Kejadin 47:1-31
47 Emaka lawes Jusup janah laporkenna man raja Mesir,+ nina, “Bapakku, senina-seninaku, bage pe kambing, biri-biri, lembu ras kerina jang kalak e enggo reh arah negri Kanaan nari. Gundari kalak e enggo i taneh Gosen.”+
2 Baba Jusup lima seninana njumpai raja.+
3 Sungkun raja senina-senina Jusup e, nina, “Kai dahin kena?” Nina kalak e man raja, “Budak-budakndu enda permakan biri-biri, bagi nini bulang kami.”+
4 Kenca si e nina kalak e man raja, “Kami reh gelah banci tading jadi kalak asing i jenda,+ sebap parah kel kelihen i negri Kanaan+ janah lanai lit pangan man asuh-asuhen kami. Emaka ijinkenlah kami tading i taneh Gosen.”+
5 Megi si e nina raja man Jusup, “Enggo reh bapakndu ras senina-seninandu ku jenda.
6 Negri Mesir enda lit bas kuasandu. Emaka berekenlah daerah si mejilena i negri enda+ jadi ingan tading bapakndu ras senina-seninandu. Banci kalak e tading i taneh Gosen. Adi lit tehndu arah kalak e si rajin erdahin, suruhlah ia njaga asuh-asuhenku.”
7 Kenca si e baba Jusup me Jakup bapakna njumpai raja, janah ipasu-pasu Jakup me raja.
8 Sungkun raja Jakup, “Enggo piga tahun umurndu?”
9 Nina Jakup man raja, “Enggo lit 130 tahun dekahna aku jadi kalak asing. Mesera pergeluhku,+ umurku la bagi nini bulangku gedangna. Kalak e pe jadi kalak asing segedang geluhna.”+
10 Kenca si e ipasu-pasu Jakup raja janah lawes ia arah lebe-lebe raja nari.
11 Bereken Jusup ingan tading man bapakna ras man senina-seninana. Bereken Jusup ka taneh si mejilena si lit i Mesir, eme taneh Ramses,+ bagi si perentahken raja.
12 Terus bereken Jusup pangan* man bapakna, man senina-seninana, ras kerina keluarga bapakna menurut jumlah anak-anakna.
13 Perban kelihen e seh kel parahna, dungna lanai lit pangan bas kerina negri, janah penduduk Mesir ras Kanaan enggo lemas perban kelihen e.+
14 Pepulung Jusup kerina sen si datna arah ndayaken pangan man kalak Mesir ras kalak Kanaan,+ janah sen si datna e terus babana ku rumah raja.
15 Dungna, keri sen i negri Mesir ras negri Kanaan. Emaka rehen kerina kalak Mesir ndahi Jusup, nina, “Bere min kami pangan. Ula min perban la lit sen kami, pediatndu kami mate.”
16 Megi si e nina Jusup, “Adi enggo keri sen kena, bereken asuh-asuhen kena. Gelah kubere pangan ganti asuh-asuhen kena.”
17 Emaka baba kalak e asuh-asuhenna man Jusup, eme kuda, kambing, biri-biri, lembu, ras kelede. Si jadi gantina bere Jusup man kalak e pangan. Emaka bas tahun e terus bere Jusup kalak e pangan jadi ganti asuh-asuhen kalak e.
18 Kenca keri tahun e, rehen kalak e ndahi Jusup, janah nina, “Tuan, tehndu kap maka kerina sen kami ras kerina asuh-asuhen kami enggo bereken kami man bandu. Kai pe lanai lit bas kami guna ibereken man bandu Tuan, selain diri kami ras taneh kami.
19 Pediatndu nge kami mate janah taneh kami lanai terurus? Tukurlah kami ras taneh kami janah bere kami pangan. Kami jadi budak raja, janah taneh kami jadi jangna. Bereken min man kami benih gelah banci kami tetap nggeluh, alu bage taneh kami banci terurus.”
20 Emaka tukur Jusup kerina taneh kalak Mesir e. Kerina kalak Mesir ndayaken tanehna, sebap kelihen e seh kel parahna. Emaka kerina taneh Mesir jadi jang raja.
21 Kenca si e pindahken Jusup kerina penduduk si lit i belang-belang Mesir ku kota-kota.+
22 Taneh imam-imam ngenca si la tukurna+ sebap raja si mereken pangan kalak e. Emaka la dayaken kalak e tanehna.
23 Kenca si e nina Jusup man kalak e, “Bas wari enda, enggo kutukur kena ras taneh kena gelah jadi jang raja. Enda benih man kena, suanlah enda bas juma.
24 Adi lit hasilna, bereken seperlima man raja,+ tapi selebihna man kena. Banci ban kena jadi benih bas juma, jadi pangan kena, pangan kerina kalak si lit bas rumah kena, ras man pangan anak-anak kena.”
25 Emaka nina kalak e, “Enggo selamatkenndu geluh kami.+ Meriahlah ukurndu ngidah kami Tuan, janah banci kami jadi budak raja.”+
26 Kenca si e iban Jusup sada undang-undang si ipake seh ngasa gundari i belang-belang negri Mesir, eme seperlima arah hasil juma jadi jang raja. Taneh imam-imam ngenca si la jadi jang raja.+
27 Keluarga Israel terus tading i negri Mesir, i taneh Gosen.+ Lahir anak kalak e i je janah reh teremna.+
28 Lit 17 tahun dekahna Jakup tading i Mesir, emaka umur Jakup seh 147 tahun.+
29 Kenca teh Israel maka lanai ia ndekah nggeluh,+ lebuhna Jusup janah nina, “Adi keleng kin atendu aku, ersumpahlah kam,* buktikenlah kekelengenndu si setia ras kesetianndu man bangku. Ula kuburkenndu aku i Mesir.+
30 Adi mate pagi aku, babandulah aku ndarat arah Mesir enda. Kuburken pagi aku i kuburen nini bulangku.”+ Megi si e nina Jusup ngaloi, “Ue Pak, kulakoken pagi bagi si katakenndu.”
31 Emaka nina Jakup, “Ersumpahlah kam man bangku.” Emaka ersumpah Jusup.+ Dung e, sujud Israel arah takal ingan medemna.+
Cataten i teruh
^ As. “roti.”
^ As. “tamalah tanndu i teruh pahaku.” Banci jadi bagenda cara guna ngesahken sumpah.
