Keluaren 1:1-22
1 Sanga Jakup ntah pe Israel lawes ku Mesir, kerina anak-anakna si dilaki bage pe keluarga anak-anakna e ikut ras ia.+ Gelar anak-anakna eme:
2 Ruben, Simeon, Lewi, Juda,+
3 Isakar, Sebulon, Benyamin,
4 Dan, Naptali, Gat, ras Aser.+
5 Kerina keturunen Jakup* lit 70 kalak, janah Jusup enggo i Mesir sanga si e.+
6 Dungna mate Jusup+ ras kerina seninana, bage pe kerina kalak si nggeluh sejaman ras kalak e.
7 Jumlah kalak Israel seh kel teremna janah terus reh teremna. Meter kel pertambahen kalak e, seh maka idemina negri e.+
8 Bas pudi wari, merentah raja si mbaru i Mesir, si la nandai Jusup.
9 Emaka nina man rakyatna, “Enggo teremen kalak Israel asangken kita janah enggo gegehen kalak e asangken kita.+
10 Arus sidarami cara gelah ula reh teremna kalak e, sebap adi terjadi perang, ersada pagi kalak e ras musuh-musuhta. Lawanna kita, dung e tadingkenna negri enda.”
11 Emaka ipilih kalak Mesir pengawas guna nindas kalak Israel janah suruh pengawas e kalak Israel kerja paksa.+ Kalak Israel isuruh mbangun Pitom ras Ramses,+ eme kota-kota ingan nimpan pangan ras barang-barang raja Mesir.*
12 Aminna pe reh kelekna kalak Israel itindas, tapi reh teremna kalak e janah tersebar ku japa pe. Emaka mbiar kel kalak Mesir man kalak e.+
13 Perban si e, iban kalak Mesir me kalak Israel jadi budak janah ipaksana kalak e kerja keras.+
14 Latih kel akap kalak Israel iban kalak Mesir. Suruhna kalak e kerja keras, eme ngaduk semen* ras erban batu bata. Suruhna ka kalak e jadi budak i juma. Kejam kel kalak Mesir man kalak e, suruhna kalak e ngelakoken kerina pendahin budak.+
15 Kenca si e ngerana raja Mesir man bidan-bidan kalak Heber si gelarna Siprah ras Puah,
16 nina man kalak e, “Adi sampatindu pagi diberu kalak Heber melahirken,+ perdiateken anak si lahirkenna e. Adi dilaki, bunuh saja, tapi adi diberu, pediat nggeluh.”
17 Mbiar bidan-bidan e man Dibata si benar, emaka la lakoken kalak e kai si suruh raja Mesir. Terus pediatna anak-anak si dilaki tetap nggeluh.+
18 Dungna, lebuh raja Mesir bidan-bidan e, janah nina, “Engkai maka pediat kena anak-anak si dilaki nggeluh?”
19 Nina bidan-bidan e man raja, “Diberu-diberu kalak Heber la bagi diberu-diberu kalak Mesir. Kalak e megegeh, emaka lenga pe reh bidan enggo leben ia melahirken.”
20 Emaka ipasu-pasu Dibata bidan-bidan e, janah kalak Israel pe terus reh teremna ras terus reh gegehna.
21 Perban mbiar bidan-bidan e man Dibata si benar, emaka iban Dibata lit keturunen kalak e.
22 Dungna perentahken raja man kerina rakyatna, nina, “Benterken ku Lau Nil kerina anak dilaki si mbaru lahir arah kalak Heber, tapi kerina anak diberu pediat nggeluh.”+
Cataten i teruh
^ As. “Si rehna arah paha Jakup.”
^ As. “Paro; Firaun.” Penggelaren man raja Mesir.
^ Ntah “semen taneh liat.”
