Kejadin 19:1-38
19 Kenca enggo ben wari, duana malekat e seh i Sodom. Paksa si e Lut sangana kundul i gerbang Sodom. Sanga idah Lut kalak e, mis jumpaina janah sujud ia.+
2 Nina man kalak e, “O Tuanku, singgahlah kena, erberngilah bas rumah budak kena enda gelah kuburihi kari nahe kena. Kenca e, banci kena lampas medak jenari terusken kena perdalanen kena.” Nina kalak e, “La padah, bas lapangen enda saja kami erberngi.”
3 Tapi lalap desak Lut kalak e, emaka ikut kalak e ku rumahna. Kenca si e, ban Lut acara man-man, panggangna roti si la itama ragi, jenari man kalak e.
4 Sope kalak e medem, kerina dilaki bas kota Sodom ngepung rumah e, mulai si nguda nari seh ku si metua.
5 Lebuh-lebuh kalak e Lut, nina, “Ja dilaki-dilaki si reh berngi ndai ku rumahndu? Baba ia ku darat gelah erhubungen seks kami ras ia.”+
6 Kenca si e ndarat Lut njumpai kalak e, jenari tutupna pintu.
7 Nina, “O senina-seninaku, ula min lakoken kena si jahat.
8 Lit dua anakku singuda-nguda denga. Banci kubaba ia ndarat man kena, lakokenlah kai pe si ate kena lakoken kena. Tapi ula lakoken kena kai pe man dilaki-dilaki e perban kalak e tamuku, jadi arus kulindungi.”+
9 Emaka nina kalak e, “Awas ko!” Nina kalak e ka, “Engko pe kalak asing nge, pang ka ko ngakimi kami. Jahaten kari ban kami man bam asangken man kalak e.” Kenca si e sorongken kalak e Lut, jenari cedaken kalak e atena pintuna.
10 Emaka tarik dilaki-dilaki* ndai Lut ku rumah, jenari tutupna pintu.
11 Tapi ban dilaki-dilaki ndai kalak si lit i lebe-lebe pintu e la banci ngidah, mulai si kitik seh ku si galang. Emaka, enggo latih akap kalak e ndarami pintu masuk.
12 Nina dilaki-dilaki ndai man Lut, “Lit denga keluargandu jenda? Babalah kelandu, anakndu si dilaki, anakndu si diberu, bage pe kade-kadendu ndarat jenda nari.
13 Sebap hancurken kami ate kami kota enda. Enggo begi Jahwe melala si ngadu-ngadu kerna penduduk kota enda si seh kel jahatna.+ Emaka suruh Jahwe kami ngancurken kota enda.”
14 Emaka dahi Lut kelana* si nandangi ngempoi anak-anakna. Mulih-ulih nina Lut man kalak e, “Ndaratlah arah ingan enda, hancurken Jahwe ateNa kota enda!” Tapi akap kelana e ia main-main.+
15 Bas pagi-pagi si lampas, nina malekat-malekat e man Lut, “Pedasken! Baba diberundu ras duana anakndu, gelah la kam ikut mate sanga kota enda ihancurken perban kesalahenna.”+
16 Perban lalap pedekah-dekah Lut, mekuah ate Jahwe ia,+ emaka tagangi dilaki-dilaki e tan Lut, tan diberuna, bage pe tan anak-anak Lut. Babana kalak e ndarat arah kota e nari.+
17 Kenca ndarat kalak e bas kota e nari, nina dilaki e, “Selamatken bandu! Ula nen ku pudi,+ ula kam ngadi i japa pe bas daerah enda!+ Kiamlah kam ku daerah pegunungen gelah ula kam ikut kernep!”
18 Nina Lut man kalak e,* “O Jahwe, ula min suruhNdu aku ku jah.
19 Enggo jadi ateNdu budakNdu enda, perban enggo setia Kam engkelengi aku, selamatkenNdu aku.+ Tapi la aku ngasup kiam ku daerah pegunungen, mbiar aku kena bencana dungna mate.+
20 Lit sada kota si kitik si ndeher, banci aku kiam ku jah. Me banci nge aku kiam ku jah? Kitik nge kota e, gelah banci aku selamat.”
21 Emaka nina dilaki e man Lut, “Banci. Kubegiken kata-katandu.+ La kukernepken kota si katakenndu ena.+
22 Pedasken! Kiamken ku kota e, perban la banci kulakoken kai pe adi lenga kam seh i jah!”+ E me sebapna maka kota e igelari Soar.*+
23 Enggo terang wari sanga Lut seh i Soar.
24 Kenca si e iban Jahwe udan belerang ras udan api ku Sodom ras Gomora. Enda rehna arah langit nari, bas Jahwe nari.+
25 Dungna hancurkenNa kota-kota e, kerina daerah e, termasuk kerina penduduk kota e ras sinuan-sinuanna.+
26 Tapi diberu Lut si lit i pudina, jadi patung sira perban tulihkenna ku pudi.+
27 Pagi-pagi si lampas, lawes Abraham ku ingan si pernah ia tedis i lebe-lebe Jahwe.+
28 Sengget Abraham sanga tatapna ku Sodom ras Gomora bage pe ku kerina daerah e. Lit asap si mekapal nangkih arah daerah e bagi asap arah tungku raksasa.+
29 Sanga hancurken Dibata ateNa kota-kota si lit bas daerah e, inget Dibata me Abraham emaka suruhNa Lut ndarat arah kota e nari, eme kota ingan Lut tading.+
30 Kenca si e, lawes Lut ras dua anakna si diberu arah Soar nari, tading kalak e i daerah pegunungen,+ perban mbiar ia tading i Soar.+ Emaka bas gua ia tading ras duana anakna.
31 Kenca si e, nina anakna sintua man adekna, “Bapakta enggo metua, la lit dilaki bas negri enda si banci ngempoi kita, bagi si biasana ilakoken kerina kalak.
32 Ota sibere bapakta minem anggur, kenca si e medem kita ras ia gelah lit keturunen bapakta.”
33 Emaka, bas berngi e lalap bere kalak e bapakna minem anggur seh asa mabuk. Kenca si e masuk anak sintua, medem ia ras bapakna, tapi la teh bapakna ndigan anakna e medem ras ndigan anakna e medak.
34 Paginna, nina anakna sintua man adekna, “Enggo medem aku ras bapak berngi ndai. Mari sibere ka bapak minem anggur berngi enda. Kenca e masuk kam, medem kam ras ia, gelah lit keturunen bapakta.”
35 Berngina, bere kalak e ka bapakna minem anggur seh asa mabuk. Kenca si e masuk si nguda, medem ia ras bapakna, tapi la teh bapakna ndigan anakna e medem ras ndigan anakna e medak.
36 Emaka hamil duana anak Lut e arah bapakna.
37 Melahirken anak sintua, anakna dilaki jenari banna gelarna Moap.+ Ia nini bulang kalak Moap si lit gundari.+
38 Si nguda pe melahirken ka, anakna pe dilaki, banna gelarna Benammi. Ia nini bulang kalak Ammon+ si lit gundari.
Cataten i teruh
^ Maksudna, malekat-malekat.
^ Menurut kebiasan kalak Heber, kalak si enggo tunangen ipeseri ras kalak si enggo erjabu.
^ Eme malekat si jadi wakil Jahwe.
^ Ertina “Kitik.”
