Kejadin 46:1-34
46 Emaka baba Israel keluargana ras kerina ertana, janah berkat ia. Kenca seh i Berseba,+ persembahkenna korban man Dibata si isembah Isak, bapakna.+
2 Kenca si e bas sada berngi arah sada pengenehenen,* ngerana Dibata man Israel, nina, “Jakup, Jakup!” Nina Jakup ngaloi, “Enda aku!”
3 Nina Dibata, “Aku kap Dibata si benar, Dibata bapakndu.+ Ula kam mbiar lawes ku Mesir, sebap Kuban pagi kam jadi bangsa si mbelin+ i jah.
4 Aku pagi si nemani kam lawes ku Mesir, Aku ka pagi si maba kam mulih jah nari.+ Jusup pagi si nutup matandu+ sanga kam mate.”
5 Kenca si e, berkat Jakup arah Berseba nari. Anak-anakna si dilaki si maba ia* alu gereta-gereta si ikirim raja Mesir, ikut ras anak-anak kalak e bage pe diberu-diberu kalak e.
6 Baba kalak e ka asuh-asuhenna ras barang-barangna si enggo pepulungna i negri Kanaan. Dung e seh Jakup ras kerina keturunenna i Mesir.
7 Babana anak-anakna si dilaki ras si diberu ku Mesir, bage pe kerina kempu-kempuna.
8 Enda me anak-anak Israel si dilaki (anak-anak Jakup) si lawes ku Mesir.+ Anak Jakup sintua eme Ruben.+
9 Anak-anak Ruben si dilaki eme Henoh, Pallu, Hesron, ras Karmi.+
10 Anak-anak Simeon+ si dilaki eme Jemuel, Jamin, Ohad, Jakin, Sohar, ras Saul+ si nandena kalak Kanaan.
11 Anak-anak Lewi+ si dilaki eme Gerson, Kohat, ras Merari.+
12 Anak-anak Juda+ si dilaki eme Er, Onan, Selah,+ Peres,+ ras Sera.+ Tapi, Er ras Onan mate i negri Kanaan.+
Anak-anak Peres si dilaki eme Hesron ras Hamul.+
13 Anak-anak Isakar si dilaki eme Tola, Puah, Iop, ras Simron.+
14 Anak-anak Sebulon+ si dilaki eme Sered, Elon, ras Jahleel.+
15 Enda ndai me keturunen Lea, si lahirkenna man Jakup. Anak-anakna e termasuk ka anakna si diberu eme Dina+ lahir i Padan-aram.* Kerina keturunenna lit 33 kalak.
16 Anak-anak Gat+ si dilaki eme Sipion, Haggi, Suni, Esbon, Eri, Arot, ras Areli.+
17 Anak-anak Aser+ si dilaki eme Imnah, Iswa, Iswi, ras Beriah, turang kalak e gelarna Serah.
Anak-anak Beria si dilaki eme Heber ras Malkiel.+
18 Enda ndai me anak-anak Silpa+ si dilaki. Silpa e budak si bereken Laban man anakna eme Lea. Emaka kerina keturunen Jakup arah Silpa lit 16 kalak.
19 Anak-anak Jakup si dilaki si lahirken Rahel eme Jusup+ ras Benyamin.+
20 Anak-anak Jusup si lahirken Asenat i Mesir eme Manase+ ras Eperaim.+ Asenat+ e anak Potipera, Potipera e sekalak imam i On.*
21 Anak-anak Benyamin+ si dilaki eme Bela, Beker, Asbel, Gera,+ Naaman, Ehi, Ros, Mupim, Hupim,+ ras Ared.+
22 Enda ndai me anak-anak Rahel si lahirkenna man Jakup. Kerina keturunen Jakup arah Rahel lit 14 kalak.
23 Anak* Dan+ si dilaki eme Husyim.+
24 Anak-anak Naptali+ si dilaki eme Jahseel, Guni, Jeser, ras Silem.+
25 Enda ndai me anak-anak Bilha si dilaki. Bilha e budak si bereken Laban man Rahel anakna. Kerina keturunen Jakup arah Bilha lit pitu kalak.
26 Keturunen Jakup si lawes ras ia ku Mesir, jumlahna lit 66 kalak.+ Enda lenga termasuk diberu anak-anakna.
27 Anak-anak Jusup si lahir i Mesir lit dua kalak. Kerina keluarga Jakup si reh ku Mesir buena lit 70 kalak.+
28 Suruh Jakup me Juda+ leben lawes guna ngataken man Jusup maka ia sangana bas perdalanen ku Gosen. Kenca seh kalak e i taneh Gosen,+
29 sikapken Jusup geretana janah lawes ia ku Gosen njumpai Israel bapakna. Sanga jumpa ia ras bapakna, mis dakepna* bapakna janah ndekah ia tangis.*
30 Kenca si e nina Israel man Jusup, “Enggo kuidah ayondu, enggo kuteh maka kam nggeluh denga. Bicara mate pe aku gundari, enggom aku nggit.”
31 Dung e nina Jusup man senina-seninana ras kerina keluarga bapakna, “Lawes aku lebe ya, gelah kulaporken man raja+ maka senina-seninaku ras kerina keluarga bapakku enggo reh arah negri Kanaan nari.+
32 Kukataken pagi man bana maka kena permakan+ si ngasuhi asuh-asuhen.+ Enggo baba kena biri-biri, kambing, lembu, bage pe kerina jang kena+ ku jenda.
33 Adi lebuh raja pagi kena janah sungkunna kai dahin kena,
34 bagendalah ning kena gelah banci kena tading i taneh Gosen,+ ‘Budak-budakndu enda ngasuhi asuh-asuhen mulai kin kitik-kitik nari, bagi nini bulang kami.’+ Sebap ciga ate kalak Mesir+ man permakan biri-biri.”
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ As. “Israel.”
^ Bagin arah Mesopotami.
^ Maksudna, Heliopolis.
^ As. “Anak-anak.”
^ As. “mis dakepna kerahung.”
^ As. “ndekah ia ngandung i kerahungna.”