Kejadin 22:1-24
22 Kenca si e, uji Dibata si benar Abraham,+ nina, “Abraham!” Nina Abraham ngaloisa, “Kai, Tuhan.”
2 Kenca si e nina, “Baba anakndu Isak,+ anakndu si tonggal si keleng kel atendu,+ laweslah kena ku taneh Moria.+ Persembahken ia jadi persembahen tutungen i datas gunung si Kutuduhken kari man bandu.”
3 Emaka pagi-pagi si lampas medak Abraham, sikapkenna keledena. Babana ka dua pelayanna radu ras anakna Isak. Takaina kayu guna persembahen tutungen, dung e berkat ia ku ingan si tuduhken Dibata si benar man bana.
4 Bas wari si peteluken, enggo idah Abraham ingan e amin pe ndauh denga.
5 Nina Abraham man pelayan-pelayanna, “Timai kena jenda ras kelede e, aku ras anakku lawes ku jah guna nembah Dibata, adi enggo dung mulih kari kami.”
6 Emaka buat Abraham kayu guna persembahen tutungen janah tamakenna ku bara Isak anakna. Kenca si e, buatna api ras piso, dung e ras-ras kalak e erdalan.
7 Kenca si e, nina Isak man Abraham bapakna, “O Pak!” Nina ngaloisa, “Kai Nakku?” Nina Isak, “Api ras kayuna enggo lit, tapi ja biri-biri si man persembahenken?”
8 Nina Abraham, “Dibata kari si nikapken biri-biri si man persembahenken+ Nakku.” Kenca si e, terusken kalak e duana erdalan.
9 Dungna seh kalak e bas ingan si enggo tuduhken Dibata si benar man Abraham. Ban Abraham sada ingan nutung* persembahen i je, susunna kayu datas ingan e. Iketna nahe Isak ras tanna jenari tamana ia ku datas ingan nutung persembahen e.+
10 Kenca si e, buatna piso guna munuh anakna.+
11 Tapi lebuh malekat Jahwe me Abraham langit nari, nina, “Abraham, Abraham!” Nina Abraham, “Kai, enda aku.”
12 Kenca si e nina malekat e, “Ula sakiti anak e, ula lakokenndu kai pe man bana. Enggo Kuteh* maka ergaindu kel Dibata,* perban nggit kam mereken anakndu si tonggal e man bangKu.”+
13 Kenca si e, idah Abraham sada biri-biri jantan si sangkut tandukna i peren si erduri. Emaka buat Abraham biri-biri jantan e janah persembahkenna jadi persembahen tutungen nggantiken anakna.
14 Gelari Abraham ingan e Jahwe-jireh.* E me sebapna seh asa gundari nina kalak, “E isikapken i gunung Jahwe.”+
15 Kenca si e, lebuh malekat Jahwe me Abraham pedua kaliken arah langit nari,
16 nina, “Bagenda nina Jahwe+ man bandu, ‘Guna diriKu Aku ersumpah, perban enggo bage lakokenndu janah nggit kam mereken anakndu si tonggal,+
17 pasti Kupasu-pasu kam, enterem pagi Kuban keturunenndu bali buena bagi bintang i langit ras kersik i tepi laut.+ Rebut keturunenndu pagi kota* musuh-musuhna.+
18 Dat pasu-pasu pagi kerina bangsa i doni arah keturunenndu,+ perban enggo begikenndu kataKu.’”+
19 Kenca si e mulih Abraham ndahi pelayan-pelayanna, jenari mulih kalak e ku Berseba.+ Abraham tetap tading i Berseba.
20 Kenca si e dat Abraham laporen, “Enggo lahirken Milka anak-anak dilaki man seninandu Nahur:+
21 Sintua gelarna Us, adekna gelarna Bus, kenca si e Kemuel (bapak Aram),
22 Keset, Haso, Pildas, Jidlap, ras Betuil.”+
23 Betuil eme bapak Ribka.+ Lit waluh si lahirken Milka man Nahur senina Abraham.
24 Gundik* Nahur, si gelarna Reumah pe lahirkenna ka anak-anak dilaki, eme Tebah, Gaham, Tahas, ras Maaka.
Cataten i teruh
^ Malekat e ngerana jadi wakil Jahwe.
^ As. “maka mbiar kam man Dibata.”
^ Ertina “Isediaken Jahwe Pagi; Pasti Perdiateken Jahwe.”
^ Ntah “gerbang.”