Kejadin 3:1-24
3 Arah kerina binatang liar si ciptaken Dibata Jahwe i doni, nipe+ si cerdikna* kel. Nina nipe man diberu e, “Tuhu nge kataken Dibata la banci pan kena kerina buah batang kayu si lit i taman enda?”+
2 Nina diberu e man nipe ndai, “Buah batang kayu si lit i taman+ enda banci nge pan kami.
3 Tapi kerna buah batang kayu si lit i tengah-tengah taman e,+ nina Dibata, ‘La banci pan kena, jemak kena pe la banci. Sebap adi bage ban kena, mate kena.’”
4 Megi si e, nina nipe man diberu e, “Pasti labo kena mate.+
5 Sebap teh Dibata, bas wari pan kena buah e, terbuka mata kena, bali kena bagi Dibata, meteh si mehuli ras si jahat.”+
6 Emaka, tatap diberu e buah batang kayu ndai janah cocok kapna man pangan, menarik kapna buah e, mejile man tatapen. Dungna putikkenna buah e janah panna.+ Kenca si e, sanga ia ras dilakina, berekenna deba man bana, jenari pan dilakina ka buah e.+
7 Dungna terbuka mata kalak e janah sadarina maka kalak e tilanjang. Jenari jait kalak e bulung ara guna nutupi dagingna.+
8 Karabenna, sanga rembus angin, begi kalak e sora Dibata Jahwe si sangana erdalan bas taman e. Emaka cebuni dilaki e ras diberuna i antara batang kayu si lit i taman e, gelah ula idah Jahwe kalak e.
9 Lalap lebuh Dibata Jahwe dilaki e, nina, “I ja kam?”
10 Dungna ngaloi dilaki e, “Kubegi nge soraNdu i taman, tapi mbiar aku perban aku tilanjang, emaka cebuni aku.”
11 Nina Dibata man bana, “Ise ngatakenca kam tilanjang?+ Enggo panndu buah batang kayu si Kularang e?”+
12 Nina dilaki e, “Diberu si berekenNdu man bangku e nge si mereken buah batang kayu e, emaka kupan.”
13 Kenca si e nina Dibata Jahwe man diberu e, “Engkai maka bage banndu?” Nina diberu e njawapsa, “Tipu nipe ah aku, emaka kupan.”+
14 Kenca si e nina Dibata Jahwe man nipe e,+ “Perban perbahanenndu e, arah kerina asuh-asuhen ras kerina binatang liar si lit i doni, kam ngenca si kena sumpah. Alu beltekndu pagi kam njoler, abu si jadi panganndu segedang geluhndu.
15 Kuban pagi kam+ ras diberu+ e ermusuhen,+ keturunenndu+ ras keturunenna+ pe ermusuhen. Perperkenna pagi takalndu+ janah tagutndu pagi tumitna.”*+
16 Nina Dibata ka man diberu e, “Latih pagi akapndu sanga kam hamil, mesui pagi akapndu sanga melahirken. Lalap pagi atendu ras dilakindu janah kuasaina pagi kam.”
17 Man Adam* nina Dibata, “Perban begikenndu diberundu janah panndu buah batang kayu si enggo Kuperentahken,+ ‘La banci panndu,’ isumpahi me taneh perban perbahanenndu e.+ Guna ndatken hasilna, latih pagi akapndu segedang geluhndu.+
18 Turah pagi peren si erduri ras dukut-dukut i taneh. Sinuan-sinuan pagi si jadi panganndu.
19 Curcur pagi panasndu muat nakanndu seh asa mulihken kam ku taneh, sebap arah taneh nari kam iban.+ Perban kam arah taneh, mulihken ka pagi kam ku taneh.”+
20 Kenca si e ban Adam gelar diberuna Hawa,* perban ia si jadi nande kerina kalak si nggeluh.+
21 Ban Dibata Jahwe baju si gedang arah kulit nari man Adam ras diberuna, jenari pake kalak e.+
22 Kenca si e nina Dibata Jahwe, “Manusia e enggo bali bagi kita, enggo tehna kai si mehuli ras si jahat.+ Gelah ula buatna buah batang kayu kegeluhen,+ jenari panna janah nggeluh ia rasa lalap,—”
23 Emaka pelawes Dibata Jahwe kalak e arah Taman Eden+ nari guna ngurus taneh si arah je ia iban.+
24 Kenca pelawesNa manusia e, tamaNa kerubim-kerubim*+ i sebelah timur Taman Eden ras pedang si lit apina si terus erputar-putar njagai dalan ku batang kayu kegeluhen.
Cataten i teruh
^ Ntah “hati-hatina.”
^ Ntah “tukul-tukulna.”
^ Ertina “Manusia.”
^ Ertina “Kalak si Nggeluh.”
^ Kerubim maksudna malekat si meganjang kedudukenna.