Kejadin 31:1-55
31 Ibegi Jakup anak-anak Laban ngerana, nina, “Enggo buat Jakup kerina si lit bas bapakta, emaka ia jadi bayak.”+
2 Idah Jakup ayo Laban maka Laban lanai bagi si biasa man bana.+
3 Emaka nina Jahwe man Jakup, “Mulihlah ku negri nini bulangndu bage pe ku keluargandu,+ lalap nge pagi Aku ras kam.”
4 Emaka dilo Jakup me Rahel ras Lea gelah reh ku mbalmbal inganna mpermakani kambing ras biri-birina,
5 janah nina man kalak e,
“Kuidah bapak kena lanai bagi biasa+ man bangku, tapi Dibata si isembah bapakku terus nge ras aku.+
6 Kena pe teh kena nge maka enggo kerja keras+ aku erdahin man bapak kena.
7 Tapi cubaken bapak kena nipu aku janah enggo sepuluh kali ubahna upahku. Tapi la pediat Dibata aku rugi.
8 Adi nina Laban upahku eme kambing ras biri-biri si erbintik, kerina anak-anak kambing ras biri-biri e erbintik. Tapi adi nina Laban upahku eme kambing ras biri-biri si loreng, kerina anak-anak kambing ras biri-biri e loreng.+
9 Lalap buat Dibata asuh-asuhen bapak kena janah berekenNa man bangku.
10 Sanga asuh-asuhen e musim kawin, ernipi aku. Kuidah bas nipiku e, kerina kambing jantan si kawin ras kambing beruna warnana loreng, erbintik, ras belang-belang.+
11 Kenca si e, ngerana malekat Dibata si benar man bangku bas nipi, nina, ‘Jakup!’ ningku ngaloisa, ‘Kai, Tuan?’
12 Nina* ka, ‘Enggo Kuperdiateken kerina si lakoken Laban man bandu,+ e me sebapna kerina kambing jantan si kawin ras kambing beruna e warnana loreng, erbintik, ras belang-belang.
13 Aku kap Dibata si benar si njumpai kam i Betel.+ Bas ingan e me amburkenndu minak i datas batu peringeten janah bas ingan e erjanji kam man bangKu.+ Gundari ersikaplah, laweslah arah negri enda nari janah mulihlah ku negri asalndu.’”+
14 Megi si e nina Rahel ras Lea man Jakup, “Lanai lit warisen man kami bas rumah bapak kami.
15 Enggo anggapna kami kalak asing, perban enggo dayakenna kami janah sen si alokenna e pe enggo keri banna.+
16 Kerina erta si enggo buat Dibata arah bapak kami nari situhuna jang kami ras anak-anak kami+ nge. Emaka lakokenlah kerina bagi si perentahken Dibata man bandu.”+
17 Ersikap Jakup janah penangkihna anak-anakna ras diberu-diberuna ku datas unta.+
18 Babana kerina asuh-asuhen ras barang-barang si pepulungna+ i Padan-aram,* janah lawes ia ku negri Kanaan+ ndahi Isak bapakna.
19 Sanga lawes Laban nggunting mbulu biri-birina, tangko Rahel patung berhala*+ keluarga jang bapakna.+
20 Selain si e, Jakup cerdik, lawes ia janah la ngata kai pe man Laban kalak Aram e.
21 Baba Jakup lawes kerina keluargana ras barang-barangna janah sebrangina Lau Eprat.+ Kenca si e lawes kalak e ku daerah pegunungen Gileat.+
22 Telu wari kenca si e, lit si ngataken man Laban maka Jakup enggo kiam.
23 Emaka baba Laban senina-seninana* guna ngayaki Jakup. Pitu wari dekahna maka jumpa kalak e ras Jakup i daerah pegunungen Gileat.
24 Berngina,+ jumpai Dibata me Laban kalak Aram+ e arah nipi, nina, “Ula pagi kam kasar+ ngerana man Jakup.”*
25 Ban Jakup kemahna i daerah pegunungen Gileat janah kemah Laban ras senina-seninana la ndauh arah je nari. Emaka jumpai Laban me Jakup,
26 janah nina man Jakup, “Kai nge si lakokenndu e? Engkai maka tipundu aku janah babandu anak-anakku bagi tabanen perang?
27 Engkai maka tipundu aku janah la kam ngata lawes? Adi ngata min ndai kam, banci min ndai kupeberkat kena alu ermeriah ukur, alu ende-enden, alu rebana, ras harpa.*
28 Tapi la berendu kesempaten gelah banci kuema kempu-kempuku* ras anak-anakku. Motu kel perbahanenndu e.
29 Situhuna banci nge aku jahat man kena, tapi berngi ndai nina Dibata bapakndu man bangku, ‘Ula kam kasar+ ngerana man Jakup.’
30 Kuteh nge maka lawes pe kam perban tedeh atendu mulih ku rumah bapakndu. Tapi engkai maka tangkondu patung berhalaku?”+
31 Nina Jakup man Laban, “Erbuni-buni aku lawes perban mbiar aku buatndu kari anak-anakndu arah aku nari.
32 Bas ise pe kari datndu barang-barangndu e arus ia mate. Pereksalah barang-barangku i lebe-lebe keluargata, adi lit kari datndu barangndu buat saja.” Tapi la teh Jakup maka Rahel si nangko patung berhala e.
