Kejadin 26:1-35
26 Terjadi ka kelihen i negri e, bagi si pernah terjadi bas jaman Abraham.+ Emaka jumpai Isak me Abimelek i Gerar. Abimelek e raja kalak Pilisti.
2 Jumpai Jahwe me Isak janah nina, “Ula kam lawes ku Mesir. Tadinglah kam bas negri si Kutuduhken pagi man bandu.
3 Tadinglah bas negri e+ jadi kalak asing. Lalap pagi kam Kutemani ras Kupasu-pasu. Perban Kubere pagi kerina negri e+ man bandu ras man keturunenndu. Kutepati pagi sumpahKu si pernah Kukataken man bapakndu Abraham.+ NingKu mbarenda bana,
4 ‘Enterem pagi Kuban keturunenndu bali buena bagi bintang i langit,+ Kubereken pagi kerina taneh enda+ man keturunenndu. Dat pasu-pasu pagi kerina bangsa i doni arah keturunenndu,’+
5 perban ibegiken Abraham kataKu, terus lakokenna si ngena ateKu, ikutkenna perentahKu, peraturenKu, ras undang-undangKu.”+
6 Emaka Isak tetap tading i Gerar.+
7 Lalap sungkun dilaki-dilaki bas daerah e kerna diberuna, nina njawapsa, “Ia adekku.”+ Ribka seh kel jilena,+ emaka mbiar Isak ngatakenca ia diberuna, nina bas ukurna, “Banci jadi bunuh dilaki-dilaki bas daerah e pagi aku perban Ribka.”
8 Kenca piga-piga waktu, sanga Abimelek raja kalak Pilisti ngenen ku darat arah jendela nari, idahna mesra kel* Isak ras diberuna Ribka.+
9 Mis lebuhna Isak, nina man bana, “Diberundu kepeken ia! Engkai maka nindu ia adekndu?” Nina Isak ngaloi, “Bage ningku sebap mbiar aku ibunuh perban ia.”+
10 Tapi nina Abimelek, “Engkai maka bage banndu man kami?+ Uga adi lit kalak arah bangsa enda si medem ras diberundu? Pasti erdosa kami gara-gara kam!”+
11 Kenca si e, bere Abimelek perentah man kerina rakyatna, nina, “Ise pe si nakiti dilaki e bage pe diberuna pasti ibunuh!”
12 Mulai Isak nuan-nuan benih bas negri e, janah bas tahun e saja hasilna lit 100 kali lipat, perban ipasu-pasu Jahwe ia.+
13 Melala ertana janah terus ia berhasil, dungna bayak kel ia.
14 Lit rarasen biri-birina ras lembuna, janah melala kel budak-budakna.+ Cian ate kalak Pilisti man bana.
15 Emaka buat kalak Pilisti taneh janah tutupna kerina sumur si enggo igali pelayan-pelayan Abraham sanga Abraham nggeluh denga.+
16 Nina Abimelek man Isak, “Laweslah kam jenda nari, perban enggo ndauh gegehen kam asangken kami.”
17 Lawes Isak je nari janah ibanna kemahna i Lembah* Gerar,+ tading ia i je.
18 Igali Isak mulihi sumur-sumur si mbarenda pernah igali sanga Abraham bapakna nggeluh denga. Sebap sumur e enggo itutup kalak Pilisti kenca Abraham mate.+ Banna gelar sumur-sumur e bagi gelar si iban bapakna mbarenda.+
19 Sanga pelayan-pelayan Isak nggali i lembah,* idat kalak e sada sumur si bersih launa.
20 Nina permakan-permakan i Gerar, “Enda lau kami!” Dungna rubati kalak e ras permakan-permakan Isak. Emaka igelari Isak sumur e Esek,* perban kalak e rubati ras ia.
21 Igalina ka sumur si deban, tapi rubati ka kalak e kerna si e. Emaka igelari Isak sumur e Sitnah.*
22 Emaka lawes kalak e je nari janah igalina sumur si deban, tapi i je la lit perubaten. Igelari Isak sumur e Rehobot,* janah nina, “Enda perban enggo ibere Jahwe ingan si mbelang man banta janah banNa kita reh teremna i negri e.”+
23 Kenca si e lawes ia ku Berseba.+
24 Berngina, jumpai Jahwe me Isak janah nina, “Aku kap Dibata bapakndu Abraham.+ Ula kam mbiar,+ perban Aku ras kam. Kupasu-pasu kam janah Kuban pagi enterem keturunenndu guna budakKu Abraham.”+
25 Emaka iban Isak ingan nutung* persembahen i je janah ipujina* gelar Jahwe.+ Ban Isak ka kemahna i je+ janah igali pelayan-pelayanna sada sumur.
26 I bas pudi wari, reh Abimelek arah Gerar nari radu ras Ahusat penasehatna bage pe Pikol peminpin pasukenna+ ndahi Isak.
27 Nina Isak man kalak e, “Engkai maka dahi kena aku? La kin nembeh ate kena aku janah pelawes kena aku arah ingan kena nari?”
28 Emaka nina kalak e, “Enggo jelas idah kami maka Jahwe kap ras kam.+ Emaka putusken kami erban perjanjin ras kam, janah ersumpahlah+
29 maka la lakokenndu kai si la mehuli man kami bagi kami la ngelakoken kai si la mehuli man bandu. Si mehuli ngenca lakoken kami man bandu janah pediat kami kam lawes alu dame. Kam kalak si ipasu-pasu Jahwe.”
30 Kenca si e iban Isak pesta man kalak e, jenari man ras minem kalak e.
31 Paginna, lampas kalak e medak janah ersumpah kalak e sada ras si debanna.+ Jenari pediat Isak kalak e lawes alu dame.
32 Bas wari e reh pelayan-pelayan Isak janah laporkenna man Isak kerna sumur si igali kalak e.+ Nina kalak e man bana, “Enggo idat kami lau!”
33 Emaka ban Isak gelar sumur e Siba. E me sebapna kota e igelari Berseba+ seh asa gundari.
34 Sanga umur Esau 40 tahun empoina dua diberu, gelarna eme Judit anak Beeri ras Basmat anak Elon. Duana diberu e kalak Het.+
35 Enda erban latih kel ukur Isak ras Ribka.+
Cataten i teruh
^ Ntah “idahna sidakepen.”
^ Ertina “Perubaten.”
^ Ertina “Tuduhen.”
^ Ertina “Ingan si Mbelang.”
^ As. “erlebuh ia man.”
