Kejadin 9:1-29
9 Pasu-pasu Dibata me Nuah ras anak-anakna janah nina man kalak e, “Ertambah-tambahlah janah reh teremnalah, demilah doni.+
2 Kerina binatang i doni, kerina binatang si kabang i langit, kerina ikan bas laut, bage pe kerina binatang si debanna,* mbiar pagi man kena. Erkuasa pagi kena nandangi binatang-binatang e.+
3 Kerina binatang si nggeluh i doni banci pan kena.+ Kerina e Kubereken jadi pangan kena+ bali bagi sinuan-sinuan si meratah.
4 Tapi ula pan+ kena daging si lit denga darehna,+ sebap dareh e kesah kap.
5 Selain si e, adi lit kalak ntah pe binatang si erban mambur darehndu eme kegeluhenndu, Kupindo pertanggung jawapenna. Adi ia binatang, arus ia mate. Adi ia manusia, arus galarina alu kesahna, perban ia turang senina kena.+
6 Ise pe si munuh manusia, ibunuh manusia ka pagi ia,+ perban manusia iban Dibata bali bagi diriNa.”+
7 Nina Dibata ka, “Ertambah-tambahlah janah reh teremnalah kena, demilah doni enda.”+
8 Kenca si e nina Dibata man Nuah ras anak-anakna,
9 “Kuban sada perjanjin ras kena+ bage pe keturunen kena,
10 ras kerina binatang si lit i doni eme kerina binatang* si ndarat ras kena arah bahtra nari, perik-perik, asuh-asuhen ras binatang liar.+
11 Kuban sada perjanjin ras kena: Ndigan pe lanai pernah manusia ras binatang ikernepken alu banjir si mbelin, ndigan pe lanai pernah lit banjir si mbelin si engkernepken doni enda.”+
12 Nina Dibata ka, “Enda tanda perjanjin si Kuban ras kena bage pe ras kerina binatang si lit ras kena, seh ku kerina keturunen kena pagi.
13 Kuban pelangiKu i embun si jadi tanda perjanjinKu ras doni.
14 Tiap Kuban embun i datas doni, pasti teridah pagi pelangi i embun.
15 Pasti Kuinget perjanjin si Kuban ras kena bage pe ras kerina jenis binatang.* Lanai ndigan pe manusia ras binatang ikernepken alu banjir si mbelin.+
16 Adi lit pagi pelangi i embun, pasti Kuidah pelangi e ras Kuinget perjanjin si rasa lalap si Kuban ras kerina manusia bage pe ras kerina jenis binatang* si lit i doni.”
17 Sekali nari nina Dibata ka man Nuah, “Enda tanda perjanjin si Kuban ras kerina manusia bage pe ras binatang si lit i doni.”+
18 Anak-anak Nuah si ndarat arah bahtra nari eme Sem, Ham, ras Japet.+ Ham si jadi bapak Kanaan.+
19 Enda ndai teluna anak-anak Nuah. Kerina kalak si tading i doni keturunen kalak e.+
20 Mulai Nuah erjuma janah suanna anggur.
21 Bas sada paksa, inemna anggur, jenari mabuk ia, tilanjang ia ampar i kemahna.
22 Ham eme bapak Kanaan, idahna bapakna sangana tilanjang, katakenna man Sem ras Japet si lit i darat.
23 Emaka ibuat Sem ras Japet sada jubah, tama kalak e ku gurungna duana janah mundur kalak e erdalan. Kenca si e, tutupi kalak e bapakna si sangana tilanjang ndai tapi la tulihken kalak e ku bapakna, emaka labo idah kalak e bapakna si sangana tilanjang.
24 Sanga Nuah enggo sadar, tehna kai si enggo ilakoken anakna si nguda man bana,
25 emaka nina,
“Isumpahilah Kanaan.+
Ia jadi budak si rendahna kel man senina-seninana.”+
26 Nina ka,
“Terpujilah Jahwe, Dibata Sem,Kanaan pagi si jadi budak Sem.+
27 Mbera-mbera ibere Dibata taneh si mbelang man Japet,Mbera-mbera tading ia i kemah-kemah Sem.
Kanaan pe jadi budak Japet ka.”
28 Nuah nggeluh 350 tahun nari kenca Banjir si Mbelin e.+
29 Emaka lit 950 tahun dekahna Nuah nggeluh, kenca si e mate ia.
