Kejadin 4:1-26
4 Erhubungen seks Adam ras Hawa, jenari hamil+ Hawa, diberuna e. Sanga lahir Kain,+ nina, “Enggo kulahirken sekalak anak dilaki alu penampat Jahwe.”
2 Kenca si e, melahirken ka ia janah lahir Abil,+ adek Kain.
Abil jadi permakan biri-biri, tapi Kain jadi sekalak perjuma-juma.
3 Kenca piga-piga waktu, baba Kain deba hasil jumana jadi persembahen man Jahwe.
4 Tapi Abil, babana piga-piga anak biri-birina si pertama lahir,+ termasuk lemak anak biri-biri e. Ngena ate Jahwe ngidah Abil bage pe persembahenna,+
5 tapi la ateNa ngena ngidah Kain ras persembahenna. Emaka merawa kel Kain janah nembeh atena.
6 Kenca si e, nina Jahwe man Kain, “Engkai maka merawa kel kam? Engkai maka nembeh atendu?
7 Adi mulihi lakokenndu kai si mehuli, pasti ngena ka ateKu kam. Tapi adi la lakokenndu mulihi kai si mehuli, dosa sangana nimai kam i lebe-lebe pintu, merhat kel ia nguasai kam. Tapi arus talukenndu ia.”
8 Kenca si e, nina Kain man adekna Abil, “Ku mbalmbal kita tah.” Emaka sanga kalak e i mbalmbal, serang Kain me Abil adekna, bunuhna ia.+
9 Kenca si e, nina Jahwe man Kain, “Ja adekndu si Abil?” Nina Kain ngaloi, “La kuteh. Aku kin si njagai adekku?”
10 Megi si e, nina Dibata, “Kai si enggo lakokenndu? Begikenlah! Dareh adekndu serko man bangKu arah taneh nari.+
11 Gundari kena sumpah kam. Ipelawes pagi kam arah ingan enda nari, perban alu tanndu enggo mambur banndu dareh adekndu bas taneh enda.+
12 Perjumaindu pe taneh enda, labo lit datndu hasilna. Pindah-pindah pagi kam lalap i doni enda, la lit inganndu si tetap.”
13 Emaka nina Kain man Jahwe, “Mberatsa hukumen enda man kesalahen si enggo kuban.
14 Gundari pelawesNdu aku arah taneh enda nari, lanai pagi aku idahNdu. La pagi lit inganku si tetap i doni enda, pindah-pindah pagi aku lalap. Ise pe si jumpa ras aku, pasti bunuhna pagi aku.”
15 Emaka nina Jahwe bana, “Adi bage, ise pe si munuh Kain ihukum pagi ia pitu kali lipat beratna.”
Emaka ban Jahwe sada tanda man Kain gelah ise pe si jumpa ras ia, la ia ibunuh.
16 Kenca si e, lawes Kain arah lebe-lebe Jahwe nari janah tading ia i taneh Nod,* i sebelah timur Eden.+
17 Dung e, erhubungen seks Kain ras diberuna,+ hamil diberuna e janah lahir Enoh. Kenca si e, ibangun Kain sada kota janah banna gelar kota e seri bagi gelar anakna eme Enoh.
18 Kenca si e, lit anak Enoh, gelarna Irad. Irad kap bapak Mehuel, Mehuel kap bapak Metusael, ras Metusael kap bapak Lameh.
19 Lit dua diberu Lameh. Si pertama gelarna Ada ras si peduaken gelarna Sila.
20 Lahirken Ada me Jabal. Jabal si tangtangna tading i kemah-kemah janah lit asuh-asuhenna.
21 Gelar adekna Jubal. Ia si tangtangna main harpa* ras suling.
22 Lahirken Sila me Tubal Kain. Ia kap si erban kerina barang-barang arah tembaga ras besi nari. Gelar turang Tubal Kain eme Naama.
23 Kenca si e, ban Lameh puisi enda man diberuna Ada ras Sila,
“O diberu-diberu Lameh, begikenlah soraku.
Begikenlah kai si kukataken:
Enggo kubunuh sekalak dilaki perban lukaina aku,Sekalak anak perana si mekpek aku.
24 Adi Kain ibalas 7 kali,+
Emaka Lameh 77 kali.”
25 Erhubungen seks ka Adam ras diberuna, janah lahirken diberuna sekalak anak dilaki. Banna gelarna Set*+ perban nina, “Enggo bereken Dibata man bangku keturunen si deban si nggantiken Abil, perban enggo bunuh Kain ia.”+
26 Dung e lahir sekalak anak dilaki man Set, banna gelarna Enos.+ Sanga si e mulai kalak erlebuh man gelar Jahwe.
Cataten i teruh
^ Ertina ingan kalak si iasingken.
^ Harpa eme alat musik si ersenar bagi gitar, tapi bentukna beda.
^ Ertina “Ipilih; Itetapken.”
