Kejadin 30:1-43
30 Perban lenga lit anak si lahirken Rahel man Jakup, cemburu ia man kakakna janah nina man Jakup, “Bere aku anak, adi lang pasti aku mate.”
2 Megi si e merawa kel Jakup man Rahel, janah nina, “Akapndu kin aku Dibata si erban kam la banci melahirken?”
3 Emaka nina Rahel, “Enda Bilha,+ budakku si diberu. Erhubungen sekslah kam ras ia, mbera-mbera lahirkenna pagi anak man bangku,* alu bage banci lit anakku arah ia.”
4 Emaka bereken Rahel budakna si diberu eme Bilha jadi diberu Jakup. Kenca si e erhubungen seks Jakup ras Bilha.+
5 Hamil Bilha janah lahirkenna sekalak anak dilaki man Jakup.
6 Kenca si e nina Rahel, “Dibata enggo jadi hakimku janah begikenNa totoku, emaka berekenNa aku sekalak anak dilaki.” E me sebapna iban Rahel gelar anak e Dan.*+
7 Hamil ka Bilha, budak Rahel e, janah lahirkenna ka sekalak anak dilaki man Jakup.
8 Kenca si e nina Rahel, “Enggo kupekeri gegehku ergulat ras kakakku janah aku si menang.” Emaka banna gelar anak e Naptali.*+
9 Perban akap Lea lanai ia banci melahirken, berena Silpa budakna si diberu jadi diberu Jakup.+
10 Lahir me sekalak anak dilaki man Jakup arah Silpa, budak Lea e.
11 Kenca si e, nina Lea, “Runtung kel aku!” Emaka banna gelar anak e Gat.*+
12 Kenca si e lahir ka anak dilaki si peduaken man Jakup arah Silpa nari, budak Lea e.
13 Emaka nina Lea, “Seh kel riahna ukurku! Perban kerina diberu pasti ngataken aku ermeriah ukur.”+ Banna gelar anak e Aser.*+
14 Bas musim peranin gandum, erdalan-dalan Ruben+ i juma, janah datna buah dudaim.* Emaka berekenna man Lea mamakna. Kenca si e nina Rahel man Lea, “Nta dage sitik buah dudaim si baba anakndu ena.”
15 Megi si e nina man Rahel, “Lenga kin kam puas enggo buatndu dilakiku?+ Gundari, buatndu ka atendu buah dudaim anakku?” Emaka nina Rahel, “Adi berendu bangku buah dudaim anakndu ena, banci kam medem ras Jakup berngi enda.”
16 Karabenna, sanga mulih Jakup juma nari, jumpai Lea ia janah nina, “Ras aku kam medem berngi enda, perban enggo kubereken buah dudaim anakku man Rahel jadi penggalarna.” Emaka ras Lea me Jakup medem berngi e.
17 Begi Dibata janah jawapNa toto Lea. Hamil ka Lea janah lahirkenna anak dilaki si pelimaken man Jakup.
18 Emaka nina Lea, “Bereken Dibata upahku perban enggo kubereken budakku man dilakiku.” Banna gelar anak e Isakar.*+
19 Hamil ka Lea janah lahirkenna anak dilaki si peenemken man Jakup.+
20 Emaka nina Lea, “Enggo bereken Dibata aku hadiah si mehuli. Gundari pasti enggo aloken dilakiku aku,+ perban enggo kulahirken anak dilaki si peenemken man bana.”+ Banna gelar anak e Sebulon.*+
21 Kenca si e lahirkenna sekalak anak diberu janah banna gelarna Dina.+
22 Dungna inget Dibata me Rahel, jawapNa totona janah banNa ia banci hamil.*+
23 Hamil ia janah lahirkenna sekalak anak dilaki. Kenca si e nina, “Enggo masapken Dibata si erban aku mela.”+
24 Emaka banna gelar anak e Jusup,*+ janah nina, “Enggo bereken Jahwe ka anak dilaki man bangku.”
25 Kenca ilahirken Rahel si Jusup, nina Jakup man Laban, “O Ma, pediatlah aku lawes, gelah banci aku mulih ku keluargaku bage pe negriku.+
26 Pediatlah aku lawes ras diberu-diberuku bage pe ras anak-anakku. Sebap tehndu, kudat pe kalak e perban enggo kerja keras aku erdahin man bandu.”+
27 Kenca si e nina Laban man bana, “Mindo aku, tadinglah kam ras aku. Sebap enggo kuidah piga-piga tanda si mbuktiken maka perban kam nge aku ipasu-pasu Jahwe.”
