Kejadin 35:1-29
35 Kenca si e nina Dibata man Jakup, “Laweslah kam ku Betel+ janah tading kam i je. Banlah i je sada ingan nutung* persembahen man Dibata si benar, si enggo ncidahken diriNa man bandu sanga kam kiam arah abangndu Esau.”+
2 Emaka nina Jakup man keluargana bage pe kerina kalak si ikut ras ia, “Ambekkenlah kerina dibata-dibata asing si lit bas kena.+ Bersihkenlah diri kena ras ganti baju kena.
3 Ota kita lawes ku Betel. Kuban pagi i je sada ingan nutung persembahen man Dibata si benar, si enggo njawap totoku sanga aku susah janah lalap nemani aku ku ja pe aku lawes.”+
4 Emaka ibereken kalak e kerina dibata-dibata asingna man Jakup bage pe anting-anting cupingna, jenari itanemken* Jakup i teruh batang kayu si galang i deher Sikem.
5 Sanga bas perdalanen, iban Dibata me penduduk kota-kota si lit i sekeliling kalak e mbiar. Emaka la ayaki kalak e anak-anak Jakup.
6 Dungna seh Jakup ras kerina kalak si ras ia i Lus,+ eme Betel si lit i negri Kanaan.
7 Iban Jakup i je sada ingan nutung persembahen janah ibanna gelar ingan e Elbetel,* sebap i je pernah cidahken Dibata si benar diriNa man bana sanga ia kiam arah abangna nari.+
8 Kenca si e mate Debora+ eme pengasuh Ribka. Ikuburken ia i teruh batang kayu si galang* i deher Betel. Emaka iban Jakup gelar ingan e Alon-bakut.*
9 Sanga Jakup bas perdalanen arah Padan-aram* nari, cidahken Dibata ka diriNa sekali nari man Jakup janah ipasu-pasuNa ia.
10 Nina Dibata man Jakup, “Gelarndu Jakup,+ tapi lanai pagi kam ilebuh Jakup. Sebap gundari gelarndu jadi Israel.” Emaka ilebuh Dibata ia Israel.+
11 Nina Dibata ka, “Aku kap Dibata Si Madakuasa.+ Ertambah-tambah janah reh teremnalah. Kam pagi jadi bapak bangsa-bangsa, janah raja-raja rehna arah keturunenndu.*+
12 Negri si enggo Kubereken man Abraham bage pe man Isak, Kubereken ka pagi man bandu ras man keturunenndu.”+
13 Kenca dung ngerana ras Jakup, lawes Dibata je nari.
14 Emaka ban Jakup batu peringeten bas ingan Dibata ngerana man bana, amburkenna persembahen inemen ras minak i datas batu e.+
15 Lalap igelari Jakup ingan e Betel+ perban bas ingan e Dibata ngerana ras ia.
16 Kenca si e berkat kalak e arah Betel nari. Sanga ndauh denga arah Eprat nari, enggo dat waktuna Rahel melahirken, tapi mesera kel akapna melahirken.
17 Sanga erjuang ia melahirken anakna e, nina bidan man bana, “Ula kam mbiar, perban anak dilaki ka si lahirkenndu e.”+
18 Sanga ia nandangi mate (perban nandangi keri kesahna), ibanna gelar anak e Benoni,* tapi igelari bapakna ia Benyamin.*+
19 Emaka mate Rahel janah ikuburken i Betlehem+ eme dalan ku Eprata.
20 Iban Jakup batu si galang i datas kuburen Rahel. Seh asa gundari batu e lit i kuburen Rahel.
21 Kenca si e lawes Israel janah banna kemahna i sebrang Menara Eder.
22 Bas sada wari, sanga Israel tading bas negri e, erhubungen seks Ruben ras Bilha. Bilha e gundik* bapakna, janah ibegi Israel kerna si e.+
Lit 12 kalak anak Jakup si dilaki.
23 Anak si lahirken Lea eme Ruben,+ ia anak Jakup sintua. Kenca si e Simeon, Lewi, Juda, Isakar, ras Sebulon.
24 Anak Rahel eme Jusup ras Benyamin.
25 Anak Bilha budak Rahel e eme Dan ras Naptali.
26 Anak Silpa budak Lea eme Gat ras Aser. Enda ndai me anak Jakup si dilaki si lahir i Padan-aram.
27 Dungna seh Jakup i Mamre+ bas ingan Isak bapakna, i Kiryat Arba, eme Hebron. I je me Abraham ras Isak tading jadi kalak asing.+
28 Lit 180 tahun+ dekahna Isak nggeluh.
29 Dungna mate Isak. Gedang umurna janah puas kel akapna. Ikuburken ia bagi nini bulangna. Si nguburken ia+ eme Esau ras Jakup.
Cataten i teruh
^ Ntah “buniken.”
^ Ertina “Dibata Betel.”
^ Ntah “batang kayu ek.”
^ Ertina “Batang Kayu Ek Perngandungen.”
^ Bagin arah Mesopotami.
^ As. “arah awakndu.”
^ Ertina “Anak si Kulahirken Sanga Aku Erceda Ate.”
^ Ertina “Anak Dilaki arah Tan Kanan,” eme anak kesayangen.
