Kejadin 8:1-22
8 Tapi Nuah la lupaken Dibata bage pe kerina binatang liar ras asuh-asuhen si lit bas bahtra.+ Ban Dibata rembus angin i doni, emaka reh urakna lau e.
2 Dungna ngadi lau si nusur arah langit nari janah pintu-pintu lau si lit i langit itutup, emaka ngadi udan si seh kel derna e.+
3 Kenca si e, alu manjar-anjar mulai surut lau i doni. Kenca 150 wari, reh urakna lau e.
4 Bas wari si pe-17-ken bas bulan si pepituken, ngadi bahtra e i datas Pegunungen Ararat.
5 Surut me lau seh ku bulan si pe-10-ken. Bas wari pertama bas bulan pe-10-ken e, enggo teridah puncak gunung-gunung.+
6 Emaka kenca 40 wari, buka Nuah jendela+ bahtra e
7 janah lepaskenna sada burung gagak. Kabang burung gagak e ku jah ku je janah mulihken ka, seh ngasa surut lau i doni.
8 Kenca si e lepasken Nuah ka sada merpati guna meteh enggo surut lau ndai ntah lenga.
9 La lit dat merpati e ingan cinep, emaka mulihken ia ku bahtra perban belang-belang doni itutupi lau denga.+ Emaka dudurken Nuah tanna ku darat janah babana perik e ku bas bahtra.
10 Timaina pitu wari nari, dung e lepaskenna ka merpati e.
11 Sanga ben wari, mulihken ka merpati e. Idah Nuah lit bulung saitun si segar denga bas tubi merpati e. Emaka teh Nuah maka lau enggo surut.+
12 Timaina ka pitu wari nari. Kenca si e lepaskenna merpati e, tapi merpati e lanai mulih.
13 Sanga umur Nuah 601 tahun,+ bas wari pertama, bulan si pertama, lau enggo surut. Buka Nuah sitik atap bahtra e, nenna maka taneh enggo mulai kerah.
14 Bas wari si pe-27-ken, bulan si peduaken, taneh enggo kerah.
15 Nina Dibata man Nuah,
16 “Ndaratlah kam arah bahtra nari, kam, diberundu, anak-anakndu, ras permenndu.*+
17 Pedaratlah kerina binatang e,+ eme binatang si kabang, asuh-asuhen ras binatang liar, bage pe binatang si debanna,* gelah ertambah-tambah janah reh teremna i doni.”+
18 Emaka ndarat Nuah radu ras diberuna, anak-anakna,+ ras permenna.
19 Kerina binatang, binatang si nggawang ras binatang si kabang, bage pe kerina binatang si debanna* si lit i doni, ndarat arah bahtra e menurut jenisna.+
20 Kenca si e, ban Nuah sada ingan nutung* persembahen+ man Jahwe. Buatna piga-piga arah binatang si la ipantangken ras piga-piga arah perik-perik si la ipantangken,+ jenari persembahkenna jadi persembahen tutungen i datas ingan persembahen e.+
21 Anggeh Jahwe bau si merim si erban meriah kel ukurNa. Emaka nina Jahwe bas ukurNa, “Lanai ndigan pe Kusumpahi taneh+ perban perbahanen manusia, sebap perukuren manusia jahat mulai kin kitik-kitikna nari.+ Ndigan pe lanai Kukernepken kerina si nggeluh bagi si enggo Kulakoken.+
22 Mulai gundari nari, lalap pagi lit musim nuan ras musim rani, cuaca si mbergeh ras melas, musim perlego ras musim perudan, bage pe suari ras berngi i doni.”+
Cataten i teruh
^ Ntah “diberu anak-anakndu.”
