Keluaren 10:1-29
10 Kenca si e nina Jahwe man Musa, “Jumpailah raja Mesir, sebap enggo Kupediat mekeng ukurna bage pe ukur pejabat-pejabatna,+ gelah banci idahna mukjizat-mukjizat si Kuban i lebe-lebena.+
2 Kulakoken si e gelah ceritaken kena man anak-anak ras kempu-kempu kena. Gelah ceritaken kena kerna hukumen si mberat si Kuban man kalak Mesir bage pe kerna mukjizat-mukjizat si Kuban i tengah-tengah kalak e.+ Alu bage teh kena maka Aku kap Jahwe.”
3 Emaka lawes Musa ras Harun njumpai raja Mesir janah nina, “Bagenda nina Jahwe Dibata kalak Heber, ‘Asa ndigan la kam nggit patuh man bangKu?+ Pediatlah umatKu lawes gelah banci layani kalak e Aku.
4 Sebap adi la pediatndu umatKu lawes, Kuban pagi rehen melala labang ku negrindu.
5 Tertutup pagi kerina taneh ban labang-labang e, seh asa lanai teridah taneh. Keri pagi kerina sinuan-sinuan si tading denga kenca udan es sange bage pe kerina tunas batang kayu si lit i juma.+
6 Kerina istanandu, rumah pejabat-pejabatndu, ras kerina rumah si lit i Mesir dem pagi alu labang. Parahen pagi si terjadi enda asangken si pernah idah bapakndu ras nini bulangndu mulai kin kalak e tading i jenda seh asa gundari.’”+ Dung e lawes Musa ras Harun nadingken raja Mesir.
7 Kenca si e nina pejabat-pejabat raja Mesir man raja Mesir, “Asa ndigan kita susah ban kalak e? Pediat saja kalak e lawes gelah banci sembahna Jahwe Dibatana. La kin idahndu enggo ceda Mesir enda?”
8 Emaka lebuh raja Mesir mulihi Musa ras Harun, janah nina man kalak e, “Lawes dage kena, layani Jahwe Dibata kena. Tapi, ise saja kin si ikut?”
9 Kenca si e nina Musa, “Si ikut ras kami eme anak muda, si enggo metua, anak-anak kami si dilaki ras si diberu, biri-biri kami, ras kambing-kambing kami,+ perban ban kami ate kami perayan man Jahwe.”+
10 Nina raja Mesir man kalak e, “Adi kupediat anak-anak kena lawes ras kena, pasti kataken kena Jahwe ras kena!+ Tuhu-tuhu jahat kel rencana kena.
11 La banci! Si dilaki ngenca si banci lawes ngelayani Jahwe, sebap e nge si pindo kena.” Kenca si e pelawes raja Mesir kalak e.
12 Nina Jahwe man Musa, “Arahken tanndu ku negri Mesir gelah rehen melala labang ku belang-belang negri e gelah panganina kerina sinuan-sinuan si lit bas negri e, eme kai pe si tading denga kenca udan es sange.”
13 Mis arahken Musa tongkatna ku negri Mesir. Kenca si e ban Jahwe rembus angin timur nari ku negri e sada wari sada berngi dekahna. Pepaginna, melala kel labang ibaba angin timur e.
14 Kerina labang-labang e nutupi negri Mesir janah tading i je, emaka parah kel keadan negri e.+ Lenga pernah lit bage+ buena labang bas negri e, kenca si e pe lanai pernah terjadi.
15 Tertutup kerina taneh ban labang-labang e janah gelap banna negri Mesir. Ipan labang-labang e kerina sinuan-sinuan ras buah batang kayu si tading denga kenca udan es sange. Lanai lit si meratah bas batang kayu bage pe sinuan-sinuan bas juma i belang-belang negri Mesir.
16 Emaka minter lebuh raja Mesir Musa ras Harun janah nina, “Enggo erdosa aku man Jahwe Dibata kena bage pe man kena.
17 Sekalenda ampuni min dosaku. Pindolah man Jahwe Dibata kena gelah pengadiNa bencana enda.”
18 Jenari lawes ia* nadingken raja Mesir, janah ertoto ia man Jahwe.+
19 Emaka ubah Jahwe arah angin. Kenca si e rembus angin si meter arah barat nari. Baba angin e kerina labang e ku Laut Merah. Lanai lit sada pe labang ndai si tading bas kerina daerah Mesir.
20 Tapi pediat Jahwe ukur raja Mesir tetap mekeng+ janah la pediat raja Mesir kalak Israel lawes.
21 Kenca si e nina Jahwe man Musa, “Arahken tanndu ku langit gelah gelap kerina negri Mesir, lanai pagi tanggung gelapna negri e.”
22 Mis arahken Musa tanna ku langit, emaka gelap kerina daerah Mesir telu wari dekahna.+
23 Lanai siidahen kalak Mesir janah la lit si miser arah inganna nari telu wari dekahna. Tapi bas ingan tading kalak Israel tetap terang.+
24 Dung e lebuh raja Mesir Musa nina, “Laweslah kena, layani kenalah Jahwe.+ Banci baba kena anak-anak kena, tapi biri-biri ras kambing-kambing kena ula baba.”
25 Tapi nina Musa, “Kerina asuh-asuhen kami pe arus berendu baba kami, gelah banci persembahken kami korban ras persembahen tutungen man Jahwe Dibata kami.+
26 Arus baba kami asuh-asuhen kami, sada pe la banci tading, perban pake kami pagi piga-piga arah binatang e guna nembah Jahwe Dibata kami. Sebap kenca seh pagi kami i jah maka teh kami kai si persembahken kami man Jahwe.”
27 Pediat Jahwe mekeng ukur raja Mesir emaka la pediat raja Mesir kalak Israel lawes.+
28 Nina raja Mesir man Musa, “Lawes kena jenda nari! Ula nai kena kuidah i jenda. Pasti mate kena adi reh denga kena ku jenda.”
29 Nina Musa ngaloisa, “Adi bage nindu, ndigan pe lanai kam kujumpai.”
Cataten i teruh
^ Mungkin Musa.
