kena bencana enda? Kai dahinndu? Ja nari asalndu? Arah bangsa si apai kam, kalak kai kin kam?”
9 Nina njawapsa, “Aku kalak Heber, aku mbiar man* Jahwe Dibata si erkuasa i surga, Ia kap si erban laut ras taneh si kerah.”
10 Megi si e, reh biarna kalak e perban enggo kataken Juna man kalak e maka ia enggo kiam arah Jahwe. Emaka ning kalak e man bana, “Uga maka bage banndu?”
11 Reh rawana badai i laut e, emaka nina kalak e man bana, “Kai si arus lakoken kami man bandu gelah tenang laut e?”
12 Nina njawapsa, “Ambekkenlah aku ku laut, tenang nge kari laut e. Sebap kuteh perban aku nge maka reh badai si merawa enda man kena.”
13 Tapi usahaken kalak e ndayung kapal e ku tepi, amin pe bage kalak e la berhasil perban reh rawana badai i laut e.
14 Emaka erlebuh kalak e man Jahwe, “O Jahwe, ula min kami mate perban dilaki enda! O Jahwe, ula min suruhNdu kami ertanggung jawap perban munuh* kalak si la ersalah, sebap sura-suraNdu kap enda.”
15 Emaka angkat kalak e Juna janah benterkenna ku laut, jenari tenang laut e.
16 Dungna mbiar kel kalak e man Jahwe.+ Kenca si e, persembahken kalak e korban man Jahwe janah erjanji kalak e man baNa.
17 Ban Jahwe ikan si seh kel galangna mbendut Juna. Lit telu wari telu berngi dekahna Juna bas beltek ikan e.+
