Kejadin 32:1-32
32 Terusken Jakup perdalanenna jenari reh malekat-malekat Dibata njumpai ia.
2 Sanga idah Jakup malekat-malekat e, nina Jakup, “Enda kemah Dibata!” Emaka banna gelar ingan e Mahanaim.*
3 Kenca si e, utus Jakup piga-piga kalak leben njumpai seninana Esau i negri Seir+ si lit bas daerah Edom.+
4 Nina man kalak e, “Bagenda kari ning kena man tuanku Esau, ‘Nina budakndu Jakup, “Enggo ndekah+ aku tading* ras Laban.
5 Enggo melala lembuku, keledeku, biri-biriku, ras budakku si dilaki bage pe si diberu.+ Pesan enda kukirim gelah nggit kam ngalo-ngalo aku alu mehuli, Tuan.”’”
6 Sanga mulih utusen e, nina man Jakup, “Enggo jumpa kami ras seninandu Esau, janah sangana ia bas perdalanen njumpai kam, lit 400 dilaki si ikut ras ia.”+
7 Mbiar kel Jakup janah kuatir ia.+ Emaka bagina rombongenna jadi dua, termasuk kambingna, biri-birina, lembuna, ras unta-untana.
8 Nina Jakup, “Adi iserang Esau rombongen si pertama, rombongen si debanna banci denga kiam.”
9 Kenca si e ertoto Jakup, nina, “O Jahwe, Dibata bulangku Abraham ras Dibata bapakku Isak, Kam kap si nuruh aku mulih ku negriku ras ku keluargaku, janah erjanji Kam masu-masu aku.+
10 La patut budakNdu enda ngaloken kerina kekelengenNdu si setia bage pe kesetianNdu si enggo cidahkenNdu bangku.+ Mbarenda, sada tongkat ngenca si lit bas aku sanga kusebrangi Lau Jordan enda, tapi gundari enggo lit dua rombongen+ ras aku.
11 Mindo kel aku man baNdu,+ selamatkenlah aku arah tan abangku Esau. Mbiar aku reh kari ia nyerang aku+ bage pe nyerang diberu-diberu ras anak-anak.
12 Enggo katakenNdu man bangku, ‘Kupasu-pasu pagi kam, Kuban pagi keturunenndu bagi kersik i laut, si la terkira buena.’”+
13 Erberngi Jakup bas ingan e. Kenca si e buatna piga-piga ertana guna iberekenna man abangna Esau+ jadi hadiah. Hadiahna eme
14 200 kambing beruna, 20 kambing jantan, 200 biri-biri beruna, 20 biri-biri jantan,
15 30 unta beruna ras anak-anakna, 40 lembu beruna, 10 lembu jantan, 20 kelede beruna ras 10 kelede jantan.+
16 Bagina kerina asuh-asuhenna e jadi piga-piga kelompok. Kenca si e berekenna man budak-budakna, janah nina man kalak e, “Leben kena nyebrang. Ban kenalah jarakna antara sada kelompok asuh-asuhen ras kelompok asuh-asuhen si i pudina.”
17 Berekenna ka perentah man budakna si njaga asuh-asuhenna si arah lebe, nina, “Adi jumpa kam kari ras abangku Esau janah adi sungkunna kena, ‘Ise tuanndu? Ku ja atendu? Jang ise kerina asuh-asuhen enda?’
18 Bagendalah nindu kari njawapsa, ‘Enda jang budakndu Jakup. Enda hadiah man tuanku Esau.+ Ia arah pudi denga.’”
19 Berekenna ka perentah man budakna si njaga kelompok asuh-asuhenna si peduaken, si peteluken, bage pe man kerina si ikut ras asuh-asuhenna e, nina, “Bagi si kukataken ndai kari ning kena man Esau adi jumpa kena ras ia.
20 Arus ka kari ning kena, ‘Budakndu Jakup arah pudi denga.’” Kirim Jakup leben+ hadiah e perban banna atena meriah ukur Esau, gelah sanga jumpa kari kalak e, alo-alo Esau ia alu mehuli.
21 Emaka leben budak-budakna nyebrang maba hadiah e, tapi Jakup erberngi i perkemahen.
22 Bas berngi e, medak ia janah babana duana diberuna+ ras duana budakna si diberu+ bage pe 11 anakna si dilaki si kitik denga. Jenari nyebrang kalak e arah penyebrangen si lit i Lau Jabok.+
23 Babana kerina kalak e bage pe kerina ertana nyebrangi lau* e.
24 Sanga Jakup sisada, reh me sekalak dilaki* janah ergulat ia ras Jakup seh asa terang wari.+
25 Kenca teh dilaki e maka la ia banci menang ngelawan Jakup, tagangina sendi paha Jakup emaka ergeser sendi paha Jakup sanga ergulat ras dilaki e.+
26 Kenca si e nina dilaki e, “Lepasken aku, enggo nandangi terang wari.” Nina Jakup, “Adi la pasu-pasundu aku lebe,+ labo kam kulepasken.”
27 Emaka nina man Jakup, “Ise dage gelarndu?” Nina Jakup ngaloisa, “Jakup.”
28 Kenca si e nina dilaki e man bana, “Gelarndu lanai Jakup tapi Israel,*+ perban enggo ergulat kam ras Dibata+ bage pe ras manusia janah kam me si menang.”
29 Kenca si e isungkun Jakup ia, “Kataken dage man bangku ise gelarndu.” Tapi nina dilaki e ngaloisa, “Engkai maka sungkunndu gelarku?”+ Dung e ipasu-pasuna Jakup i je.
30 Emaka ban Jakup gelar ingan e Peniel,*+ sebap nina, “Enggo kuidah ayo Dibata,* tapi tetap aku nggeluh.”+
31 Matawari enggo mulai teridah kenca ilewati Jakup daerah Penuel,* tapi pincang ia erdalan perban tersiher pahana.+
32 E me sebapna maka enggo jadi kebiasan seh asa gundari la ipan kalak Israel urat paha binatang, perban enggo tagangi dilaki ndai sendi paha Jakup.
Cataten i teruh
^ Ertina “Dua Kemah.”
^ Ntah “tading jadi kalak asing.”
^ Malekat si nyamar jadi manusia.
^ Ertina “Ergulat ras Dibata” ntah “Dibata Ergulat.”
^ Ertina “Ayo Dibata.”
^ Maksudna, malekat si jadi wakil Dibata.
^ Ntah “Peniel.”
