Keluaren 14:1-31
14 Kenca si e nina Jahwe man Musa,
2 “Suruhlah kalak Israel putar balik janah arus ban kalak e kemahna i lebe-lebe Pi-Hahirot, si lit antara Migdol ras laut. Ban kemah kena i tepi laut e, pengalana ku Baal Sepon.+
3 Bagenda pagi nina raja Mesir, ‘Pasti enggo bingung kalak Israel, enggo terjebak kalak e i taneh mesawang.’*
4 Kupediat pagi mekeng ukur raja Mesir+ janah ayakina pagi kalak Israel. Kutaluken pagi raja Mesir ras pasukenna gelah imuliaken gelarKu.+ Alu bage teh kalak Mesir maka Aku kap Jahwe.”+ Emaka lakoken kalak Israel bagi si perentahkenNa.
5 Kenca si e, ilaporken man raja Mesir maka kalak Israel enggo lawes. Emaka berubah pikiren raja Mesir ras pejabat-pejabatna.+ Nina kalak e, “Engkai maka sibebasken budak-budakta?”
6 Emaka sikapken raja Mesir gereta-gereta perangna janah babana prajurit-prajuritna.+
7 Babana 600 gereta perang pilihen bage pe kerina gereta perang Mesir si debanna lengkap ras prajurit-prajuritna.
8 Pediat Jahwe mekeng ukur raja Mesir. Emaka ayakina kalak Israel si enggo pang nadingken Mesir.+
9 Kerina prajurit si ergereta perang ras si erkuda, bage pe kerina pasuken raja Mesir ngayaki kalak Israel.+ Reh deherna kalak e ras kalak Israel si sangana erkemah i tepi laut i deher Pi-Hahirot si pengalana ku Baal Sepon.
10 Sanga idah kalak Israel maka raja Mesir ras prajuritna enggo reh deherna, mbiar kalak e janah serko kalak e mindo penampat man Jahwe.+
11 Nina kalak e man Musa, “Perban la nge lit kuburen bas Mesir maka babandu kami ku jenda gelah mate kami bas taneh mesawang* enda?+ Engkai maka babandu kami ndarat arah Mesir nari?
12 Me enggo pernah kataken kami man bandu bas Mesir, ‘Pediat saja kami jadi budak kalak Mesir.’ Sebap padin kami jadi budak kalak Mesir asangken mate bas taneh mesawang* enda.”+
13 Kenca si e nina Musa man kalak e, “Ula mbiar.+ Tetaplah paguh, nenlah keselamaten bas Jahwe nari si nandangi cidahkenNa man kena bas wari enda.+ Sebap kalak Mesir si idah kena gundari, asa ndigan pe lanai pagi idah kena.+
14 Jahwe pagi si erperang man kena.+ La perlu lakoken kena kai pe.”
15 Nina Jahwe man Musa, “Engkai maka lalap kam serko mindo penampat man bangKu? Katakenlah man kalak Israel gelah teruskenna perdalanenna.
16 Kam, angkat tongkatndu, arahken ku laut janah belah laut e, gelah banci kalak Israel erdalan arah tengah laut bas taneh si kerah.
17 Tapi Kupediat kari mekeng ukur kalak Mesir, ayaki kalak e kari kena. Kutaluken me raja Mesir ras kerina pasukenna, prajuritna si ergereta perang ras si erkuda, alu bage Kumuliaken gelarKu.+
18 Sanga Kumuliaken gelarKu alu naluken pasuken raja Mesir, naluken prajuritna si ergereta perang ras si erkuda, pasti teh kalak Mesir maka Aku kap Jahwe.”+
19 Kenca si e, malekat Dibata si benar+ si lit i lebe-lebe kalak Israel pindah ku pudi kalak e. Tiang embun si lit i lebe kalak e pe pindah ka ku pudi kalak e.+
20 Tiang embun e lit i antara kalak Mesir ras kalak Israel.+ Bagin embun si arah kalak Mesir gelap janah bagin embun si arah kalak Israel terang.+ Emaka kalak Mesir la banci ndeheri perkemahen kalak Israel gedang-gedang berngi e.
21 Kenca si e, arahken Musa tongkatna ku laut.+ Emaka gedang-gedang berngi e iban Jahwe angin timur rembus alu meter. Terbelah laut e+ janah kerah dasar laut e.+
22 Emaka erdalan kalak Israel arah tengah-tengah laut e i taneh si kerah.+ Bas sebelah kanan ras kiri kalak e, lau ndai enggo bagi dingding.+
23 Ayaki kalak Mesir kalak Israel. Kerina kuda raja Mesir, gereta-gereta perangna, bage pe prajurit-prajuritna ngayaki kalak e ku tengah laut.+
24 Sanga erpagi-pagi si lampas,* arah tiang api ras tiang embun e,+ tatap Jahwe ku pasuken Mesir janah kacau banNa pasuken kalak e.
25 BanNa roda-roda gereta kuda kalak e lepasen, emaka mesera akap kalak e mabasa. Nina kalak Mesir, “Ota kita kiam! Sitadingken kalak Israel, sebap Jahwe kap si erperang ngelawan kita guna kalak Israel.”+
26 Kenca si e nina Jahwe man Musa, “Arahken tanndu ku laut, gelah ersada mulihi lau e nutupi kalak Mesir, pasukenna si ergereta ras si erkuda.”
27 Mis arahken Musa tanna ku laut, janah paksa nandangi terang wari mulai lau e ersada bagi biasana. Sanga kiam ate kalak Mesir arah lau e nari, ban Jahwe kalak Mesir e gedap i tengah laut.+
28 Maler mulihken lau ndai, emaka gedap kerina pasuken raja Mesir bage pe prajuritna si ergereta perang ras si erkuda si ngayaki kalak Israel ku tengah laut.+ La lit sekalak pe ipediat selamat.+
29 Tapi kalak Israel erdalan i taneh si kerah i tengah laut+ janah lau e bagi dingding i sebelah kanan ras kiri kalak e.+
30 Bas wari e, selamatken Jahwe kalak Israel arah tan kalak Mesir nari.+ Idah kalak Israel mayat kalak Mesir amparen i tepi laut.
31 Idah kalak Israel ka uga kuasa Jahwe si luar biasa naluken kalak Mesir. Emaka mbiar kalak Israel man Jahwe janah tek kalak e man Jahwe bage pe man pelayanNa Musa.+
Cataten i teruh
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Maksudna, kira-kira jam 2 seh ku jam 6 erpagi-pagi.
