Kejadin 11:1-32
11 Paksa si e, sada ngenca bahasa ras kata-kata* si ipake i doni.
2 Sanga lawes manusia ku arah timur, idah kalak e sada lembah si mbelang i daerah Sinar,*+ tading kalak e i je.
3 Ning kalak e, “Mari siban batu bata, nce situtung alu api.” Emaka gunaken kalak e batu bata jadi ganti batu, pake kalak e ter guna ngeleketkenca.
4 Nina kalak e ka, “Mari siban sada kota ras sada menara si meganjang seh ku langit, gelah terkenal kita, gelah ula kita merap ku belang-belang doni.”+
5 Perdiateken Jahwe kota ras menara si bangun manusia e.
6 Emaka nina Jahwe, “Kerina kalak e sada bangsa ras sada bahasa,+ nenlah kai si enggo mulai lakoken kalak e. Kai pe si rencanaken kalak e banci ilakokenna.
7 Ota kita+ ku teruh, sikacauken bahasa kalak e gelah lanai ia siangkan.”
8 Ban Jahwe kalak e merap ku belang-belang doni,+ dungna ngadi kalak e mbangun kota e.
9 E me sebapna kota e igelari Babil,*+ sebap i je ikacauken Jahwe bahasa i doni, janah ban Jahwe manusia merap ku belang-belang doni.
10 Enda sejarah kerna Sem.+
Dua tahun kenca Banjir si Mbelin, sanga umur Sem 100 tahun, lahir anakna eme Arpaksat.+
11 Kenca Arpaksat lahir, lit ka anak-anak Sem si dilaki ras si diberu.+ Sem nggeluh 500 tahun nari.
12 Sanga umur Arpaksat 35 tahun, lahir anakna gelarna Selah.+
13 Kenca Selah lahir, lahir ka anak-anak Arpaksat si dilaki ras si diberu. Arpaksat nggeluh 403 tahun nari.
14 Sanga umur Selah 30 tahun, lahir anakna gelarna Eber.+
15 Kenca Eber lahir, lahir ka anak-anak Selah si dilaki ras si diberu. Selah nggeluh 403 tahun nari.
16 Sanga umur Eber 34 tahun, lahir anakna gelarna Peleh.+
17 Kenca Peleh lahir, lahir ka anak-anak Eber si dilaki ras si diberu. Eber nggeluh 430 tahun nari.
18 Sanga umur Peleh 30 tahun, lahir anakna gelarna Rehu.+
19 Kenca Rehu lahir, lahir ka anak-anak Peleh si dilaki ras si diberu. Peleh nggeluh 209 tahun nari.
20 Sanga umur Rehu 32 tahun, lahir anakna gelarna Seruh.
21 Kenca Seruh lahir, lahir ka anak-anak Rehu si dilaki ras si diberu. Rehu nggeluh 207 tahun nari.
22 Sanga umur Seruh 30 tahun, lahir anakna gelarna Nahur.
23 Kenca Nahur lahir, lahir ka anak-anak Seruh si dilaki ras si diberu. Seruh nggeluh 200 tahun nari.
24 Sanga umur Nahur 29 tahun, lahir anakna gelarna Terah.+
25 Kenca Terah lahir, lahir ka anak-anak Nahur si dilaki ras si diberu. Nahur nggeluh 119 tahun nari.
26 Kenca umur Terah 70 tahun, lahir anakna gelarna Abram,+ Nahur,+ ras Haran.
27 Enda sejarah kerna Terah.
Terah eme bapak Abram, Nahur, ras Haran. Haran eme bapak Lut.+
28 Sanga Terah nggeluh denga, mate Haran i kota inganna lahir eme i Ur,+ kota kalak Kaldea.+
29 Dungna erjabu Abram, Nahur pe erjabu ka. Gelar diberu Abram eme Sarai,+ gelar diberu Nahur eme Milka,+ Milka e anak Haran. Haran e bapak Milka ras Jiska.
30 Sarai mandul,+ la lit anakna.
31 Kenca si e, baba Terah anakna Abram ras kempuna Lut,+ Lut e anak Haran. Babana ka permenna eme Sarai diberu Abram. Lawes kalak e arah Ur nari eme daerah kalak Kaldea ku negri Kanaan.+ Sanga kalak e seh i Haran,+ tading kalak e i je.
32 Lit 205 tahun dekahna Terah nggeluh. Kenca si e mate Terah i Haran.