Kejadin 12:1-20
12 Nina Jahwe man Abram, “Laweslah kam arah negrindu nari, arah keluargandu, bage pe arah rumah bapakndu. Laweslah ku negri si Kutuduhken pagi man bandu.+
2 Kuban pagi kam jadi bangsa si mbelin, Kupasu-pasu pagi kam. Kuban pagi gelarndu terkenal, arah kam nari pagi kalak si deban ndatken pasu-pasu.+
3 Kupasu-pasu pagi kalak si masu-masu kam, Kusumpahi kalak si numpahi kam.+ Kerina keluarga si lit i doni ipasu-pasu pagi arah kam.”+
4 Emaka lakoken Abram bagi si isuruh Jahwe man bana, Lut pe ikut ras ia. Umur Abram 75 tahun sanga ia lawes Haran nari.+
5 Baba Abram diberuna Sarai,+ bage pe Lut anak seninana,+ ras kerina barang-barang+ bage pe budak-budak si datna i Haran, jenari lawes kalak e ku Kanaan.+ Sanga seh kalak e i Kanaan,
6 siari Abram negri e seh ku daerah Sikem+ i deher batang-batang kayu si galang i More.+ Sanga si e, si tading i daerah e kalak Kanaan.
7 Kenca si e, jumpai Jahwe me Abram, nina, “Kubereken pagi taneh enda man keturunenndu.”+ Emaka ban Abram i je ingan nutung* persembahen man Jahwe si enggo njumpai ia.
8 Dungna pindah ia je nari ku daerah pegunungen i sebelah timur Betel.+ Banna kemahna antara Betel ras Ai+ (Betel i sebelah barat, Ai i sebelah timur). Banna i je ingan nutung persembahen man Jahwe+ janah pujina gelar Jahwe.+
9 Kenca si e, berkat Abram ku Negep.*+ Bas perdalanen ku Negep, erkemah ia arah sada ingan ku ingan si debanna.
10 Sanga lit kelihen i negri e, lawes Abram ku Mesir, tading ia i je ntisik,*+ sebap kelihen e seh kel parahna.+
11 Sanga nandangi seh i Mesir, nina Abram man Sarai, “Begikenndu min aku. Kuteh maka kam seh kel jilena.+
12 Emaka adi idah kalak Mesir kari kam, pasti nina, ‘Enda diberuna.’ Kenca si e, bunuhna aku tapi kam pediatna nggeluh.
13 Katakenndu min maka kam adekku, gelah la terjadi si la mehuli man bangku perban kam, alu bage selamatkenndu kesahku.”+
14 Kenca seh Abram i Mesir, perdiateken kalak Mesir maka Sarai seh kel jilena.
15 Pejabat-pejabat raja Mesir* pe ngidah Sarai, ceritaken kalak e uga jilena diberu e man raja Mesir. Emaka Sarai ibaba ku istana raja Mesir.
16 Mehuli perbahanen raja Mesir man Abram perban Sarai janah berena man Abram biri-biri, lembu, kelede jantan ras beruna, unta, bage pe budak-budak si dilaki ras si diberu.+
17 Kenca si e, ban Jahwe raja Mesir bage pe kerina si tading bas istanana kena penakit si seh kel ngerina, perban Sarai diberu Abram e.+
18 Emaka dilo raja Mesir me Abram, nina, “Engkai maka bage banndu bangku? Engkai maka la katakenndu ia diberundu?
19 Nindu ia adekndu,+ emaka menam kuban ia jadi diberuku. Enda diberundu ndai. Baba ia, laweslah kena.”
20 Emaka perentahken raja Mesir pelayan-pelayanna ngkawali Abram ras diberuna bage pe si lit bas ia.+
Cataten i teruh
^ Ntah “Selatan.”
^ Ntah “tading ia i je jadi kalak asing.”
^ As. “Paro; Firaun.” Penggelaren man raja Mesir.
