Keluaren 13:1-22
13 Ngerana ka Jahwe man Musa, nina,
2 “Pebadiakenlah* man bangKu anak dilaki sintua arah kalak Israel. Aku kap si mpuna anak dilaki si pertama lahir bage pe binatang jantan si pertama lahir.”+
3 Kenca si e, nina Musa man kalak Israel, “Inget kenalah wari enda eme wari kena ndarat arah ingan kena iperbudak eme arah Mesir.+ Sebap enggo baba Jahwe kena ndarat je nari alu tanNa si megegeh.+ Emaka la banci pan kena kai pe si lit ragina.
4 Bas wari enda eme bas bulan Abip,*+ kena ndarat arah Mesir nari.
5 Enggo erjanji Jahwe man nini bulang kena guna mereken man kena+ negri kalak Kanaan, negri kalak Het, negri kalak Amori, negri kalak Hewi, ras negri kalak Jebusi.+ Kenca enggo baba Dibata kena ku negri si i je melala kel susu ras madu,+ arus ban kena perayan si bagenda tiap tahun bas bulan Abip.
6 Pitu wari dekahna arus pan kena roti si la itama ragi,+ janah bas wari si pepituken arus ban kena perayan man Jahwe.
7 Arus pan kena roti si la itama ragi pitu wari dekahna.+ La banci lit bas kena ragi+ janah bas kerina daerah kena la banci lit kai pe si itama ragi.
8 Bas wari e, arus kataken kena man anak kena, ‘Siban bagenda guna nginget kai si enggo lakoken Jahwe man banta sanga babaNa kita ndarat arah Mesir nari.’+
9 Enggo baba Jahwe kena ndarat arah Mesir nari alu tanNa si megegeh. Emaka perayan enda iban gelah lalap inget kena kerna si e, tempa-tempa si e itulis bas tan ras perdempaken* kena.+ Alu bage, banci lalap ceritaken kena kerna undang-undang Jahwe.
10 Tiap tahun arus patuhi kena peraturen enda bas waktu si enggo itetapken.+
11 “Enggo erjanji Jahwe alu sumpah man kena bage pe man nini bulang kena maka berekenNa negri kalak Kanaan man kena.+ Sanga babaNa kena ku negri e,
12 arus bereken kena man Jahwe tiap anak dilaki sintua bage pe binatang jantan si pertama lahir arah asuh-asuhen kena. Jahwe kap si mpuna kerina dilaki ras binatang jantan.+
13 Tiap anak kelede si pertama arus itebus alu sada biri-biri. Adi la itebus kena, kerahung kelede e arus ipenggelken. Tiap anak dilaki sintua pe arus itebus kena.+
14 “Adi nungkun pagi anak kena kai ertina enda, kataken kenalah bagenda, ‘Alu tan Jahwe si megegeh enggo babaNa kami ndarat arah ingan kami iperbudak eme arah negri Mesir nari.+
15 Mekeng kel ukur raja Mesir janah la pediatna kami lawes,+ emaka bunuh Jahwe kerina anak sintua si dilaki bage pe anak si pertama arah binatang si lit i Mesir.+ Emaka arus sikorbanken man Jahwe kerina anak si pertama arah binatang janah arus sitebus tiap anak sintua si lit bas keluargata.’
16 Perayan enda tempa-tempa jadi tanda bas tan ras perdempaken* kena.+ Perban enggo baba Jahwe kena ndarat arah negri Mesir nari alu tanNa si megegeh.”
17 Sanga pediat raja Mesir kalak Israel lawes, la babai Dibata kalak e ngelewati negri kalak Pilisti, aminna pe ndeher arah je. Sebap nina Dibata, “Berubah pikiren pagi kalak Israel adi arus kalak e erperang janah mulihken pagi kalak e ku Mesir.”
18 Emaka babai Dibata kalak e mutar ngelewati taneh mesawang* si lit i deher Laut Merah.+ Kalak Israel ndarat arah Mesir nari alu teratur bagi pasuken prajurit.
19 Baba Musa ka tulan-tulan Jusup, perban mbarenda enggo suruh Jusup kalak Israel erjanji. Nina Jusup, “Pasti nge pagi isampati Dibata kena. Emaka arus kena erjanji maba tulan-tulanku ndarat jenda nari.”+
20 Berkat kalak e arah Sukot nari janah erkemah i Etam, si lit i pinggir taneh mesawang.*
21 Jahwe lit i lebe-lebe kalak e guna minpin kalak e. Bas ciger wari pakeNa tiang embun janah sanga berngi wari pakeNa tiang api guna nerangi kalak e.+ Alu bage banci kalak e erdalan la soal suari ntah pe berngi.+
22 Sanga suari lit lalap tiang embun e i lebe-lebe kalak e, janah sanga berngi lit lalap tiang api.+
Cataten i teruh
^ Ntah “Pisahkenlah.”
^ As. “i antara mata.”
^ As. “i antara mata.”
^ Taneh si mbelang si jarang iingani.
^ Taneh si mbelang si jarang iingani.
