Kejadin 44:1-34
44 Kenca si e bere Jusup perentah man si ngurus rumahna, nina, “Isilah guni-guni kalak e alu pangan asa ngasup kalak e mabasa. Tamaken sen kalak e ku gunina+ sekalak-sekalak.
2 Tapi bas guni anak si nguda, selain sen, tamaken ka cangkir pirakku.” Emaka lakokenna bagi si perentahken Jusup.
3 Paginna, kenca enggo terang, lawes senina-senina Jusup nangkih kelede-keledena.
4 Sanga lenga kalak e ndauhsa arah kota nari, nina Jusup man si ngurus rumahna, “Ayaki kalak ndai! Kenca enggo jumpa kam kari ras kalak e, bagendalah nindu, ‘Engkai balas kena perbahanen si mehuli alu perbahanen si jahat?
5 Engkai maka buat kena cangkir tuanku? Cangkir e pakena guna minem ras ngeramal alu tepat. Jahat kel perbahanen kena e.’”
6 Sanga jumpa ia ras kalak e, katakenna bagi si ndai.
7 Tapi nina kalak e man bana, “Engkai maka bage nindu, Tuan? La mungkin bage iban budakndu enda.
8 Sen si dat kami bas guni kami saja pe ulihken kami man bandu arah negri Kanaan+ nari. Me labo mungkin tangko kami pirak ntah pe emas arah rumah tuanndu nari?
9 Bas ise kari datndu cangkir e bunuh ia, janah kerina kami banci jadi budak Tuanku.”
10 Emaka nina, “Adi bage, kalak si muat cangkir e saja si jadi budakku, tapi si debanna la isalahken.”
11 Emaka penusur kalak e kerina gunina ku taneh janah buka kalak e.
12 Manjar-anjar darami si ngurus rumah Jusup, mulaina arah sintua janah terakhir si nguda. Dungna datna cangkir e bas guni+ Benyamin.
13 Emaka rigatken kalak e bajuna ras angkatna mulihi guni-gunina ku datas kelede janah mulihken ku kota.
14 Sanga masuk Juda+ ras senina-seninana ku rumah Jusup, i je denga Jusup. Emaka mis kalak e sujud.+
15 Nina Jusup man kalak e, “Engkai maka bage ban kena? La kin teh kena maka kalak si bagi aku enda banci ngeramal alu tepat?”+
16 Megi si e nina Juda, “Uga narilah pe ning kami man bandu, Tuan? Uga nari nge cara kami mbuktiken maka kami la ersalah? Enggo cidahken Dibata si benar kesalahen budak-budakndu enda.+ Gundari kami jadi budakndu Tuan, kami bage pe kalak si bas ia idat cangkir ndai.”
17 Tapi, nina Jusup, “La mungkin bage kuban! Kalak si bas ia idat cangkir ndai saja si jadi budakku.+ Si debanna banci mulih alu mejuah-juah ku bapak kena.”
18 Emaka deheri Juda me Jusup janah nina, “Mindo kel aku Tuan, tolong begikenndu budakndu enda, ula kam merawa man budakndu enda, sebap kam bali kap bagi raja Mesir.+
19 Pernah sungkunndu kami Tuan, lit denga nge bapak kami ntah senina kami si deban.
20 Emaka ning kami man bandu Tuan, ‘Lit denga bapak kami, ia enggo metua. Lit ka sada nari adek kami si nguda,+ ia lahir kenca bapak kami enggo metua. Abang arah adek kami e, si sada mamak ras ia enggo lanai lit,+ emaka ia nari ngenca tading anak mamakna.+ Keleng kel ate bapakna man bana.’
21 Kenca si e, suruhndu budak-budakndu enda maba adek kami e ku jenda gelah jumpa ras kam.+
22 Tapi kataken kami man bandu maka la banci tadingken adek kami e bapakna. Adi tadingkenna, pasti mate+ kari bapakna.
23 Kenca si e nindu man budak-budakndu enda lanai+ kami banci reh ndahi kam* adi la kin baba kami adek kami e ku jenda.
24 “Emaka mulih kami ndahi bapak kami, kataken kami man bana kai si katakenndu.
25 Piga-piga waktu kenca si e, suruh bapak kami mulihken ku jenda guna nukur sitik pangan.+
26 Tapi ning kami man bana, ‘La kami banci lawes. Tapi adi ikut adek kami si nguda ras kami, banci kami lawes. Sebap la kami pang njumpai* kalak ah ndai adi la kin ikut adek kami si nguda ras kami.’+
27 Emaka nina bapak kami man kami, ‘Me teh kena nge dua ngenca anak si ilahirken diberuku.+
28 Tapi salah sada arah anakku e enggo nadingken aku perban pasti enggo bunuh binatang buas+ ia. Buktina lanai ia kuidah seh asa gundari.
29 Adi buat kena ka anakku enda arah aku nari janah mate ia perban kena cilaka, pasti mate+ aku ban kena perban cedana kel ukurku.’+
30 “Keleng kel ate bapak kami man adek kami e bagi ia engkelengi dirina. Emaka adi la kubaba ia mulih man bapak kami,
31 adi la idahna adek kami e ras kami, pasti mate bapak kami. Alu bage budak-budakndu enda si erban bapak kami mate perban sedihna kel akapna.
32 Enggo erjanji budakndu enda man bapakku, maka aku si njamin keselamaten adek kami e, ningku, ‘Adi la kin kubaba ia mulih, rasa lalap+ aku erdosa man bandu, Pak.’
33 Emaka, mindo kel aku Tuan, gelah aku saja si tading i jenda jadi budakndu, tapi pediatlah adek kami e mulih ras abang-abangna.
34 La mungkin aku mulih ndahi bapakku, adi la kin ikut adek kami e. La aku ngasup ngidah kai pagi si terjadi man bapakku.”
