Kejadin 34:1-31
34 Dina eme anak Jakup si diberu arah Lea+ nari. Rusur dahi Dina singuda-nguda bas negri e.+
2 Peminpin negri e gelarna Hamor, ia kalak Hewi.+ Anakna gelarna Sikem. Sanga idah Sikem Dina, babakenna Dina janah perkosana.
3 Kenca si e lanai banci lupakenna Dina, anak Jakup e. Enggo turah atena ngena man Dina janah lalap rayuna ia.
4 Dungna, nina Sikem man Hamor+ bapakna, “Pak, lamar min singuda-nguda e gelah banci jadi diberuku.”
5 Begi Jakup maka anakna Dina enggo iperkosa Sikem. Paksa si e, anak-anakna si dilaki sangana bas mbalmbal ras asuh-asuhenna. Emaka sinikken Jakup kerna si e seh asa mulih kalak e.
6 Kenca si e reh Hamor bapak Sikem njumpai Jakup.
7 Tapi sanga begi anak-anak Jakup si dilaki kerna si e, mis kalak e mulih arah mbalmbal nari. Sakit hati janah merawa kel kalak e perban enggo permelaken Sikem Israel alu mperkosa anak Jakup si diberu.+ Perbahanen si bage la patut ilakoken.+
8 Nina Hamor, “Anakku si Sikem ngena kel atena anakndu. Emaka mindo kel aku gelah berendu ia jadi diberu anakku.
9 Sipersada min arihta arah perjabun. Empoi kami singuda-nguda kena janah banci ka empoi kena singuda-nguda kami.+
10 Banci kena tading ras kami i japa pe ate kena tading bas negri enda. Banci kena erbinaga janah ringan i jenda.”
11 Kenca bage nina Sikem man bapak Dina bage pe man abang-abang Dina, “Bereken min pemindonku enda, kubereken ka pagi kerina pemindon kena.
12 Asa kai pe galangna tukur ras hadiah+ si ipindo kena, pasti kubereken gelahna singuda-nguda e banci jadi diberuku.”
13 Perban enggo iperkosa Sikem turang kalak e, emaka tipu anak-anak Jakup atena Sikem ras bapakna.
14 Nina kalak e man Sikem ras Hamor, “La mungkin bereken kami turang kami man dilaki si la isunat,+ sebap e erban kami mela.
15 Nggit kami ngelakokenca, adi lakoken kena syarat enda: arus kena seri bagi kami, kerina kena si dilaki arus isunat.+
16 Kenca si e maka banci bere kami anak-anak kami si diberu man kena, janah buat kami ka anak-anak kena si diberu. Jenari ras kita tading jadi sada bangsa.
17 Tapi adi la kena setuju janah la kena nggit isunat, buat kami turang kami e jenari lawes kami.”
18 Setuju Hamor+ ras Sikem+ man pemindon kalak e.
19 Mis lakoken anak perana e kai si ipindo+ kalak e, perban ngena kel atena anak Jakup. Bas keluarga bapakna, Sikem kap si terhormatna.
20 Emaka lawes Hamor ras Sikem ku gerbang kota janah ngerana ia man dilaki-dilaki si lit bas kota e,+ nina,
21 “Ate kalak e erdame ras kita. Emaka sipediatlah kalak e tading ras erbinaga i negrita sebap mbelang denga nge negrita. Banci siempoi anak-anakna si diberu, janah anak-anakta si diberu pe banci ka empoi kalak e.+
22 Sada ngenca syaratna maka nggit kalak e tading ras kita janah sada bangsa ras kita, eme adi kerina kita si dilaki isunat+ bagi kalak e.
23 Alu bage, erta-ertana, asuh-asuhenna, bage pe kerina si lit bas kalak e jadi jangta ka nge. Emaka silakokenlah syarat si ibanna e gelah nggit kalak e tading ras kita.”
24 Kerina si pulung i gerbang kota e setuju man Hamor ras Sikem. Emaka isunat kerina dilaki si lit bas kota e.
25 Telu wari kenca si e, sanga mesui denga akap kalak e, dua anak Jakup eme abang Dina+ si gelarna Simeon ras Lewi, reh ku kota e janahna maba pedang tapi la lit ise pe si curiga. Jenari bunuhna kerina dilaki bas kota e.+
26 Bunuh kalak e Hamor ras Sikem alu pedang janah babana Dina arah rumah Sikem. Kenca si e lawes kalak e je nari.
27 Reh anak-anak Jakup si dilaki si deban janah idahna kerina dilaki enggo ibunuh. Emaka rampok kalak e kota e perban turangna enggo iperkosa.+
28 Buat kalak e kambing, biri-biri, lembu, kelede ras kai pe si lit bas kota bage pe si lit i mbalmbal.
29 Buatna ka kerina erta kalak e janah tangkapna ras babana kerina diberu kalak e ras anak-anakna si kitik denga. Rampokna ka kerina si lit bas rumah kalak e.
30 Emaka nina Jakup man Simeon ras Lewi,+ “Enggo ban kena aku dat masalah si mbelin.* Enggo segat ate kalak Kanaan ras kalak Peris man bangku. Kita sitik ngenca, pasti pagi pulung kalak e guna nyerang ras munuh aku bage pe keluargata.”
31 Tapi nina kalak e, “Engkai kin maka banna turang kami bagi pelacur?”
Cataten i teruh
^ Ntah “aku itulak.”