33 Emaka masuk Laban ku kemah Jakup, ku kemah Lea, bage pe ku kemah dua budak si diberu e,+ tapi la lit datna. Kenca si e ndarat ia arah kemah Lea nari janah masuk ia ku kemah Rahel.
34 Kepeken enggo tama Rahel patung berhala e bas pelana* unta janah kundul ia i datasna. Emaka la dat Laban sanga daramina bas kerina kemah.
35 Kenca si e nina Rahel man bapakna, “Ula kam merawa ya Pak, sangana aku haid,*+ emaka la banci aku tedis.” Daramina patungna+ ndai alu manjar-anjar, tapi la datna.
36 Dungna merawa Jakup man Laban, nina, “Engkai maka ayak-ayakndu aku bagi sekalak penjahat? Dosa kai kin si enggo kulakoken?
37 Kenca enggo pereksandu kerina barang-barangku, lit dage datndu barangndu ndai? Adi lit, tama dage i lebe-lebe keluargaku ras keluargandu, gelah kalak e si nentuken ise si benar, kam ntah aku.
38 Enggo 20 tahun aku ras kam, la lit kambing ras biri-birindu si keguguren,+ janah la pernah kupan daging biri-biri jantan arah asuh-asuhenndu.
39 Adi lit si iterkam binatang buas,+ labo kubaba man bandu, tapi mis kuganti. Adi lit si nangkosa suari ntah pe berngi, mis tuntutndu gelah kuganti.
40 Bas ciger wari kena las aku, bas berngi wari bergehen aku, janah rusur aku la medem.+
41 Enggo 20 tahun aku tading i rumahndu. Kulayani kam 14 tahun dekahna guna ndatken duana anakndu, janah 6 tahun aku ngurus asuh-asuhenndu. Lalap ubahndu upahku seh asa sepuluh kali.+
42 Adi la min ndai aku lindungi Dibata bapakku,+ eme Dibata si isembah Abraham ras si ihamati Isak,*+ pasti enggo banndu aku lawes janah la maba kai pe. Enggo idah Dibata kesusahenku ras kerja kerasku, emaka persingetiNa kam berngi ndai.”+
43 Kenca si e nina Laban man Jakup, “Enda kerina anak-anakku, kempu-kempuku, ras asuh-asuhenku, janah kerina si idahndu e jangku ras jang anak-anakku. Me la mungkin kusakiti kalak e bage pe anak-anakna?
44 Emaka mari siban perjanjin si jadi saksi antara aku ras kam.”
45 Buat Jakup sada batu janah banna e jadi batu peringeten.+
46 Kenca si e nina Jakup man anak buahna, “Pepulung kenalah batu.” Emaka pepulung kalak e batu-batu janah pegun-gunna. Kenca si e, man kalak e i datas batu si ergun-gun e.
47 Gelari Laban batu e Jegar Sahaduta,* tapi gelari Jakup batu e Galet.*
48 Kenca si e nina Laban, “Gundari, batu si ergun-gun e jadi saksi antara kita.” E me sebapna maka banna gelarna Galet,+
49 ras banna gelarna Menara Penjaga, sebap nina, “Jahwe lah si terus ngawasi aku ras kam, amin pe kita sidauhen.
50 Adi la mehuli perbahanenndu man anak-anakku ntah pe erjabu ka kam ras diberu si deban, ingetlah, amin pe la idah manusia kerna si e tapi Dibata idahNa kap, perban Dibata kap si jadi saksi bas perjanjinta duana.”
51 Nina Laban ka man Jakup, “Batu si ergun-gun ras batu peringeten si kuban e me si jadi tanda perjanjinku ras kam.
52 Batu si ergun-gun ras batu peringeten e jadi saksi,+ maka labo kulewati batu si ergun-gun e guna nyerang kam janah kam pe ula lewatindu batu si ergun-gun e guna nyerang aku.
53 Dibata Abraham+ ras Dibata Nahur bage pe Dibata bapak kalak e si jadi hakimta duana.” Emaka ersumpah Jakup bas gelar Dibata si ihamati Isak bapakna.*+
54 Kenca si e persembahken Jakup korban i gunung e janah undangna kerina keluargana man. Emaka man kalak e janah erberngi i gunung e.
55 Pagi-pagi si lampas medak Laban jenari emana anak-anakna ras kempu-kempuna*+ janah ipasu-pasuna kalak e.+ Kenca si e mulih ia ku rumahna.+
Cataten i teruh
^ Malekat e ngerana jadi wakil Jahwe.
^ Bagin arah Mesopotami.
^ Ntah “dewa keluarga.” As. “terapim.”
^ Ntah “keluargana.”
^ As. “Hati-hatilah, ula sempat katakenndu kai si mehuli ntah pe si la mehuli man Jakup.”
^ Harpa eme alat musik si ersenar bagi gitar, tapi bentukna beda.
^ As. “anak-anakku si dilaki.”
^ Pelana man diberu, si itama i datas unta janah ikunduli, tapi i pelana e lit ka ingan nama barang.
^ As. “sangana terjadi man bangku si biasana terjadi man diberu.”
^ As. “si man baNa Isak mbiar.”
^ Istilah bas bahasa Aram si ertina “Saksi si Ergun-gun.”
^ Istilah bas bahasa Heber si ertina “Saksi si Ergun-gun.”
^ As. “si man baNa Isak bapakna mbiar.”
^ As. “anak-anakna si dilaki.”
