Kejadin 16:1-16
-
Hagar ras Ismael (1-16)
16 Lalap lenga lit anak Sarai, diberu Abram.+ Tapi lit budakna kalak Mesir gelarna Hagar.+
2 Emaka nina Sarai man Abram, “Begiken min aku. Ban Jahwe la lit anakku, emaka erhubungen sekslah kam ras budakku. Mbera-mbera banci lit anakku arah ia nari.”+ Emaka begiken Abram kai nina Sarai.
3 Kenca sepuluh tahun Abram tading i negri Kanaan, bereken Sarai sada budakna man Abram jadi diberuna. Budakna e kalak Mesir, gelarna Hagar.
4 Emaka erhubungen seks Abram ras Hagar, jenari hamil Hagar. Sanga iteh Hagar ia hamil, sombong ia man Sarai.
5 Emaka nina Sarai man Abram, “Kam nge si erbanca maka bage si terjadi man bangku. Aku si mereken ia man bandu,* tapi sanga tehna ia hamil, sombong ia man bangku. Mbera-mbera Jahwe si ncidahken ise si benar, aku ntah kam.”
6 Emaka nina Abram man Sarai, “Budakndu kap ia. Kai atendu lakokenndu man bana, lakoken saja.” Kenca si e, lanai mehuli perbahanen Sarai man Hagar, emaka kiam Hagar nadingken Sarai.
7 Kenca si e jumpai malekat Jahwe Hagar i mata lau si lit i taneh mesawang,* bas dalan ku Sur.+
8 Nina malekat e bana, “O Hagar, budak Sarai, ja nari kam e? Ku ja atendu?” Nina Hagar, “Kiam aku nadingken Sarai, tuanku si diberu.”
9 Nina malekat Jahwe man bana, “Mulihkenlah ku tuanndu, peteruk bandu i lebe-lebena.”
10 Kenca si e nina malekat Jahwe, “Enterem kel pagi kuban keturunenndu, lanai terkira ban teremna.”+
11 Nina malekat Jahwe ka, “Kam sangana hamil, dilaki pagi anakndu. Arus banndu gelarna Ismael,* sebap enggo perdiateken Jahwe kesusahenndu.
12 Bali pagi ia bagi kelede liar.* Lawanna pagi kerina kalak janah kerina kalak ngelawan ia. Serap pagi ia tading arah kerina seninana.”*
13 Kenca si e, ipuji* Hagar gelar Jahwe si enggo ngerana man bana, nina, “Kam kap Dibata si banci ngidah kerinana.”+ Nina Hagar ka, “Enggo kuidah Ia si enggo ngidah aku.”
14 E me sebapna maka sumur e igelari Beer-lahai-roi.* (Si lit i antara Kades ras Beret.)
15 Emaka lahirken Hagar sekalak anak dilaki man Abram, ban Abram gelar anakna e Ismael.+
16 Umur Abram 86 tahun sanga Hagar ngelahirken Ismael.
Cataten i teruh
^ As. “ku dadandu.”
^ Taneh si mbelang si jarang iingani.
^ Ertina “Begiken Dibata.”
^ Lit si erpengakap maka kata aslina eme zebra, mungkin enda nggambarken sipat si atena bebas.
^ Ntah banci saja “Ermusuhen ia pagi ras kerina seninana.”
^ As. “ilebuh.”
^ Ertina “Sumur arah Ia si Nggeluh si Ngidah Aku.”