Kejadin 20:1-18
-
Sara iselamatken arah Abimelek (1-18)
20 Pindahken Abraham kemahna+ ku negri Negep.* Tading ia i antara Kades+ ras Sur.+ Sanga ia tading* i Gerar,+
2 kataken Abraham ka mulihi maka Sara e adekna.+ Emaka suruh Abimelek gelah Sara ibaba ndahi ia.+ Abimelek e raja Gerar.
3 Bas sada berngi, ngerana Dibata man Abimelek arah nipi, nina, “Mate pagi kam perban diberu si buatndu+ e, sebap ia enggo erjabu, ia diberu kalak.”+
4 Tapi Abimelek lenga lit erhubungen seks ras Sara. Emaka nina, “O Jahwe, bunuhNdu nge ateNdu bangsa si la ersalah* enda?
5 Dilaki e nge si ngataken, ‘Ia adekku,’ diberu e pe ngataken, ‘Ia abangku.’ Labo ateku erban si jahat, la kuteh adi si kuban e salah.”
6 Emaka nina Dibata si benar man bana bas nipi e, “Kuteh nge labo atendu erban si jahat, emaka la Kupediat kuitndu diberu e, gelah ula kam erdosa man bangKu.
7 Ulihken ia man dilakina, sebap dilakina sekalak nabi.+ Totokenna kari kam+ janah tetap pagi kam nggeluh. Tapi adi la ulihkenndu, kam bage pe kerina si lit i rumahndu pasti mate.”
8 Pagi-pagi si lampas medak Abimelek, lebuhna kerina pelayanna. Ceritakenna kerina kerna si e man kalak e, emaka mbiar kalak e.
9 Kenca si e, lebuh Abimelek me Abraham, nina, “Engkai maka bage banndu man kami? Dosa kai kin si enggo kuban man bandu maka banndu aku ras kerajanku ngelakoken dosa si mbelin? Enggo salah si lakokenndu e.”
10 Nina Abimelek ka man Abraham, “Kai maksudndu maka bage banndu?”+
11 Nina Abraham, “Bage kuban perban kuakap kalak si tading i jenda la mbiar man Dibata, pasti bunuhna kari aku gelah banci buatna diberuku.+
12 Ia memang adekku. Sada bapak kami tapi beda mamak, nce kuempoi ia.+
13 Sanga suruh Dibata aku lawes arah rumah bapakku,+ ningku man diberuku, ‘Ku ja pe kari kita lawes, cidahkenlah kekelengenndu si setia man bangku alu ngataken maka aku abangndu.’”+
14 Kenca si e, bere Abimelek biri-biri, lembu, bage pe budak-budak si dilaki ras si diberu man Abraham. Ulihkenna ka Sara diberu Abraham e.
15 Nina Abimelek ka, “Negri enda kerina jangku, emaka banci kam tading bas ingan si apai pe atendu.”
16 Nina man Sara, “Enda kubere 1.000 logam pirak man abangndu.+ Enda jadi tanda man kerina kalak si lit ras kam bage pe man kalak si deban, maka labo kam ipermelaken.”
17 Kenca si e, ertoto Abraham man Dibata si benar, ipepalem Dibata me Abimelek ras diberuna bage pe budak-budakna si diberu. Emaka lit dungna anak kalak e.
18 Sebap sope si e, ban Jahwe kerina diberu si lit bas istana Abimelek jadi mandul perban Sara, diberu Abraham e.+