28 Nina ka, “Kataken bangku, kai atendu upahndu, gelah kubereken.”+
29 Emaka nina Jakup man bana, “Tehndu maka enggo setia aku erdahin man bandu, enggo sikap kuban njaga asuh-asuhenndu.+
30 Ope lenga aku reh, sitik ngenca asuh-asuhenndu, tapi gundari enggo reh buena. Enggo ipasu-pasu Jahwe kam mulai kin aku reh. Gundari man keluargaku ateku erdahin.”+
31 Kenca si e nina Laban, “Kai kin atendu kubere man bandu?” Nina Jakup, “La padah kai pe berendu bangku. Tapi adi lakokenndu kai si kupindo, terus pagi kupermakani ras kujaga asuh-asuhenndu.+
32 Gundari, mari sinen kerina kambing ras biri-birindu. Pisahken kerina biri-biri si belang-belang ras si erbintik, bage pe kerina biri-biri jantan si nguda denga si warnana coklat tua. Pisahken ka kerina kambing beruna si belang-belang ras erbintik. Gundari nari, kambing ras biri-biri si bage me jadi upahku.+
33 Tehndu nge pagi perbahanenku jujur ntah lang alu mereksa kambing ras biri-biriku. Adi lit i je kambing beruna si la belang-belang ntah pe la erbintik janah adi lit biri-biri jantan si nguda si warnana la coklat tua, enda ertina enggo kutangko jangndu.”
34 Megi si e nina Laban, “Adi bage cocok yah, banlah bagi si katakenndu ena.”+
35 Emaka bas wari e, pisahken Laban kerina kambing jantan si loreng ras belang-belang bage pe kambing beruna si belang-belang ras erbintik, eme kerina si lit sitik warna mbentar i kulitna. Pisahkenna ka kerina biri-biri jantan si nguda si warnana coklat tua. Anak-anak Laban si dilaki me si suruh Laban ngurussa.
36 Kenca si e, tadingken Laban me Jakup janah lawes ia ras asuh-asuhenna ndai ku ingan si dauhna telu wari perdalanen. Permakani Jakup kambing ras biri-biri si tadingken Laban man bana.
37 Tektek Jakup dahan-dahan batang storaks, batang almond, ras batang platanus. Kulitina dahan kayu e seh asa teridah bagin si arah bas si warna mbentar si erbintik.
38 Kenca si e, tamana dahan-dahan si enggo ikuliti ndai i lebe-lebe kambing ras biri-biri e, eme ku bas ingan asuh-asuhen e biasana minem, gelah sanga reh asuh-asuhen e minem, kawin asuh-asuhen e i lebe-lebe dahan e.
39 Emaka kawin asuh-asuhen e i lebe-lebe dahan kayu ndai. Jenari lahir anak-anakna si erbintik, loreng, ras belang-belang.
40 Kenca si e pisahken Jakup biri-biri jantan si nguda denga. Banna asuh-asuhen Laban sihadap-hadapen ras asuh-asuhen si warna coklat tua bage pe si loreng. Dung e, pisahkenna asuh-asuhenna ras asuh-asuhen Laban.
41 Kawin kenca ate asuh-asuhen si megegeh, tama Jakup dahan-dahan e bas ingan asuh-asuhen e biasana minem, gelah asuh-asuhen e kawin janahna ngenen dahan-dahan e.
42 Tapi adi asuh-asuhen si lemah si kawin, la tamana dahan-dahan e i je. Alu bage asuh-asuhen si lemah si lalap jadi jang Laban, tapi si megegeh jadi jang Jakup.+
43 Reh bayakna Jakup, janah melala kambingna, biri-birina, untana, keledena,+ budak-budakna si dilaki, ras budak-budakna si diberu.
Cataten i teruh
^ As. “melahirken ia i datas tiwenku.”
^ Ertina “Hakim.”
^ Ertina “Ergulat Aku.”
^ Ertina “Runtung.”
^ Ertina “Ermeriah Ukur; Keriahen Ukur.”
^ Pan diberu buah e perban akapna e banci nampati ia gelah hamil.
^ Ertina “Ia kap Upah e.”
^ Ertina “Ialoken.”
^ As. “begiken Dibata ia janah bukaNa rahimna.”
^ Singkaten arah Josipia, si ertina “Mbera-Mbera Tambahken Jahwe.”
