Kejadin 39:1-23
39 Kenca Jusup ibaba ku Mesir,+ tukur kalak Mesir ia arah kalak Ismael+ nari. Kalak Mesir e gelarna Potipar.+ Ia pegawai istana raja Mesir bage pe kepala pengawal istana.
2 Jusup+ terus itemani Jahwe, emaka berhasil ia bas pendahinna janah ibereken ia tanggung jawap bas rumah tuanna, kalak Mesir e.
3 Idah tuanna maka Jahwe ras ia, janah idahna maka iban Jahwe kerina si idahikenna berhasil.
4 Reh jadina ate tuanna man Jusup janah jadi pelayan pribadina ia. Emaka suruh tuanna ia ngawasi rumahna bage pe kerina ertana.
5 Mulai je nari, terus ipasu-pasu Jahwe rumah kalak Mesir e perban Jusup. Ipasu-pasu Jahwe ka kerina si lit bas rumahna bage pe bas jumana.+
6 Dungna suruhna Jusup si ngurus kerinana, janah lanai perlu ukurina kai pe selain pangan si ipanna. Jusup e mbestang dagingna janah ganteng kalakna.
7 Kenca si e, tertarik me diberu tuanna man Jusup janah nina man bana, “Mari, ras kita medem!”
8 Tapi itulak Jusup janah nina man diberu tuanna e, “Enggo percayaken tuanku kerina si lit bas rumah enda man bangku, lanai perlu awasina kai pe si kulakoken.
9 Bas rumah enda, kuasaku si mbelinna, janah kerina enggo ibereken bas kuasaku selain kam, perban kam diberuna. La mungkin kulakoken kesalahen si bage belinna, janah erdosa aku man Dibata!”+
10 Tiap wari rayu-rayuna Jusup, tapi Jusup la pernah nggit medem ras ia ntah pe erdua-dua ras ia.
11 Bas sada wari sanga masuk Jusup ku rumah guna erdahin, sada pe la lit pelayan i rumah.
12 Kenca si e, tarik diberu e baju Jusup janah nina, “Mari, ras kita medem!” Tapi pediat Jusup bajuna tading bas tan diberu e jenari kiam ia ku darat.
13 Kenca idah diberu e tadingken Jusup bajuna bas tanna janah kiam ku darat,
14 serko ia ngelebuh pelayan-pelayanna janah nina, “Kalak Heber ah ibaba ku jenda guna erban kita mela. Perkosana atena aku, tapi serko aku asa gegehku.
15 Kenca begina aku serko asa gegehku, tadingkenna bajuna i sampingku janah kiam ia ku darat.”
16 Kenca si e itama diberu e baju Jusup i sampingna seh ngasa mulih Potipar tuan Jusup.
17 Kenca si e ceritaken diberu e man Potipar bagi si katakenna ndai, nina, “Pelayanndu kalak Heber ah si enggo babandu ku jenda, reh ndahi aku janah permelakenna atena aku.
18 Tapi mis aku serko asa gegehku, emaka tadingkenna bajuna i sampingku janah kiam ia ku darat.”
19 Kenca begi Potipar cerita diberuna kerna kai si lakoken pelayanna e, merawa kel ia.
20 Babana Jusup janah masukkenna ku penjara. Penjara e ingan raja ngurung tahanenna janah i je me Jusup ipenjaraken.+
21 Tapi Jahwe terus nemani Jusup janah terus cidahkenNa kekelengenNa si setia. Selain si e banNa ka jadi ate kepala penjara+ ngidah Jusup.
22 Emaka suruh kepala penjara e Jusup si ngawasi kerina kalak si ipenjaraken i penjara e, janah Jusup si nentuken kai si arus lakoken+ kalak e.
23 Lanai perlu iawasi kepala penjara e kai pe si enggo percayakenna man Jusup, perban Jahwe si nemani Jusup janah kai pe si dahikenna iban Jahwe berhasil.+
