Kejadin 43:1-34
43 Parah kel kelihen si terjadi i negri Kanaan.+
2 Emaka kenca enggo keri pangan si baba kalak e arah Mesir+ nari, nina Jakup man anak-anakna, “Laweslah kena, tukur kena ka sitik pangan man banta.”
3 Nina Juda man bapakna, “Jelas-jelas kel enggo persingeti dilaki ah ndai kami, nina, ‘Ula nai jumpai kena aku adi la kin baba kena adek kena.’+
4 Adi berendu adek kami ikut, nggit kami lawes nukur pangan e.
5 Tapi adi la berendu adek kami ikut, la kami lawes, perban nina dilaki ah ndai man kami, ‘Ula nai jumpai kena aku adi la kin baba kena adek kena.’”+
6 Nina Israel,+ “Engkai maka ban kena aku kena masalah? Engkai kin maka kataken kena lit denga senina kena si deban?”
7 Nina kalak e, “Sungkun dilaki ah ndai kerna kami ras keluarga kami, nina, ‘Nggeluh denga bapak kena? Lit denga senina kena si deban?’ Emaka kataken kami situhuna.+ Ja nge teh kami adi suruhna atena kami maba adek kami ku jah, Pak?”+
8 Desak Juda bapakna, nina, “O Pak, bereken min adek kami ikut ras kami,+ gelah lawes kami. Gelah kam, kami, ras anak-anak kami+ la mate+ perban kelihen.
9 Aku pagi si mastiken keselamatenna+ janah aku pagi si ertanggung jawap. Adi la kin pagi kubaba ia mulihken man bandu, rasa lalap aku erdosa man bandu, Pak.
10 Adi mis min ndai kami berkat, enggo min ndai dua kali kami mulih-ulih ku jah.”
11 Emaka nina Israel man anak-anakna e, “Adi arus kin bage, bagendalah ban kena: Babalah hasil jumata si mejilena. Baba sitik minak balsem,*+ sitik madu, getah si merim,* kulit kayu si ergetah,+ kacang pistasio, ras kacang almond, janah tama ku guni-guni kena. Berelah hadiah+ e man dilaki ah ndai.
12 Baba sen kena dua kali lipat buena, baba ka sen si ulihkenna sange bas guni+ kena. Mungkin sange silap kalak e.
13 Baba kena dage adek kena e janah jumpai kena dilaki ah ndai.
14 Mbera-mbera ban Dibata Si Madakuasa mekuah ate dilaki ah ndai, gelah bebaskenna Simeon ras Benyamin. Tapi adi arus kin aku kebenen anak-anakku, enggom aku siap ndalanisa.”+
15 Emaka baba kalak e hadiah e bage pe sen si dua kali lipat buena. Lawes kalak e ku Mesir radu ras Benyamin guna njumpai Jusup.+
16 Sanga idah Jusup reh Benyamin ras kalak e, minter nina man si ngurus rumahna, “Baba kalak e ku rumah, geleh piga-piga binatang, kenca si e sikapken pangan, perban ciger enda ras kalak e ateku man.”
17 Mis lakoken dilaki e kai si kataken+ Jusup janah babana kalak e ku rumah Jusup.
18 Tapi sanga kalak e ibaba ku rumah Jusup mbiar kel kalak e, janah nina, “Pasti perban sen si iulihken ku gunita sange maka babana kita ku jenda. Tangkapna atena kita janah banna kita jadi budak, nce buatna keledeta!”+
19 Emaka deheri kalak e si ngurus rumah Jusup janah ngerana kalak e man bana i pintu masuk rumah e.
20 Nina kalak e, “Salah kami, Tuan! Sanga tangtangna kami reh ku jenda, situhuna nukur pangan+ nge ate kami.
21 Tapi sanga seh kami i penginapen talangi kami guni-guni kami. Kepeken lit denga sen kami ndai bas guni kami sekalak-sekalak janah la urak buena.+ Emaka ulihken kami ate kami.
22 Labo teh kami ise si namaken sen e bas guni-guni+ kami. Gundari, enggo baba kami terbuen sen guna nukur pangan.”
23 Emaka nina man kalak e, “Tenang saja kena. Ula kena mbiar. Dibata kena ras Dibata bapak kena nge si namaken sen e bas guni-guni kena. Enggom kualoken sen kena.” Kenca si e babana Simeon ku kalak e.+
24 Dung e babana kalak e ku rumah Jusup janah berena lau guna mburihi nahe kalak e. Selain si e berekenna ka pangan man kelede-kelede kalak e.
25 Perban begi kalak e reh ate Jusup bas ciger e guna man ras kalak e,+ emaka sikapken kalak e hadiah+ si enggo babana.
26 Kenca masuk Jusup ku rumah, bereken kalak e hadiah e man Jusup janah sujud kalak e man bana.+
27 Kenca si e sungkun Jusup uga berita kalak e, nina, “Ning kena sange bapak kena enggo metua. Uga nge beritana gundari? Nggeluh denga nge ia?”+
28 Nina kalak e ngaloisa, “Budakndu, bapak kami, sehat-sehat nge. Ia nggeluh denga.” Dung e sujud kalak e.+
29 Sanga idah Jusup adek kandungna+ eme Benyamin, nina, “Enda nge adek kena si nguda si kataken kena sange?”+ Nina ka, “Ipasu-pasu Dibatalah kam, Nakku.”
30 Perban idahna adekna e, lanai terkuasaina perasanna. Emaka mis ndarat Jusup ndarami ingan tangis. Masuk ia ku sada ruangen, janah ngandung ia i je.+
31 Dung e erduhap ia janah kenca enggo tenang kapna, dahina kalak e mulihi. Nina man kerina pelayanna, “Sikapken kena pangan.”
32 Pangan man Jusup isikapken bas sada meja, janah pangan man senina-seninana iban bas meja si deban. Pangan man kalak Mesir si lit i je iban ka bas meja si debanna. Ciga ate kalak Mesir+ adi man radu ras kalak Heber, emaka la kalak e nggit ras-ras man.
33 Ingan kundul senina-senina Jusup e* itama i lebe-lebe Jusup, menurut urutenna. Mulai arah sintua,+ menurut hakna selaku anak sintua, seh ku si nguda. Emaka sitatapen senina-senina Jusup e perban mamang atena.
34 Terus bereken Jusup pangan arah mejana nari man kalak e, tapi man Benyamin tambahkenna lima kali lipat buen asangken si debanna.+ Emaka man ras minem kalak e seh ngasa besur.
Cataten i teruh
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
^ As. “getah labdanum.”
^ As. “kalak e.”
