Kejadin 42:1-38
42 Sanga begi Jakup lit pangan* i Mesir,+ nina man anak-anakna si dilaki, “Engkai maka kena sitatapen saja?”
2 Nina Jakup ka, “Kubegi lit pangan i Mesir. Emaka ku jahlah kena, tukur kenalah panganta, gelah la kita mate+ kelihen.”
3 Emaka lawes sepuluhna abang+ Jusup ku Mesir guna nukur pangan.
4 Tapi Benyamin+ adek Jusup la bere Jakup ikut ras abang-abangna. Mbiar ia mate kari Benyamin perban kena cilaka.+
5 Emaka lawes anak-anak Israel radu ras kalak si deban ku Mesir guna nukur pangan, perban kelihen e enggo seh ku negri Kanaan.+
6 Jusup si erkuasa i negri+ Mesir, janah ia si ndayaken pangan man kerina kalak i belang-belang doni.+ Emaka reh abang-abang Jusup janah sujud kalak e man bana.+
7 Kenca idah Jusup abang-abangna, mis tandaina kalak e, tapi banna gelah la tandai kalak e ia.+ Emaka kasar ia ngerana man kalak e, nina, “Ja nari kena?” Nina kalak e man bana, “Kami arah negri Kanaan nari, nukur pangan+ ate kami ku jenda.”
8 Amin pe tandai Jusup abang-abangna, tapi abang-abangna la nandai ia.
9 Minter inget Jusup nipina si mbarenda kerna kalak e,+ emaka nina, “Pasti kena mata-mata! Ndarami kelemahen negri kami ate kena!”
10 Kenca si e nina kalak e man bana, “Labo Tuan, nukur pangan nge ate budak-budakndu enda reh ku jenda.
11 Kami ersenina kerina, bujur nge kami. Budak-budakndu enda labo mata-mata.”
12 Tapi nina Jusup man kalak e, “Labo tuhu! Pasti ndarami kelemahen negri kami ate kena reh!”
13 Megi si e, nina kalak e man bana, “Kerina kami sada bapak.+ Bapak kami tading i negri Kanaan, lit 12 anakna dilaki.+ Si nguda tading ras bapak kami,+ tapi sada nari enggo lanai lit.”+
14 Nina Jusup man kalak e, “Mata-mata nge kena, bagi si kukataken ndai!
15 Emaka kuuji ateku kena: Ersumpah aku i lebe-lebe raja Mesir si nggeluh, la banci kena lawes nadingken ingan enda, adi la baba kena lebe adek kena si nguda ndai ku jenda.+
16 Suruh sekalak bas kena nari ngelegi adek kena ndai, tapi selebihna itahan i jenda. Alu bage, banci kuteh kena jujur ntah lang. Adi erbual kena, ersumpah aku i lebe-lebe raja Mesir si nggeluh, berarti kena mata-mata.”
17 Kenca si e penjarakenna kalak e telu wari dekahna.
18 Bas wari si peteluken, nina Jusup man kalak e, “Aku mbiar man Dibata. Emaka lakokenlah bagi si kukataken enda gelah tetap kena nggeluh.
19 Adi bujur kin kena, sekalak arah senina kena arus itahan i penjara. Tapi si debanna banci lawes janah baba kenalah pangan gelah keluarga kena+ la kelihen.
20 Kenca si e baba kena adek kena si nguda man bangku, guna mbuktiken maka tuhu si kataken kena e, gelah la kena mate.” Emaka setuju kalak e.
21 Kenca si e nina kalak e man sada ras si debanna, “Enda pasti hukumen man banta perban perbahanenta man adekta.+ Tangis kel ia sange mindo perkuah ateta, tapi la ateta mekuah. E me si erbanca maka susah siakap bagenda.”
22 Kenca si e nina Ruben man kalak e, “Enggo kap kukataken man kena, ‘Ula sakiti anak e,’ tapi la begiken kena.+ Gundari arus kita ertanggung jawap+ perban kematenna* e.”
23 Perban gunaken Jusup penerjemah sanga ngerana ras kalak e, la teh kalak e maka angkai Jusup kai si sangana cakapken kalak e.
24 Emaka tadingken Jusup kalak e, kenca si e tangis+ ia. Sanga mulihken ia janah ngerana ka ras kalak e, pilihna Simeon+ jenari iketna ia i lebe-lebe+ kalak e.
25 Kenca si e perentahken Jusup gelah guni-guni kalak e idemi alu gandum.* Perentahkenna ka gelah sen kalak e iulihken ku gunina sekalak-sekalak. Perentahkenna ka gelah ibereken pangan guna persedian kalak e bas perdalanen. Ilakoken kerina bagi si perentahken Jusup.
26 Emaka tama kalak e guni-guni gandumna ndai ku datas keledena. Kenca si e lawes kalak e.
27 Bas ingan kalak e erberngi, sekalak arah kalak e bukana gunina guna mere keledena man, janah idahna senna bas guni e.
28 Emaka nina man senina-seninana, “Ulihkenna senku, tamana bas guniku!” Mbiar kalak e janah nggirgir. Nina kalak e man sada ras si debanna, “Engkai maka bage ban Dibata man banta?”
29 Kenca seh kalak e i negri Kanaan, ceritaken kalak e man bapakna kerina si terjadi, nina,
30 “Kalak si erkuasa bas negri e kasar kel ngerana man kami.+ Tuduhna kami jadi mata-mata ku negri e.
31 Tapi ning kami man bana, ‘Kalak bujur nge kami, labo kami mata-mata.+
32 Kami 12 ersenina,+ kerina kami sada bapak. Tapi sada senina kami enggo lanai lit.+ Si nguda tading ras bapak kami i negri Kanaan.’+
33 Tapi nina penguasa negri e man kami, ‘Guna meteh kena bujur ntah lang, kuuji ateku kena: Arus tadingken kena sada senina kena ras aku.+ Kenca si e, mulih+ kena janah babalah pangan gelah keluarga kena la kelihen.
34 Dung e, babalah adek kena si nguda man bangku, gelah tek aku maka kena kalak bujur labo mata-mata. Kenca si e kuulihken pagi senina kena e, janah banci kena nukur pangan i negri kami.’”
35 Sanga kosongken kalak e gunina, kepeken ingan sen kalak e lit bas gunina sekalak-sekalak. Ngidah si e, mbiar kalak e bage pe bapakna.
36 Nina Jakup man kalak e, “Ceda kel ukurku+ iban kena! Jusup ras Simeon lanai lit.+ Gundari buat kena ka ate kena Benyamin! Engkai maka terjadi enda kerina man bangku?”
37 Nina Ruben man bapakna, “Adi la kin pagi kubaba ia mulihken man bandu,+ banci bunuhndu duana anakku si dilaki. Kujaga nge pagi ia janah pasti kubaba mulihken.”+
38 Tapi nina Jakup, “Anakku la banci lawes ras kena, perban abangna enggo mate, ia nari ngenca si tading.+ Adi mate pagi ia perban kena cilaka bas perdalanen, pasti mate+ aku ban kena perban sedihna+ kuakap.”
