Keluaren 12:1-51
12 Kenca si e nina Jahwe man Musa ras Harun i Mesir,
2 “Bulan enda jadi bulan si pertama bas tahun-tahun kena.+
3 Kataken man kerina kalak Israel, ‘Bas wari pe-10-ken bulan enda, arus pilih kena sada biri-biri+ man tiap keluarga kena. Sada biri-biri man sada keluarga.
4 Adi la enterem anggota keluarga kena janah la keri sada biri-biri, arus kena erbagi ras tetangga kena si ndeherna. Bagiken daging biri-biri e bas rumah kena menurut jumlah kalakna bage pe asa kai buena daging si banci ipan tiap kalak.
5 Banci pilih kena biri-biri ntah pe kambing, tapi arus jantan, sehat,+ umurna arus sada tahun.
6 Arus pelihara kena binatang e seh ku wari si pe-14-ken bas bulan enda.+ Kenca enggo ben wari,* tiap keluarga bas umat Israel arus nggeleh binatang e.+
7 Arus buat kalak e sitik dareh biri-biri ndai janah percikkenna ku bagin si arah kanan, si arah kiri, ras si arah datas kusen pintu rumah ingan biri-biri e ipan kalak e.+
8 “‘Bas berngi e arus panggang kena daging e,+ jenari pan kena daging e ras roti si la itama ragi+ bage pe gulen-gulen si pagit.+
9 La banci pan kena daging e matah-matah ntah pe belgang kena, tapi arus panggang kena kerina, termasuk takalna, nahena, ras isi beltekna.
10 La banci lit sitik pe si tading seh asa erpagi-pagi, tapi adi lit denga si tading arus tutung kena.+
11 Sanga pan kena daging e, arus pake kena ikat pinggang ras selop janah arus cikep kena tongkat kena. Arus meter kena manca. Enda me wari Paskah man Jahwe.
12 Sebap bas berngi enda, lawes pagi Aku ku negri Mesir janah Kubunuh kerina anak sintua bas negri Mesir, anak sintua arah manusia bage pe binatang.+ Kuhakimi janah Kuhukum pagi kerina dibata Mesir.+ Aku kap Jahwe.
13 Dareh si lit i kusen pintu kena ndai jadi tanda man rumah ingan kena tading. Adi Kuidah pagi lit dareh bas pintu rumah e, la Aku masuk tapi Kulewati saja. Labo pagi kena mate perban hukumen si Kuban ku negri Mesir.+
14 “‘Kena ras keturunen kena arus terus mperingeti wari enda, janah arus rayaken kena e jadi perayan man Jahwe. Arus terus rayaken kena perayan e.
15 Pitu wari dekahna arus pan kena roti si la itama ragi.+ Bas wari si pertama arus ambekken kena ragi arah rumah kena nari. Sebap ise pe si man pangan si lit ragina bas pitu wari e, arus ibunuh.*
16 Bas wari si pertama bage pe bas wari si pepituken, arus ban kena perpulungen si badia. Bas wari si pertama ras wari si pepituken e la lit si banci erdahin.+ Pangan si man panganen tiap kalak ngenca si banci sikapken kena.
17 “‘Arus terus rayaken kena Perayan Roti si La Itama Ragi,+ perban bas wari e pagi Kubaba kena ndarat arah negri Mesir nari. Kena ras keturunen kena arus terus mperingeti wari enda. Arus terus rayaken kena perayan e.
18 Arus pan kena roti si la itama ragi bas berngi wari+ mulai arah wari si pe-14-ken bas bulan si pertama, seh ku wari si pe-21-ken bas bulan e.
19 Pitu wari dekahna, la banci lit ragi bas rumah kena. Ise pe si man pangan si lit ragina arus ibunuh, la soal ia asli kalak Israel ntah pe kalak asing.+
20 Ula pan kena kai pe si lit ragina. I japa pe kena tading arus pan kena roti si la itama ragi.’”
21 Mis lebuh Musa kerina peminpin Israel+ janah nina man kalak e, “Pilihlah binatang si nguda denga* man keluargandu masing-masing, gelehlah binatang e jadi korban Paskah.
22 Kenca si e celupken sada iket hisop ku dareh si enggo itama ku baskom. Percikken dareh e ku datas kusen rumah kena bage pe ku bagin kanan ras kiri kusen e. Ise pe la banci ndarat arah rumah nari seh asa erpagi-pagi.
23 Reh pagi Jahwe ngukum kalak Mesir. Adi idah Jahwe pagi lit dareh bas bagin kanan, kiri, ras datas kusen pintu kena, lewatkenNa pagi rumah e janah la pediatNa ise pe si bas rumah e mate perban hukumen e.+
24 “Perayan enda arus rayaken kena ras keturunen kena seh rasa lalap.+
25 Sanga masuk pagi kena ku negri si bereken Jahwe man kena, arus tetap rayaken kena perayan enda.+
26 Adi nungkun anak-anak kena, ‘Kai ertina perayan enda?’+
27 bagendalah ning kena, ‘Enda korban Paskah man Jahwe. Sebap enggo lewatkenNa rumah-rumah kalak Israel janah la pediatNa sada pe kalak Israel mate sanga hukumNa kalak Mesir.’”
