Kejadin 21:1-34
21 Perdiateken Jahwe me Sara bagi si enggo katakenNa. Lakoken Jahwe man Sara bagi si enggo janjikenNa.+
2 Emaka bas waktu si enggo janjiken Dibata,+ hamil Sara,+ lahirkenna sekalak anak dilaki man Abraham sanga Abraham enggo metua.
3 Ban Abraham gelar anak si lahirken Sara e Isak.+
4 Kenca umur Isak enggo waluh wari, sunat Abraham ia, bagi si perentahken Dibata man bana.+
5 Umur Abraham 100 tahun sanga Isak anakna lahir.
6 Kenca si e nina Sara, “Enggo ban Dibata aku tawa. Kerina kalak si megi kerna si e pasti tawa ras aku.”*
7 Nina Sara ka, “Ise si ngarap Sara diberu Abraham e banci pepinemken* anak? Tapi enggo kulahirken sekalak anak dilaki man bana sanga ia enggo metua.”
8 Reh galangna anak e jenari ngadi ia minem. Ban Abraham pesta si mbelin man Isak sanga ia ngadi minem.
9 Tapi perdiateken Sara maka anak Abraham si lahirken Hagar,+ kalak Mesir e, nokohi Isak.+
10 Emaka nina man Abraham, “Pelawes budak si diberu e ras anakna, perban anak budak e la banci jadi ahli waris ras anakku Isak.”+
11 Tapi kai si kataken Sara kerna anak e erban Abraham la senang.+
12 Emaka nina Dibata man Abraham, “Ula kam kuatir kerna anak e ras budakndu si diberu e. Begiken kai nina Sara kerna kalak e, perban arah Isak pagi rehna keturunenndu.+
13 Tapi anak budakndu si diberu e pe+ Kuban nge pagi keturunenna jadi sada bangsa,+ perban ia pe keturunenndu.”
14 Emaka medak Abraham bas pagi-pagi si lampas. Buatna roti ras sada ingan lau si iban arah kulit nari si risiken lau, berekenna man Hagar. Tama Abraham ku bara Hagar, kenca si e suruhna ia lawes ras anakna e.+ Emaka lawes Hagar, erdalan ia i taneh mesawang* si lit i Berseba, la tehna ku ja tujunna.+
15 Dungna keri lau si babana ndai, sorongna anak e ku teruh sada batang kayu si kitik.
16 Kenca si e, lawes ia, kundul ia la ndauh arah ingan e nari, nina, “La ateku kuidah anak e mate.” Emaka kundul ia i je, nderkuh ia.
17 Begi Dibata sora anak e.+ Ngerana malekat Dibata man Hagar surga nari, nina,+ “Engkai maka kam ngandung Hagar? Ula kam mbiar, enggo begi Dibata sora anakndu e.
18 Sampati anakndu e tedis, urus ia, sebap Kuban pagi ia jadi bangsa si mbelin.”+
19 Kenca si e, ban Dibata idah Hagar sada sumur, emaka lawes ia ku je, isina ingan launa ndai janah berena anak e minem.
20 Reh galangna anak e,+ lalap ia ipasu-pasu Dibata. Tading ia i taneh mesawang,* jadi pemanah ia.
21 Tading ia i Taneh Mesawang* Paran,+ ipejabu mamakna ia ras sekalak diberu arah negri Mesir nari.
22 Paksa si e, nina Abimelek ras Pikol peminpin pasukenna man Abraham, “Dibata kap ras kam bas kai pe si lakokenndu.+
23 Emaka ersumpahlah kam man bangku i lebe-lebe Dibata maka labo pagi tipundu aku, anak-anakku, ras kempu-kempuku. Mehulilah perbahanenndu man bangku ras man penduduk si tading i negri si inganindu, bagi aku enggo ncidahken kekelengen si setia man bandu.”+
24 Nina Abraham, “Ue, ersumpah aku.”
25 Tapi aduken Abraham man Abimelek kerna sumur lau si enggo irampas pelayan-pelayan Abimelek.+
26 Nina Abimelek, “La kap kuteh ise si ngelakokenca. Kam pe la ngata bangku. Enda denga kubegi kerna si e.”
27 Emaka bere Abraham biri-biri ras lembu man Abimelek, duana kalak e erban perjanjin.
28 Sanga pisahken Abraham pitu anak biri-biri beruna arah rarasenna nari,
29 nina Abimelek man Abraham, “Engkai maka pisahkenndu pitu anak biri-biri e?”
30 Nina Abraham, “Alokenndulah pitu anak biri-biri enda guna jadi saksi maka aku nge si ngkurak sumur enda.”
31 E me sebapna ingan e igelari Berseba,*+ perban i je kalak e duana erban sumpah.
32 Bage me ceritana ban kalak e sada perjanjin+ i Berseba. Kenca si e lawes Abimelek ras Pikol peminpin pasukenna, janah mulih kalak e ku negri Pilisti.+
33 Kenca si e, suan Abraham batang kayu tamariska i Berseba, bas ingan e ipujina* gelar Jahwe+ Dibata si rasa lalap.+
34 Ndekah Abraham tading i negri Pilisti.+
Cataten i teruh
^ Ntah banci saja “pasti tawaina aku.”
^ Ntah “mere ASI man.”
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Mungkin ertina “Sumur Sumpah” ntah “Sumur Pitu.”
^ As. “erlebuh ia man.”
