Kejadin 29:1-35
29 Kenca si e, terusken Jakup perdalanenna janah lawes ia ku negri Timur.
2 Idahna sada sumur i mbalmbal bage pe telu rarasen biri-biri si sangana medem-medem i deher sumur e. Biasana arah sumur e nari bere permakan-permakan rarasenna minem. Lit batu si galang si nutupi sumur e.
3 Kenca pulung kerina rarasen biri-biri e i je, gulingken permakan-permakan e me batu si nutupi sumur e, berena rarasen e minem. Kenca si e tutupna mulihi sumur e alu batu ndai.
4 Emaka nina Jakup man kalak e, “O Senina, ja kena tading?” Nina kalak e ngaloisa, “Kami arah Haran nari.”+
5 Nina Jakup man kalak e, “Tandai kena nge Laban+ kempu Nahur?”+ Nina kalak e ngaloisa, “Ue, tandai kami.”
6 Nina Jakup ka man kalak e, “Me sehat nge ia?” Nina kalak e, “Ue, sehat. Ah Rahel+ anakna, si sangana reh ras biri-birina.”
7 Kenca si e nina Jakup, “Enda ciger denga, lenga waktuna biri-biri e ikandangken. Bere minemlah biri-biri e, dung e bere man.”
8 Megi si e, nina kalak e, “Adi enggo pulung kerina biri-biri e janah enggo gulingken permakan-permakan batu si nutupi sumur e, emaka banci bere kami minem.”
9 Sanga ngerana denga Jakup ras kalak e, reh Rahel maba biri-biri bapakna, perban Rahel sekalak permakan.
10 Sanga idah Jakup Rahel bage pe biri-biri Laban, mis gulingken Jakup batu si nutupi sumur e, kenca si e berena minem biri-biri Laban. Laban e mama Jakup.
11 Ema Jakup me Rahel janahna nderkuh.
12 Ceritaken Jakup man Rahel maka ia keluarga bapak Rahel janah ia anak Ribka. Emaka kiam Rahel janah ceritakenna man bapakna.
13 Kenca begi Laban+ laporen kerna Jakup, kiam ia njumpai Jakup, anak turangna e. Dakepna Jakup janah emana ia jenari babana ku rumahna. Emaka ceritaken Jakup man Laban kerina si enggo terjadi.
14 Nina Laban man Jakup, “Payo kam keluargaku.”* Emaka tading Jakup ras Laban sada bulan dekahna.
15 Nina Laban man Jakup, “Amin pe kam keluargaku,+ labo ertina la kam dat kai pe adi sampatindu aku. Emaka katakenlah, kai atendu upahndu?”+
16 Lit dua anak Laban diberu, sintua gelarna Lea, si nguda gelarna Rahel.+
17 Mata Lea la menarik, tapi Rahel seh kel jilena.
18 Ngena ate Jakup man Rahel, emaka nina man Laban, “Nggit aku erdahin man bandu pitu tahun dekahna guna ndatken Rahel, anakndu si nguda.”+
19 Megi si e nina Laban, “Padin kuakap ia man bandu asangken man dilaki si deban. Tetaplah kam tading ras aku.”
20 Emaka erdahin Jakup pitu tahun dekahna guna ndatken Rahel.+ Tapi e bagi piga-piga wari ngenca akapna perban ngena kel atena Rahel.
21 Kenca si e nina Jakup man Laban, “Enggo dem pitu tahun aku erdahin ras kam, berekenlah ia man bangku gelah kuban ia jadi diberuku.”*
22 Emaka ban Laban pesta janah undangna kerina kalak si lit bas ingan e.
23 Tapi bas berngi e, si bere Laban man Jakup eme Lea gelah erhubungen seks Jakup ras Lea.
24 Bereken Laban ka budakna si diberu eme Silpa jadi budak+ Lea anakna.
25 Pepaginna, teh Jakup maka Lea kepeken si medem ras ia! Emaka nina man Laban, “Engkai maka bage banndu man bangku? Me guna ndatken Rahel nge aku erdahin man bandu? Engkai maka tipundu aku?”+
26 Nina Laban, “I jenda la biasa adi anak si nguda leben ipejabu asangken kakakna.
27 Dalanindu lebe sada minggu enda ras anakku sintua, kenca si e kubereken ka anakku si nguda man bandu. Tapi arus kam erdahin man bangku pitu tahun nari.”+
28 Emaka dalani Jakup sada minggu e ras anak Laban sintua. Kenca si e bereken Laban anakna eme Rahel man Jakup jadi diberuna.
29 Selain si e, bereken Laban budakna si diberu eme Bilha+ jadi budak+ Rahel anakna.
30 Kenca si e, erhubungen seks Jakup ras Rahel, janah ngenan ate Jakup man Rahel asangken man Lea. Erdahin Jakup pitu tahun+ nari man Laban.
31 Sanga idah Jahwe maka la ngena ate* Jakup man Lea, banNa Lea banci hamil,*+ tapi Rahel mandul.+
32 Emaka hamil Lea, lahirkenna sekalak anak dilaki, banna gelarna Ruben,*+ sebap nina, “Perban enggo perdiateken Jahwe uga suina+ pusuhku. Gundari pasti enggo ngena ate dilakiku aku.”
33 Hamil ka ia janah lahirkenna sekalak anak dilaki. Kenca si e nina, “Perban enggo begi Jahwe maka la ngena ate dilakiku aku, bereNa ka aku anak enda.” Emaka banna gelarna Simeon.*+
34 Hamil ka ia janah lahirkenna sekalak anak dilaki. Kenca si e nina, “Gundari pasti reh deherna dilakiku man bangku, perban enggo kulahirken telu anak dilaki man bana.” Emaka banna gelarna Lewi.*+
35 Hamil ka ia janah lahirkenna sekalak anak dilaki. Kenca si e nina, “Gundari kupuji Jahwe.” Emaka banna gelarna Juda.*+ Kenca si e lanai ia hamil bas piga-piga waktu.
Cataten i teruh
^ As. “kam tulan ras dagingku.”
^ Ntah “gelah erhubungen seks aku ras ia.”
^ As. “maka segat ate.”
^ As. “bukaNa rahim Lea.”
^ Ertina “Nenlah, Sekalak Anak Dilaki!”
^ Ertina “Ibegi.”
^ Ertina “Ipersada.”
^ Ertina “Ipuji; Si Ipuji.”
