Kejadin 40:1-23
40 Piga-piga waktu kenca si e, si ngurus inemen+ raja bage pe si ngurus roti raja ngelakoken kesalahen man tuanna raja Mesir.
2 Emaka merawa raja Mesir man duana pegawaina e, eme si ngurus inemen ras si ngurus roti.+
3 Penjarakenna kalak e bas rumah kepala pengawal,+ bas ingan Jusup ipenjaraken.+
4 Kenca si e suruh kepala pengawal Jusup nemani kalak e ras ngelayanisa.+ Lit piga-piga wari dekahna kalak e tetap bas penjara.
5 Bas sada berngi, sanga bas penjara, ernipi si ngurus inemen ras si ngurus roti raja Mesir. Duana nipi kalak e lit ertina.
6 Paginna sanga erpagi-pagi, reh Jusup njumpai kalak e, idahna sedih kalak e.
7 Emaka sungkun Jusup kalak e, nina, “Engkai maka sedih kena?”
8 Nina kalak e man Jusup, “Ernipi kami duana, tapi la lit si ngertikenca man kami.” Nina Jusup, “Dibata+ ngenca si ngasup ngertikenca. Ceritaken dage nipindu e man bangku.”
9 Emaka ceritaken si ngurus inemen e nipina man Jusup, nina, “Bas nipiku, lit batang anggur i lebe-lebeku.
10 Batang anggur e lit telu dahanna, kenca si e ndarat tunasna, erbunga ia, janah hasilkenna tandan-tandan anggur si tasak.
11 Bas tanku lit cangkir raja Mesir, kenca si e kubuat anggur e janah kupereh ku bas cangkir raja e. Jenari kubereken cangkir e man raja.”
12 Emaka nina Jusup man bana, “Enda ertina nipindu e: Telu dahan e ertina telu wari.
13 Telu wari nari pedarat raja Mesir kam, janah banna kam mulihi jadi pegawaina.+ Berekenndu pagi inemen man raja Mesir bagi si lakokenndu mbarenda sanga kam ngurus inemenna.+
14 Tapi ingetndu min aku kenca ndarat kam jenda nari. Cidahkenlah kekelengenndu si setia man bangku janah katakenlah kerna aku man raja e, gelah banci aku ndarat jenda nari.
15 Situhuna iculik nge aku arah negri kalak Heber+ nari, labo lit kai pe si kulakoken si erban aku arus masuk penjara.”+
16 Sanga begi si ngurus roti e erti nipi si jelasken Jusup, cocok kapna. Emaka nina ka man Jusup, “Aku pe ernipi, janah bas nipiku e kujujung telu keranjang si isina roti mbentar.
17 Bas keranjang si arah datasna kel lit erbage-bage roti man raja, janah lit perik-perik si mangani roti si lit bas keranjang e.”
18 Kenca si e nina Jusup, “Enda erti nipindu e: Telu keranjang e ertina telu wari.
19 Telu wari nari, ipotong raja Mesir kerahungndu* janah gantungna kam i tiang, kenca si e pangani perik-perik dagingndu.”+
20 Telu wari kenca si e eme wari ulang tahun+ raja Mesir. Emaka ban raja pesta man kerina pelayanna. Kenca si e pedaratna si ngurus inemen bage pe si ngurus roti e jenari babana ku lebe-lebe kerina pelayanna.
21 Bereken raja keduduken si mbarenda man si ngurus inemen e, emaka ertugas ia mulihi mereken inemen man raja.
22 Si ngurus roti e igantung raja, pas bagi si kataken+ Jusup.
23 Tapi lanai inget si ngurus inemen e Jusup.+
Cataten i teruh
^ As. “angkat raja Mesir takalndu.”
