Kejadin 2:1-25
2 Emaka langit ras doni bage pe kerina isina enggo dung+ iciptaken.
2 Nandangi wari pepituken, dungi Dibata dahinNa. Kenca si e, istrahat Ia bas wari pepituken arah kerina dahin si enggo lakokenNa.+
3 Pasu-pasu Dibata wari si pepituken e, katakenNa maka wari e badia, perban bas wari e istrahat Dibata kenca enggo dung ciptakenNa kerina bagi sura-suraNa.
4 Enda ndai me sejarahna sanga langit ras doni iciptaken, eme bas wari* ciptaken Dibata Jahwe* langit ras doni.+
5 Lenga lit peren bage pe sinuan-sinuan si turah i doni, perban lenga penusur Dibata Jahwe udan ku doni janah lenga lit manusia si ngurus taneh e.
6 Tapi lit remang si nangkih arah taneh nari, remang e erban kerina taneh jadi litap.
7 Dung e, ban Dibata Jahwe manusia arah abu taneh+ jenari embuskenNa kesah kegeluhen ku lubang igungna,+ dungna jadi manusia si nggeluh ia.+
8 Kenca si e, ban Dibata Jahwe sada taman i Eden,+ i sebelah timur. TamaNa manusia si banNa ndai i je.+
9 Kenca si e, peturah Dibata Jahwe bas taneh kerina batang kayu si mejile man tatapen janah buahna banci ipan. PeturahNa ka batang kayu si igelari batang kayu kegeluhen+ i tengah-tengah taman e, bage pe batang kayu si igelari batang kayu pemeteh kerna si mehuli ras si jahat.+
10 Lit sada lau si maler ku taman e janah sumberna arah Eden nari. Lau e terbagi jadi empat.
11 Lau si pertama gelarna Pisun, lau e maler i sekeliling daerah Hawila, bas ingan e lit emas.
12 Emas si lit bas taneh e mejile. I je lit ka getah si merim ras batu oniks.*
13 Lau si peduaken gelarna Gihon, lau e maler i sekeliling daerah Kus.
14 Lau si peteluken gelarna Tigris,+ lau e maler ku daerah Assur bagin timur.+ Lau si peempatken gelarna Eprat.+
15 Itama Dibata Jahwe dilaki e bas Taman Eden guna ngusahai ras ngurus ingan e.+
16 Bereken Dibata Jahwe ka perentah man dilaki e, nina, “Kerina buah batang kayu si lit bas taman enda banci panndu seh asa kam puas.+
17 Tapi buah batang kayu si igelari batang kayu pemeteh kerna si mehuli ras si jahat, la banci panndu, sebap adi panndu, pasti kam mate bas wari e.”+
18 Kenca si e nina Dibata Jahwe, “La mehuli adi dilaki e lalap sisada. Kubanlah sekalak si nampati ia, si jadi pelengkap man bana.”+
19 Kerina binatang liar si lit i doni bage pe kerina binatang si kabang i langit, si enggo iban Dibata Jahwe arah taneh nari, babaNa man dilaki e gelah ban dilaki e gelarna sada per sada. Gelar kai pe si iban dilaki e man binatang-binatang ndai, e si jadi gelarna.+
20 Emaka ban dilaki e gelar man binatang si man asuhen, binatang si kabang i langit, ras kerina binatang liar si lit i doni. Tapi dilaki e la lit si nampatisa, la lit si cocok jadi temanna.
21 Emaka ban Dibata Jahwe entabeh kel pertunduh dilaki e. Sanga ia tunduh, buatNa sada tulan rusuk dilaki e, kenca si e tutupNa mulihi alu daging.
22 Jenari ban Dibata Jahwe sekalak diberu arah tulan rusuk dilaki ndai, kenca si e babaNa diberu e man dilaki ndai.+
23 Jenari nina dilaki e,
“Enda kap tulan arah tulanku,Daging arah dagingku.
Igelari ia Diberu,Perban arah dilaki nari ia ibuat.”+
24 Enda me sebapna maka sekalak dilaki nadingken bapakna ras mamakna janah lalap ia ersada ras diberuna, jenari jadi sada* kalak e.+
25 Duana kalak e lalap tilanjang,+ dilaki e ras diberuna. Tapi la akap kalak e mela.
Cataten i teruh
^ Maksudna, kerina e iciptaken bas enem wari penciptan.
^ Ntah “batu si merga.”
^ As. “sada daging.”