Kenca si e sujud kalak Israel.
28 Emaka lakoken kalak Israel pas bagi si perentahken Jahwe man Musa ras Harun.+ Lakoken kalak e tepat bagi si perentahkenNa.
29 Bas tengah berngi, bunuh Jahwe kerina anak sintua si lit i Mesir.+ Mulai arah anak raja Mesir si kundul i tahtana seh ku anak kalak si ipenjaraken bage pe anak si pertama arah binatang-binatang.+
30 Bas berngi e, medak raja Mesir, bage pe pejabat-pejabatna ras kerina kalak Mesir si debanna. Terbegi sora nderkuh si megang i Mesir perban bas tiap rumah lit kalak si mate.+
31 Bas berngi e mis lebuh raja Mesir Musa ras Harun+ janah nina, “Laweslah kena ras kerina kalak Israel arah negriku nari. Laweslah kena ngelayani Jahwe bagi si enggo kataken kena.+
32 Baba kenalah kerina kambing ras biri-biri kena bagi si pindo kena.+ Pindolah gelah ipasu-pasu Dibata aku.”
33 Desak kalak Mesir gelah meter kalak Israel lawes.+ Nina kalak e, “Adi la kena lawes mate kami kerina!”+
34 Emaka baba kalak e tepung si lenga icampur ras ragi bage pe mangkok tepung si ibungkus alu uis. Jenari tama kalak e bas barana.
35 Bagi si perentahken Musa, pindo kalak Israel man kalak Mesir barang-barang si iban arah emas ras pirak bage pe baju-baju.+
36 Ban Jahwe jadi ate kalak Mesir man kalak e, emaka bereken kalak Mesir kai pe si pindo kalak Israel. Buati kalak Israel erta kalak Mesir.+
37 Kenca si e lawes kalak Israel i Ramses+ nari ku Sukot.+ Lit kira-kira 600.000 dilaki si erdalan, lenga termasuk anak-anak.+
38 Baba kalak e ka melala kambing, biri-biri, ras lembu. Selain si e, enterem ka kalak si deban arah erbage bangsa*+ nari si ikut ras kalak e.
39 Bas perdalanen, iban kalak e roti kibul si la itama ragi arah adonen si baba kalak e Mesir nari, jenari panggangna. La sempat sediakenna pangan si itama ragi ntah pe pangan si debanna, perban rempet kalak e ipelawes arah Mesir.+
40 Lit 430 tahun+ dekahna kalak Israel tading bas Mesir.+
41 Bas wari e, bas pendungi si 430 tahun e, kerina umat Jahwe ndarat arah Mesir nari.
42 Bas berngi e, baba Jahwe kalak e ndarat arah Mesir nari, emaka iban kalak e perayan. Kerina kalak Israel ras keturunenna arus terus mperingeti berngi e alu erban perayan man Jahwe.+
43 Kenca si e nina Jahwe man Musa ras Harun, “Enda me peraturen kerna Paskah: La banci pan kalak asing korban Paskah.+
44 Tapi budak si enggo itukur kena arus sunat kena.+ Kenca si e maka banci panna korban Paskah e.
45 Penduduk sementara ras kalak upahen la banci man korban Paskah.
46 Arus i rumah kena pan kena korban Paskah e. La banci baba kena ndarat, sada pe la banci penggelken kena tulanna.+
47 Kerina umat Israel arus ngerayaken Paskah.
48 Adi lit kalak asing si tading ras kena janah ikut atena ngerayaken Paskah man Jahwe, tiap dilaki bas keluargana arus isunat. Kenca si e maka banci ia ikut ngerayakenca, banci ia ipeseri ras kalak Israel si asli. Tapi si lenga isunat la banci ikut man korban Paskah.+
49 Kalak Israel si asli bage pe kalak asing si tading ras kena arus ndalanken undang-undang e.”+
50 Emaka kerina kalak Israel ngelakoken kai si perentahken Jahwe man Musa ras Harun. Lakoken kalak e tepat bagi si perentahkenNa.
51 Bas wari e, baba Jahwe kerina kalak Israel* ndarat arah Mesir nari.
Cataten i teruh
^ Maksudna, kenca terbenam matawari.
^ As. “ikernepken arah Israel nari.”
^ Maksudna, biri-biri ntah kambing si nguda denga.
^ Kalak Mesir pe termasuk i je.
^ As. “keturunen Israel ras pasuken kalak e.”
