Kejadin 13:1-18
13 Emaka tadingken Abram negri Mesir, lawes ia ku Negep.*+ Babana diberuna ras kerina si lit bas ia. Lut pe ikut ras ia.
2 Bayak kel Abram e, melala asuh-asuhenna, pirakna, ras emasna.+
3 Sanga bas perdalanen Negep* nari ku Betel, erkemah ia arah sada ingan ku ingan si debanna. Dungna, seh ia bas sada ingan si pernah banna kemahna i je, eme antara Betel ras Ai.+
4 Bas ingan e pernah ban Abram ingan nutung* persembahen, pujina* gelar Jahwe i je.
5 Lut si ikut ras Abram pe lit biri-birina, lembuna, ras kemah-kemahna.
6 Emaka lanai siat taneh e man ingan tading kalak e. Perban buena erta kalak e, lanai banci kalak e ras tading.
7 Dungna rubati permakan-permakan Abram ras permakan-permakan Lut. (Sanga si e, kalak Kanaan ras Kalak Peris si tading bas ingan e.)+
8 Nina Abram man Lut,+ “Adi banci ula min lit perubaten bas kita, antara permakanku ras permakanndu, perban kita keluarga denga.
9 Emaka pangen kuakap lanai kita ras. Banci pilihndu ingan si apai pe atendu bas taneh enda. Adi kam ku kiri, aku ku kanan. Adi kam ku kanan, aku ku kiri.”
10 Emaka tatap Lut kerina daerah Jordan+ seh ku Soar,+ bas daerah e melala idahna launa, bagi taman Jahwe+ ntah pe bagi negri Mesir (sope ikernepken Jahwe Sodom ras Gomora).
11 Kenca si e, pilih Lut kerina daerah Jordan, pindah ia ku sebelah timur. Emaka lanai kalak e ras.
12 Abram tading i negri Kanaan, tapi Lut tading i deher kota-kota si lit i daerah Jordan.+ Dungna ban Lut kemahna i deher Sodom.
13 Jahat kel kalak Sodom e, mbelin kel dosana man Jahwe.+
14 Kenca Lut lanai ras Abram, nina Jahwe man Abram, “Arah inganndu nari, tataplah ku utara ras selatan, ku timur ras barat,
15 kerina negri si idahndu e, Kubereken pagi man bandu bage pe man keturunenndu seh rasa lalap.+
16 Kuban pagi keturunenndu seri buena bagi abu bas taneh. Adi lit si banci ngkira abu bas taneh, keturunenndu pe banci ikira.+
17 Ersikaplah kam, siari kerina negri enda, sebap Kubereken ateKu negri e man bandu.”
18 Emaka Abram lalap tading bas kemah-kemah. Dungna seh ia i Hebron,+ tading ia i deher batang-batang kayu si galang i Mamre.+ Banna i je ingan nutung persembahen man Jahwe.+
