Kejadin 49:1-33
49 Emaka lebuh Jakup anak-anakna si dilaki, nina, “Pulunglah kena, gelah kukataken kai si terjadi man kena bas wari si pepagi.
2 O anak-anak Jakup si dilaki, pulunglah kena, begiken bapak kena, Israel.
3 “Ruben,+ anakku sintua.+ Kam kap gegehku, anakku si pertama lahir.* Kam kap si terhormatna ras si megegehna.
4 Tapi labo pagi kam jadi si pentingna, perban la kam terkuasai bali bagi lau banjir. Nangkih kam ku ingan medem bapakndu.+ Cemarindu ingan medemku. Tuhu-tuhu nangkih kam ku datas.
5 “Simeon ras Lewi ersenina.+ Pakena senjatana+ guna ngelakoken kekerasen.
6 Ula erteman ras ia. Ula ikut pulung ras ia, perban adi merawa ia bunuhna kalak.+ Potongna urat nahe lembu guna kesenangenna.
7 Kena sumpahlah rawana. Perban rawana e kejam janah seh kel jahatna.+ Merap pagi ia i antara Jakup janah terbagi-bagi ia i antara Israel.+
8 “Kam Juda,+ puji senina-seninandu kam pagi.+ Talukenndu pagi musuh-musuhndu.*+ Sujud pagi anak-anak bapakndu si dilaki man bandu.+
9 Juda eme anak singa.+ O Nakku, kenca panndu binatang si burundu, lawes kam. Kenca si e amparkenndu bandu jenari ngenat kam bagi singa. Perban bagi singa, ise si pang medakisa?
10 Tongkat kerajan la ibuat arah Juda nari,+ tongkat kekuasan la ibuat arah nahena nari seh ngasa reh Silo.*+ Patuh pagi bangsa-bangsa man bana.+
11 Iketkenna keledena i batang anggur, janah anak keledena ku batang anggur si mejilena. Cucina pagi uisna bas anggur ras bajuna bas jus anggur.
12 Matana megara perban anggur, ipenna mbentar perban susu.
13 “Sebulon,+ i tepi laut pagi tading, i tepi laut ingan kapal ngadi-ngadi.+ Batas daerahna seh pagi ku Sidon.+
14 “Isakar+ bagi kelede si megegeh tulanna, si amparkenna dagingna alu dua kantong pelana i gurungna.
15 Idahna pagi ingan si mejile ras negri si subur. Tungkukkenna pagi gurungna guna maba baban. Nggit pagi ia kerja keras bagi budak.
16 “Perban Dan+ salah sada suku Israel,+ hakimina pagi kerina bangsa.
17 Dan bagi nipe si lit i tepi dalan eme nipe si ertanduk si lit i tepi dalan. Tagutna tumit* kuda, emaka ndabuh pagi si nangkih kuda e ku pudi.+
18 O Jahwe, kutimai keselamaten arah Kam nari.
19 “Adi Gat,+ iserang gerombolen perampok pagi ia, tapi serang Gat kalak e arah pudi nari.+
20 “Aser,+ melala kel pagi panganna, ia pagi si nikapken pangan si entabeh kap raja.+
21 “Naptali+ bagi rusa beruna si meliar. Belaskenna kata-kata si mehuli.+
22 “Jusup+ bagi cabang batang kayu si melala buahna. Batang kayu si melala buahna si lit i deher lau, si cabang-cabangna meganjang ngelewati dingding.
23 Tapi segat ate pemanah ia, terus serangna+ ras panahna ia.
24 Tapi busur panah Jusup tetap bas inganna,+ janah tanna megegeh.+ E rehna arah ia si megegeh si nampati Jakup, arah permakan ras batu si nampati Israel.
25 Ia* rehna arah Dibata si sembah bapakna, pasti sampati Dibata ia. Si Madakuasa lit ras ia, ipasu-pasu Dibata ia ras berekenNa pagi udan arah langit nari bage pe lau i teruh taneh nari,+ bereNa enterem anak bage pe asuh-asuhen.
26 Pasu-pasu si bereken bapakna ulin asangken hasil arah gunung-gunung si rasa lalap, jilen asangken bukit-bukit si rasa lalap.+ Jusup pagi si ipilih i antara senina-seninana,+ si terus pagi ndatken pasu-pasu.
27 “Benyamin+ bagi srigala,+ terus pagi cabik-cabikna musuh-musuhna. Sanga erpagi-pagi panganina kai si buruna, sanga berngi bagi-bagina kai si enggo rampasna+ arah musuh-musuhna.”
28 Kalak enda ndai me kerina 12 suku Israel, janah enda ndai me pasu-pasu si kataken bapakna man kalak e. Berekenna pasu-pasu si cocok man kalak e sekalak-sekalak.+
29 Kenca si e perentahkenna kalak e, nina, “Lanai ndekah, mate me aku.+ Emaka kuburkenlah aku ras nini bulangku i bas gua si lit i juma Epron, kalak Het,+
30 eme gua i juma Mahpela, si lit i deher Mamre, i negri Kanaan. Juma e enggo tukur Abraham arah Epron, kalak Het, guna iban jadi kuburen.
31 I je me Abraham ras diberuna Sara+ ikuburken. I je me Isak+ ras diberuna Ribka ikuburken, i je ka me kukuburken Lea.
32 Juma ras gua si lit i je itukur arah kalak Het nari.”+
33 Kenca dung ipeseh Jakup petunjuk-petunjuk e man anak-anakna si dilaki, amparkenna bana bas ingan medemna dung e mate ia janah ikuburken ia bagi nini bulangna.+
Cataten i teruh
^ Ntah “gegehku si tangtangna guna ngasilken keturunen.”
^ As. “I datas kerahung musuh-musuhndu pagi tanndu.”
^ Ertina “Ia si Mpunasa.”
^ Ntah “tukul-tukul.”
^ Maksudna, Jusup.
