Kejadin 18:1-33
18 Kenca si e, cidahken Jahwe*+ baNa man Abraham i deher batang-batang kayu si galang i Mamre.+ Abraham sangana kundul i pintu masuk kemahna bas ciger wari si melas.
2 Idahna telu dilaki si sangana tedis la ndauh arah ia nari.+ Mis ia kiam njumpai kalak e, jenari sujud ia.
3 Nina, “O Jahwe, adi meriah ukurNdu ngidah aku, singgahlah Kam bas ingan budakNdu enda.
4 Kubuat lebe sitik lau gelah kuburihi nahe kena.+ Istrahatlah i teruh batang kayu enda.
5 Perban enggo singgah kena ku ingan budak kena enda, kuhidangken ateku sada potong roti gelah banci kena megegeh mulihi.* Jenari, banci terusken kena perdalanen kena.” Megi si e, nina kalak e, “Banci. Lakokenlah bagi si katakenndu ena.”
6 Emaka mis lawes Abraham ku kemah njumpai Sara, nina, “Buatlah 12 kilo* tepung si halus, aduk, nce ban jadi roti. Meter banndu ya.”
7 Kenca si e, kiam Abraham ku ingan asuh-asuhenna, pilihna sada lembu jantan si nguda denga si mejile. Berekenna man pelayanna, janah mis sikapken kalak e.
8 Kenca si e, buatna mentega ras susu bage pe lembu jantan si nguda denga si enggo sikapkenna ndai, jenari hidangkenna man kalak e. Sanga kalak e man, Abraham tetap tedis deher kalak e i teruh batang kayu.+
9 Nina kalak e man bana, “Ja Sara diberundu?”+ Nina ngaloisa, “Bas kemah.”
10 Nina salah sada arah kalak e, “Tahun si reh, bas waktu si bagenda ka, mulihken pagi aku ndahi kam. Sanga si e pagi, diberundu Sara enggo lit anakna dilaki.”+ Sara sangana megi-megi arah pintu kemah si lit i pudi dilaki e.
11 Abraham ras Sara enggo seh kel tuana.+ Emaka Sara enggo metuasa melahirken.*+
12 Tawa Sara bas pusuhna, nina, “Aku enggo metua, tuanku pe enggo metua, banci denga kin kunanami keriahen si bage?”+
13 Nina Jahwe man Abraham, “Engkai maka tawa Sara janah nina, ‘Aku enggo metua, banci kin aku melahirken?’
14 Lit kin si la mungkin bas Jahwe?+ Bas tahun si reh, bas waktu si bagenda ka, mulihken pagi Aku ndahi kam, enggo lit pagi anak Sara dilaki.”
15 Tapi perban mbiar Sara, la akuina, nina, “Labo aku tawa.” Emaka nina Dibata, “Tawa nge kam ndai.”
16 Kenca si e, lawes dilaki-dilaki e je nari. Ikut Abraham erdalan naruhkenca. Sanga tatap kalak e ku teruh ku arah Sodom,+
17 nina Jahwe, “Labo Kubuniken arah Abraham kai si ateKu Kulakoken.+
18 Pasti pagi Abraham jadi bangsa si mbelin ras megegeh, kerina bangsa bas doni enda ipasu-pasu pagi arah ia.+
19 Kutandai kel Abraham, tek Aku maka banci perentahkenna anak-anakna bage pe kerina keturunenna gelah nggeluh menurut kai si ngena ate Jahwe, eme alu ngelakoken kai si benar ras adil.+ Alu bage banci tepati Jahwe janjiNa man Abraham.”
20 Kenca si e nina Jahwe, “Enggo Kubegi melala si ngadu-ngadu kerna Sodom ras Gomora,+ enggo mekelek kel dosa kalak e.+
21 Emaka nusur ateKu gelah Kuteh jahat ntah lang perbahanen kalak e bagi si enggo Kubegi.”+
22 Jenari lawes dilaki-dilaki e ku arah Sodom, tapi Jahwe+ tetap ras Abraham.
23 Deheri Abraham Dibata, nina, “Payo nge kernepkenNdu ateNdu kalak si benar radu ras kalak jahat?+
24 Bicara lit 50 kalak si benar bas kota e, kernepkenNdu nge kalak e? La nge ampuniNdu kota e amin pe lit 50 kalak si benar i je?
25 Labo mungkin kernepkenNdu kalak benar radu ras kalak jahat. Adi bage si terjadi, seri kap si inanami kalak benar ras kalak jahat.+ La mungkin bage banNdu.+ Me labo mungkin la adil perbahanen Hakim sebelang doni?”+
26 Kenca si e nina Jahwe, “Adi lit 50 kalak si benar i Sodom, Kuampuni kota e perban kalak e.”
27 Tapi nina Abraham ka, “O Jahwe, bereNdu min aku mulihi ngerana, amin pe aku enda abu.
28 Bicara kurang lima kalak arah si 50 kalak e, kernepkenNdu nge kota e perban si lima kalak e?” Nina Dibata, “Labo Kukernepken bicara lit 45 kalak si benar i je.”+
29 Tapi ngerana ka ia mulihi man Dibata, nina, “Uga adi 40 kalak ngenca kalak si benar i je?” Nina, “Labo Kukernepken kota e perban si 40 kalak e.”
30 Tapi nina Abraham ka, “O Jahwe, ula min Kam merawa,+ nungkun ka ateku mulihi: Uga adi 30 kalak ngenca kalak si benar i je?” Nina, “Labo Kukernepken kota e adi lit 30 kalak si benar i je.”
31 Tapi nina Abraham ka, “O Jahwe, bereNdu min aku ngerana mulihi: Uga adi 20 kalak ngenca kalak si benar i je?” Nina, “Labo Kukernepken kota e perban si 20 kalak e.”
32 Dungna nina Abraham, “O Jahwe, ula min Kam merawa, tapi bereNdu min aku ngerana sekali nari: Uga adi sepuluh kalak ngenca kalak si benar i je?” Nina, “Labo Kukernepken kota e perban si sepuluh kalak e.”
33 Kenca dung Jahwe ngerana ras Abraham, lawes Ia,+ Abraham pe mulih ku kemahna.
Cataten i teruh
^ Eme malekat si jadi wakil Jahwe.
^ As. “kena mpegegehi pusuh kena.”
^ As. “enggo ngadi haid.”
