Kejadin 6:1-22
6 Reh teremna manusia i doni janah lit anak-anak kalak e diberu.
2 Iperdiateken anak-anak Dibata+ si benar* maka anak-anak manusia si diberu e mejile-jile. Diberu si apai pe si pilih kalak e banna jadi diberuna.
3 Kenca si e nina Jahwe, “La terban Aku lalap sabar man manusia,+ perban manusia enggo erdosa.* Emaka 120 tahun nari ngenca kalak e nggeluh.”+
4 Paksa si e ras kenca si e pe, lit raksasa* i doni, perban anak-anak Dibata si benar terus erhubungen seks ras anak-anak manusia si diberu. Lahirken diberu e anak-anak dilaki. Anak-anak e si jadi dilaki-dilaki si megegeh ras terkenal bas jaman e.
5 Idah Jahwe maka jahat kel manusia i doni. Kai si jahat ngenca lalap lit bas perukuren ras sura-surana.+
6 Kecewa* kel Jahwe perban enggo banNa manusia i doni, sakit hati kel Ia.+
7 Emaka nina Jahwe, “Kumasapken ateKu manusia si enggo Kuciptaken i doni, manusia ras asuh-asuhen, binatang si kabang i langit, bage pe binatang si debanna,* sebap enggo kecewa Aku nciptaken kerina e.”
8 Tapi Nuah jadi ate Jahwe.
9 Enda sejarah kerna Nuah.
Nuah kalak si benar.+ Buktikenna ia la ersalah i tengah-tengah kalak si lit bas jamanna. Nuah erdalan* ras Dibata si benar.+
10 Lahir telu anak Nuah eme Sem, Ham, ras Japet.+
11 Tapi menurut Dibata si benar, doni enda enggo ceda janah dem alu kejahaten.
12 Sanga perdiateken Dibata doni enda, payo tuhu doni enda enggo ceda,+ kerina perbahanen manusia seh kel jahatna.+
13 Kenca si e, nina Dibata man Nuah, “Enggo Kutetapken maka Kukernepken pagi kerina manusia, sebap enggo ban manusia doni enda dem kejahaten. Emaka Kukernepken ateKu kalak e radu ras doni.+
14 Banlah sada bahtra* arah kayu si nteguh.+ Banlah ruang-ruangna, lapisi alu ter+ arah bas bage pe arah darat.
15 Bagendalah ban bahtra e: Gedangna 134 meter, belangna 22 meter, ganjangna 13 meter.*
16 Kira-kira setengah meter* arah atap nari banlah sada jendela,* gelah banci masuk cahaya ku bahtra e. Bas salah sada dingding bahtra e arus banndu pintu masuk,+ telu tingkat ban bahtra e: tingkat sada, tingkat dua, ras tingkat telu.
17 “Kuban ateKu banjir+ i doni guna engkernepken kerina manusia ras binatang si nggeluh si lit i teruh langit. Kernep pagi kerina si lit i doni.+
18 Kuban perjanjin ras kam. Arus kam masuk ku bahtra e, kam, anak-anakndu, diberundu, ras diberu anak-anakndu.+
19 Babalah masuk ku bahtra e sepasang binatang arah tiap jenis binatang,+ gelah binatang e banci tetap nggeluh.
20 Babalah binatang-binatang si kabang menurut jenisna, asuh-asuhen menurut jenisna, ras binatang si debanna* menurut jenisna. Arus babandu sepasang arah tiap jenis binatang-binatang e masuk ku bahtra gelah banci tetap nggeluh.+
21 Selain si e, pepulung kerina jenis pangan+ jadi panganndu bage pe pangan binatang-binatang e janah baba kerina e.”
22 Lakoken Nuah kerina bagi si perentahken Dibata. Lakokenna kerina tepat bagi si perentahken Dibata.+
Cataten i teruh
^ Istilah bas bahasa Heber si ertina malekat-malekat Dibata.
^ Ntah “perban sura-sura dagingna si erdosa ngenca si ikutkenna.”
^ Ntah “Sedih.”
^ Ntah “erteman.”
^ As. “sada peti”; sada kapal si galang.
^ Bahasa Heber: tsohar. Lit si erpengakap maka tsohar maksudna eme atap si kemiringenna kira-kira setengah meter, enda labo lubang ntah pe jendela guna ingan masuk cahaya.
^ As. “Sada hasta.”
