Kejadin 24:1-67
24 Abraham enggo metua, enggo seh kel tuana, pasu-pasu Jahwe ia i bas kai pe.+
2 Lebuh Abraham pelayanna si enggo ndekah kel erdahin ras ia si ngurus kerina ertana.+ Nina Abraham man bana, “Erjanjilah kam bangku,*
3 ersumpahlah i lebe-lebe Jahwe, Dibata si erkuasa bas surga bage pe i doni, maka labo pagi buatndu sekalak singuda-nguda arah kalak Kanaan si tading i sekelilingku jadi diberu anakku.+
4 Tapi arus kam lawes ku negriku njumpai keluargaku.+ Kenca si e, buat sekalak singuda-nguda jadi diberu anakku.”
5 Tapi nina pelayan e man Abraham, “Uga adi diberu e la nggit ikut ras aku ku negri enda? Arus nge kubaba anakndu mulih ku negri asalndu?”+
6 Nina Abraham ngaloisa, “Ula ndigan pe babandu anakku ku jah.+
7 Jahwe Dibata si erkuasa bas surga, enggo maba aku arah rumah bapakku nari bage pe arah negri keluargaku,+ enggo ngerana Ia man bangku ras ersumpah+ Ia guna mereken negri+ enda man keturunenku.+ UtusNa pagi malekatNa negu-negu kam,+ pasti datndu sekalak singuda-nguda i je jadi diberu anakku.+
8 Tapi adi la nggit singuda-nguda e ikut ras kam, bebas kam arah sumpah e nari. Tapi ula babandu anakku ku jah.”
9 Emaka erjanji pelayanna e ngelakoken kai si pindo tuanna, ersumpah ia maka lakokenna kai si isuruh Abraham.+
10 Emaka baba pelayan e sepuluh unta ras erbage-bage hadiah arah tuanna nari. Dung e berkat ia ku Mesopotami, kota ingan Nahur tading.
11 Sanga seh ia bas sada sumur si lit i darat kota, ngadi ia gelah banci istrahat unta-untana. Paksa si e wari enggo ben, janah e waktuna singuda-nguda reh muat lau.
12 Emaka ertoto ia, nina, “O Jahwe Dibata tuanku Abraham, banlah gelah berhasil aku wari enda, cidahkenlah kekelengenNdu si setia man tuanku Abraham.
13 Aku sangana tedis i deher sumur enda, rehen kari singuda-nguda i kota enda muat lau.
14 Bagenda min kari si terjadi sanga ningku man sekalak singuda-nguda, ‘Bere min aku minem alu ingan laundu,’ adi nina kari ngaloi, ‘Ndi minemken, unta-untandu pe kubere kari minem,’ ia kari singuda-nguda si pilihNdu man budakNdu Isak. Alu bage kuteh maka enggo cidahkenNdu kekelengenNdu si setia man tuanku.”
15 Lenga pe ia dung ertoto, reh Ribka maba ingan lau i barana. Ribka e anak Betuil,+ Betuil e anak Milka+ diberu Nahur.+ Nahur e senina Abraham.
16 Diberu e seh kel jilena, ia singuda-nguda denga. Lenga pernah ia erhubungen seks ras dilaki. Lawes ia ku sumur, isina ingan launa, kenca si e mulih ia.
17 Mis kiam pelayan e njumpai diberu e, nina, “Bere sitik lau si lit bas ingan laundu ena man bangku.”
18 Nina diberu e ngaloi, “Minemken, Tuanku.” Mis penusur diberu e ingan launa janah berena ia minem.
19 Kenca berena pelayan Abraham e minem, nina ka, “Kubuat ka lau man unta-untandu seh asa puas unta-untandu e minem.”
20 Emaka mis amburkenna lau arah ingan launa ku ingan minem unta-unta. Mulih-ulih ia ku sumur e muat lau, terus buatna lau man kerina unta-unta pelayan e.
21 Jengang pelayan e mperdiateken diberu e, sitik pe la ia ngerana. Rukur ia, sampati Jahwe nge ia ntah lang bas ngelakoken kai si enggo iperentahken man bana.
22 Kenca dung minem unta-unta e, bere pelayan e anting-anting igung si iban arah emas si beratna hampir 6 gram* bage pe dua gelang emas si beratna 114 gram* man diberu e.
