Keluaren 11:1-10
11 Jenari nina Jahwe man Musa, “Kuban pagi sekali nari bencana ku negri Mesir bage pe man raja Mesir. Kenca si e, pasti pediatna kena lawes.+ Labo saja terjeng pediatna, tapi pelawesna pagi kena.+
2 Gundari kataken man kalak Israel, man si dilaki ras si diberu, gelah pindona barang-barang si iban arah emas ras pirak man tetanggana si kalak Mesir.”+
3 Ban Jahwe mehuli perbahanen kalak Mesir man kalak Israel. Selain si e, Musa pe ihamati kel bas Mesir. Pejabat-pejabat raja Mesir bage pe rakyat Mesir mehamat man bana.
4 Kenca si e, nina Musa man raja Mesir, “Bagenda nina Jahwe, ‘Kira-kira tengah berngi, reh pagi Aku ku tengah-tengah negri Mesir.+
5 Mate pagi kerina anak sintua si lit i negri Mesir,+ mulai anak raja Mesir sintua si kundul bas tahta seh ku anak sintua arah budak si diberu si erdahin make batu penggilingen, bage pe kerina anak pertama arah asuh-asuhen.+
6 Terbegi pagi sora nderkuh i belang-belang negri Mesir. Lenga pernah terjadi si bage janah lanai pagi pernah terjadi.+
7 Tapi man kalak Israel ras asuh-asuhenna la lit kai pe si terjadi. La lit sada pe biang si ngereng kalak e. Alu bage teh kena maka banci ban Jahwe perbedan bas kalak Mesir ras kalak Israel.’+
8 Kerina pejabatndu reh pagi ndahi aku, sujud kalak e man bangku, jenari nina, ‘Laweslah kam ras kerina kalak si ngikutken kam.’+ Kenca si e, lawes aku.” Kenca bage, lawes Musa nadingken raja Mesir janah ngilas kel atena.
9 Nina Jahwe man Musa, “Labo pagi kam begiken raja Mesir,+ tapi si e terjadi gelah banci Kucidahken terbuen mukjizat i negri Mesir.”+
10 Enggo idah raja Mesir kerina mukjizat si ban Musa ras Harun,+ tapi tetap pediat Jahwe mekeng ukur raja Mesir. Emaka la pediat raja Mesir kalak Israel lawes arah negrina.+
