Kejadin 15:1-21
15 Kenca si e, bas sada pengenehenen* nina Jahwe man Abram, “Ula kam mbiar+ Abram. Aku kap si ngelindungi kam.*+ Mbelin kel pagi upahndu.”+
2 Nina Abram ngaloisa, “O Jahwe, Tuhan Si Meganjangna, kai gunana pasu-pasuNdu e man bangku adi ngasa gundari pe labo lit anakku? Elieser kalak Damaskus e nge pagi si jadi ahli waris erta-ertaku.”+
3 Nina Abram ka, “Lenga berekenNdu aku keturunen,+ emaka pelayan* bas rumahku nge pagi si jadi ahli warisku.”
4 Nina Jahwe man bana, “Labo dilaki e pagi si jadi ahli warisndu. Tapi anakndu si dilaki pagi si jadi ahli warisndu.”+
5 Kenca si e, suruh Dibata me Abram ku darat, nina, “Tataplah ku langit, kiralah bintang-bintang adi ngasup kin kam ngkirasa.” Kenca si e, nina, “Bage pagi buena keturunenndu.”+
6 Erkiniteken Abram man Jahwe+ janah ianggap Dibata ia kalak si benar.+
7 Kenca si e nina Dibata ka, “Aku kap Jahwe si maba kam ndarat arah Ur, daerah kalak Kaldea nari, guna mereken negri enda man bandu.”+
8 Kenca si e nina Abram, “O Jahwe, Tuhan Si Meganjangna, ja nari banci kuteh maka negri e pagi jadi jangku?”
9 Nina Dibata man bana, “Buat man bangKu sada lembu beruna si nguda denga, sada kambing beruna, sada biri-biri jantan. Teluna binatang e umurna telu tahun. Buat ka man bangKu sada ndukur ras sada merpati si nguda denga.”
10 Emaka buat Abram kerina binatang e, potongna jadi dua, kenca si e amparkenna janah sihadap-hadapen banna bagin si enggo ipotong e, tapi perik-perik e la potongna.
11 Kenca si e, rehen perik-perik si man daging ndeheri bangke-bangke e, tapi pelawes Abram perik-perik e.
12 Sanga matawari nandangi terbenam, terpedem Abram, entabeh kel kapna tunduh. Ernipi ia reh gelap si luar biasa man bana, ngeri kel gelap e.
13 Kenca si e nina Dibata man Abram, “Keturunenndu pagi jadi kalak asing i negri si deban, iperbudak ras itindas kalak 400 tahun dekahna.+
14 Tapi Kuhakimi pagi ise pe si erban kalak e jadi budak,+ melala pagi erta baba kalak e sanga ndarat je nari.+
15 Gedang pagi umurndu, mate pagi kam alu dame. Ikuburken pagi kam bagi nini bulangndu.+
16 Tapi keturunenndu si peempatken, mulihken pagi ku jenda,+ perban waktu guna ngukum kalak Amori lenga seh.”+
17 Kenca matawari enggo terbenam, wari seh kel gelapna. Teridah sada tungku si lit asapna ras sada obor si gara lewat i antara potongen-potongen daging e.
18 Bas wari e ban Jahwe perjanjin ras Abram,+ nina, “Kubereken pagi negri enda man keturunenndu,+ mulai lau si lit i Mesir seh ku lau si mbelin, eme Lau Eprat:+
19 negri kalak Keni,+ kalak Kenas, kalak Katmon,
20 kalak Het,+ Kalak Peris,+ kalak Repaim,+
21 kalak Amori, kalak Kanaan, kalak Girgasi, ras kalak Jebusi.”+
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ As. “Aku jadi perisaindu.”
^ As. “anak dilaki.”