23 Kenca si e nina man diberu e, “Adi banci kuteh, anak ise kam? Lit nge ingan kami erberngi bas rumah bapakndu?”
24 Megi si e nina diberu e man bana, “Aku anak Betuil,+ bapakku anak Nahur ras Milka.”+
25 Nina ka, “Lit ingan erberngi bas rumah kami, lit ka gagaten ras melala pangan man asuh-asuhen.”
26 Kenca si e, sujud dilaki e i lebe-lebe Jahwe,
27 nina, “Terpujilah Jahwe, Dibata tuanku Abraham, perban enggo cidahkenNa kekelengenNa si setia man tuanku, lalap tepatiNa janjiNa man tuanku. Enggo tegu-tegu Jahwe aku ku rumah senina tuanku.”
28 Emaka kiam diberu e, ceritakenna kai si terjadi man mamakna bage pe man keluargana.
29 Lit abang Ribka gelarna Laban.+ Emaka kiam Laban ndahi pelayan ndai si sangana i deher sumur.
30 Kenca idahna anting-anting bas igung bage pe gelang bas tan adekna Ribka, janah kenca begina cerita Ribka kerna kai si ikataken pelayan e, jumpai Laban pelayan ndai si sangana tedis i samping unta-untana i deher sumur.
31 Nina man pelayan e, “O kam si ipasu-pasu Jahwe. Engkai maka darat kam tedis? Ota ku rumahku, enggo kusikapken inganndu bage pe ingan unta-untandu.”
32 Emaka ikut pelayan e ku rumah Laban. Penusurna* barang-barang si lit i datas unta e. Berena gagaten bage pe pangan man unta-unta e. Babana ka lau guna nuci nahe pelayan e bage pe kalak si ikut ras ia.
33 Tapi, kenca enggo sikap pangan i lebe-lebena, nina pelayan e, “Aku lenga banci man adi lenga kupeseh kai si arus kukataken.” Emaka nina Laban, “Katakenlah!”
34 Kenca si e nina pelayan e, “Aku pelayan Abraham.+
35 Mbelin kel pasu-pasu Jahwe man tuanku e, banNa ia seh kel bayakna. BerekenNa man bana biri-biri ras lembu, pirak ras emas, budak-budak si dilaki ras si diberu, bage pe unta-unta ras kelede-kelede.+
36 Selain si e, amin pe Sara diberu tuanku enggo metua,+ lahirkenna sekalak anak dilaki man tuanku janah bereken tuanku pagi kerina si lit bas ia man anakna.+
37 Emaka suruh tuanku aku ersumpah, nina, ‘Ula kel buatndu sekalak singuda-nguda arah kalak Kanaan si tading i sekelilingku jadi diberu anakku.+
38 Tapi arus kam lawes ku rumah bapakku bage pe ku keluargaku,+ buatlah sekalak singuda-nguda jadi diberu anakku.’+
39 Tapi ningku man tuanku, ‘Uga adi diberu e la nggit ikut ras aku?’+
40 Nina man bangku, ‘Jahwe, Dibata si kusembah,*+ suruhNa pagi malekatNa+ negu-negu kam, pasti berhasil banNa perdalanenndu. Arus buatndu sekalak singuda-nguda jadi diberu anakku arah keluargaku ras arah rumah bapakku nari.+
41 Adi enggo jumpa kam ras keluargaku janah adi la berena singuda-nguda e man bandu, banci kam bebas arah sumpahndu.’+
42 “Ndai, sanga seh aku i sumur, ertoto aku, ningku, ‘O Jahwe, Dibata tuanku Abraham, adi tuhu-tuhu kin ateNdu berhasil aku bas perdalanenku, bagendalah min kari si terjadi.
43 Sanga tedis aku i deher sumur, bagenda ningku kari man sekalak diberu+ si reh muat lau, “Bere sitik man bangku lau si lit bas ingan laundu ena.”
44 Adi nina kari man bangku, “Minemken, kubuat ka lau man unta-untandu,” diberu e me si ipilih Jahwe man anak tuanku.’+
45 “Lenga pe aku dung ertoto bas pusuhku, reh Ribka, babana ingan lau i barana. Lawes ia ku sumur janah buatna lau. Kenca si e kupindo lau inemen man bana.+
46 Emaka minter penusurna ingan launa arah barana nari, nina, ‘Minemkenlah,+ kubuat ka lau man unta-untandu.’ Kenca si e minem aku, unta-untaku pe berena ka minem.
47 Kenca si e kusungkun ia, ‘Anak ise kam?’ nina, ‘Aku anak Betuil, orang tua bapakku eme Nahur ras Milka.’ Emaka kutamaken anting-anting ku igungna ras gelang ku tanna.+
48 Jenari sujud aku i lebe-lebe Jahwe ras kupuji Jahwe, Dibata tuanku Abraham,+ si enggo erban aku jumpa ras anak senina tuanku guna ibereken man anakna.
49 Gundari, katakenlah maka nggit kena ncidahken kekelengen si setia ras kesetian man tuanku. Tapi adi lang, kataken kenalah, gelah kuteh kai si arus kulakoken.”*+
50 Kenca si e nina Laban ras Betuil, “Perban enda arah Jahwe nari la banci kataken kami lang ntah pe ue man bandu.*
51 Enda Ribka ndai. Baba ia, banlah ia jadi diberu anak tuanndu, bagi si kataken Jahwe.”
52 Sanga begi pelayan Abraham kata-kata e, mis ia sujud i lebe-lebe Jahwe.
53 Emaka pedarat pelayan e barang-barang si iban arah pirak ras emas bage pe melala baju janah berekenna man Ribka. Berekenna ka barang-barang si merga man abang Ribka ras mamakna.
54 Kenca si e, man ras minem pelayan e bage pe kalak si ikut ras ia, dung e erberngi kalak e i je.
Kenca medak pelayan e erpagi-pagi, nina, “Bere min aku mulih ku tuanku.”
55 Megi si e nina abang Ribka ras mamakna, “Bere min Ribka tading ras kami silang-langna sepuluh wari nari. Kenca si e kari banci ia lawes.”
56 Tapi nina pelayan ndai man kalak e, “Ula halangindu aku. Enggo berhasil ban Jahwe perdalanenku. Pediat min aku lawes, gelah banci aku mulih ku tuanku.”
57 Emaka nina kalak e, “Mari silebuh Ribka gelah sisungkun uga pendapatna.”
58 Lebuh kalak e Ribka, sungkun kalak e ia, “Nggit nge kam ikut ras ia?” Nina ngaloi, “Ue, nggit aku.”
59 Emaka pediat keluargana Ribka+ lawes bage pe si ngasuh*+ ia, pelayan Abraham, ras dilaki-dilaki si ikut ras pelayan Abraham.
60 Pasu-pasu kalak e Ribka, nina man bana, “Ribka, mbera-mbera erjuta-juta teremna keturunenndu. Mbera-mbera rebut keturunenndu kota-kota* kalak si rate segat man bana.”+
61 Kenca si e, ersikap Ribka ras pelayan-pelayanna si diberu, janah nangkih ia ku unta, jenari ikutkenna pelayan e. Emaka baba pelayan e Ribka janah teruskenna perdalanenna.
62 Isak tading bas taneh Negep.*+ E denga ia reh arah Beer-lahai-roi.+
63 Sanga ben wari, erdalan-dalan Isak bas mbalmbal janahna rukur.+ Kenca si e idahna reh melala unta.
64 Ribka pe idahna Isak, emaka minter ia nusur arah unta nari.
65 Kenca si e nina Ribka man pelayan e, “Ise dilaki si bas mbalmbal ah si reh ku jenda?” Nina pelayan e, “Ia kap tuanku.” Emaka minter buat Ribka selendang nutupi takalna.
66 Ceritaken pelayan e man Isak kerina si enggo ilakokenna.
67 Kenca si e baba Isak me Ribka ku kemah Sara mamakna.+ Banna Ribka jadi diberuna, turah atena ngena man Ribka.+ E erban Isak lanai sedih perban mamakna enggo mate.+
Cataten i teruh
^ As. “Tamalah tanndu i teruh pahaku.” Banci jadi bagenda cara guna ngesahken sumpah.
^ As. “10 sekel.”
^ Mungkin Laban si mpenusursa.
^ As. “si i lebe-lebeNa aku erdalan.”
^ As. “kuteh arus ku kanan ntah ku kiri.”
^ Ntah “la banci kataken kami si la mehuli ntah si mehuli man bandu.”
^ Maksudna, si ngasuh ia si dungna jadi pelayanna.
^ As. “gerbang.”
^ Ntah “Selatan.”
